ოზურგეთის მუნიციპალიტეტის საკრებულოს თავმჯდომარემ დავით დარჩიამ და გამგებელმა მერაბ ჭანუყვაძემ წინასაახალწლოდ საკუთარ თავს საჩუქარი გაუკეთეს და ძვირადღირებული მანქანები _ 40 000 ლარიანი LEXUS GX 470 და 43 000 ლარიანი TOYOTA FJ CRUISER შეიძინეს. ახალი ავტომობილი ერგო, ასევე, სამხედრო აღრიცხვის, გაწვევისა და მობილიზაციის სამსახურის უფროს ილია ლეჟავას _ ღირებულებით 5 ათას 609 ლარი და 10 თეთრი.
ოფიციალური დოკუმენტების მიხედვით, ოზურგეთის მუნიციპალიტეტის საკრებულოს თავმჯდომარის დავით დარჩიას მიერ გამოცემულ #98 განკარგულების საფუძველზე, ოზურგეთის მუნიციპალიტეტის გამგეობის მიერ მანქანების ყიდვა გამარტივებული შესყიდვის საშულებით გახორციელდა.
“ოზურგეთის მუნიციპალიტეტის გამგეობამ, გადაუდებელი აუცილებლობიდან გამომდინარე, ოზურგეთის მუნიციპალიტეტის წარმომადგენლობითი და აღმასრულებელი ორგანოებისათვის ავტოსატრანსპორტო საშუალებების 90 000 ლარის ღირებულების სახელმწიფო შესყიდვები განახორციელოს გამარტივებული შესყიდვის საშუალებით, საკრებულოს 2014 წლის 13 აგვისტოს #3 დადგენილებით გათვალისწინებული ასიგნებების ფარგლებში“, _ ნათქვამია დოკუმენტში.
ოზურგეთის მუნიციპალიტეტის გამგეობის სამხედრო აღრიცხვის, გაწვევისა და მობილიზაციის სამსახურის უფროს ილია ლეჟავასა და შპს “დე კრედიტის“ დირექტორ იოსებ არდაზიშვილს შორის 2014 წლის 30 დეკემბერს გაფორმებული #140 ხელშეკრულების შესაბამისად, შპს “დე კრედიტმა“ ოზურგეთის მუნიციპალიტეტის გამგეობას მიაწოდა ავტომანქანა “ვაზ 21214“, ღირებულება: 5 ათას 609 ლარი და 10 თეთრი.
2014 წლის 29 დეკემბერს, ოზურგეთის მუნიციპალიტეტის გამგებელ მერაბ ჭანუყვაძეს და ინდივიდუალურ მეწარმეს ფრიდონ ირემაშვილს შორის #139 ხელშეკრულება გაფორმდა, რის საფუძველზეც მუნიციპალიტეტის გამგებელმა მერაბ ჭანუყვაძემ შეიძინა ავტოსატრანსპორტო საშუალება TOYOTA FJ CRUISER, რომლის ღირებულება 40 000 ლარია.
2014 წლის 25 დეკემბერს გაფორმდა #135 ხელშეკრულება მუნიციპალიტეტის გამგებელ მერაბ ჭანუყვაძისა და ფიზიკურ პირ ნინო ნადარეიშვილს შორის, გამარტივებული შესყიდვის საშუალებით, რის საფუძველზეც ოზურგეთის მუნიციპალიტეტმა შეიძინა ავტოსატრანსპორტო საშუალება LEXUS GX 470, ღირებულებით 43 ათას 700 ლარი. ავტომანქანა ოზურგეთის მუნიციპალიტეტის საკრებულოს თავმჯდომარეს დავით დარჩიას ერგო.
აღნიშნულთან დაკავშირებით ოზურგეთის მუნიციპალიტეტის გამგებელი მერაბ ჭანუყვაძე ასეთ კომენტარს აკეთებს:
“ზემოაღნიშნული განპირობებული იქნა იმით, რომ ჩვენმა წინამორბედმა ადგილობრივმა ხელისუფლებამ, 2014 წლის 15 ივნისის ადგილობრივი თვითმმართველობის ორგანოების არჩევნებამდე ცოტა ხნით ადრე, გაასხვისა უკვე გაუქმებული ოზურგეთის მუნიციპალიტეტის ბალანსზე რიცხული ხუთი ერთეული მაღალი გამავლობის ავტომობილი „ნივა“ და ორი ერთეული დაბალი გამავლობის ავტომობილი, რომელთა არსებობაც მნიშვნელოვნად გააუმჯობესებდა ჩვენი ფუნქციების გახორციელების ხარისხს.
ჩვენი თვითმიზანი არ არის კომფორტული და ძვირადღირებული ავტომობილების პარკის ქონა, არამედ ის, რომ ჩვენს მოსახლეობას შევთავაზოთ უკეთესი და ხარისხიანი სერვისი. დროულად მოვახდინოთ რეაგირება და გადაადგილება მათი საჭირბოროტო საკითხების გადასაწყვეტად.
ვინაიდან, მუნიციპალიტეტის გამგეობას ბალანსზე ერიცხებოდა მხოლოდ 2003 წელს გამოშვებული ავტომანქანა „მერსედეს ბენც 320“, რომელიც, ფაქტობრივად, ამორტიზირებულია და მუნიციპალიტეტი, როგორც აღმასრულებელი ორგანო, მოკლებული იყო იმის შესაძლებლობას, რომ დროულად მოეხდინა რეაგირება და გადაადგილება საჭირბოროტო საკითხების გადასაწყვეტად. აღნიშნული პრობლემის გამო, ხშირ შემთხვევაში, ხელი ეშლებოდა მუნიციპალიტეტის ფუნქციონირებას და ამ მიზნით, მუნიციპალიტეტის გამგეობამ დაგეგმა მაღალი გამავლობის ავტოსატრანსპორტო საშუალებების შეძენა 50 000 (ორმოცდაათი ათასი) ლარის ღირებულების ფარგლებში“, _ გვითხრა მერაბ ჭანუყვაძემ.
ოზურგეთის მუნიციპალიტეტის საკრებულოს თავმჯდომარე დავით დარჩია “გურია ნიუსთან“ აღნიშნავს, რომ საკრებულოს არ ჰყავდა მანქანა: “ადგილობრივი თვითმმართველობის არჩევნების შემდეგ ჩვენ არ გვერგო არც ერთი მანქანა. საკრებულოს თავმჯდომარეს, თითქმის, ყოველდღე უხდება სოფლებში გასვლა, ამიტომ მეორადი მანქანა შევიძინეთ 45 000 ლარად“.
