დღეს ლანჩხუთის მუნიციპალიტეტის საკრებულოს 2015 წლის პირველი ბიუროს სხდომა ჩატარდა და მოძალებული საკითხების გათვალისწინებით მისი დღის წესრიგი საკმაოდ ტევადი გამოდგა და 23 საკითხით განისაზღვრა.
ბიუროს წევრებმა მხოლოდ პირველ საკითხზე მოახერხეს ასე თუ ისე მსჯელობა, როცა გამგეობის სოციალური სამსახურის უფროსმა, ქალბატონმა მარინა კეიდიამ მიმდინარე წლის სოციალური დახმარებების გაცემისა და მიღების წესის დამტკიცებაზე ჩამოაგდო საუბარი. დასამტკიცებელი პროგრამების ირგვლივ დეპუტატებს რამდენიმე საკითხის გარკვევა სურდათ და საბოლოოდ ბიურომ გადაწყვიტა ჯერ კომისიებსა და ფრაქციებში მოხდეს განხილვები და გასარკვევიც იქ გაირკვესო.
ამის შემდეგაც სხდომა ფორმალობად იქცა. საკრებულოს თავმჯდომარემ დანარჩენ საკითხებზე მსჯელობა მიზანშეწონილად არ ჩათვალა და ამდენი საკითხი შორს წაგვიყვანსო და მოკლედ გადაამისამართა ყველა თემა შესაბამის კომისიებში და საკრებულოს მომავალ სხდომაზეც მომხსენებლები ყოველგვარი მსჯელობის გარეშე განსაზღვრა.
საკუთრივ საკრებულოს სხდომაზე, რომელიც 30 იანვარს შედგება, საკმაოდ ბევრი საკითხი მოიყრის თავს. დავიწყოთ იმით, რომ უნდა დამტკიცდეს 2015 წლის სოციალური და სოც-კულტურული პროგრამები, შესაბამისად სოციალური დახმარების გაცემისა და მიღების, ასევე დაფინანსების წესის განსაზღვრის შემდგომ. ცვლილება მოხდება მუნიციპალიტეტის საკრებულოს თანამდებობის პირთა სარგოს ოდენობის განსაზღვრის შესახებ დადგენილებაში, სადაც განსაზღვრულია საკრებულოს თანამდებობის პირთა ხელფასების მატება. შესაბამისად, ცვლილება მოხდება საკრებულოს აპარატის საშტატო ნუსხის დამტკიცების შესახებ დადგენილებაში.
რამდენიმე საკითხი გამგეობაში გასატარებელ ცვლილებებს დაეთმობა. კერძოდ, გამგეობის თანამდებობის პირთა და სხვა მომსახურეთა საშტატო ნუსხისა და თანამდებობრივი სარგოს ოდენობების დამტკიცების შესახებ განკარგულებაში მოხდება კორექტირება. ცვილილება იგეგმება გამგეობის დებულებაში, რამეთუ იქმნება ახალი სამსახური, კერძოდ, განათლების, კულტურის, სპორტისა და ახალგაზრდულ საქმეთა სამსახური, რომლის დებულების დამტკიცებასთან ერთად განიხილება სოციალურ საკითხთა სამსახურის დებულებაში ცვილებების შეტანა.
გარკვეული ცვილებებია დაგეგმილი 2015 წლის ბიუჯეტში, შესყიდვების გეგმასა და მუნიცაპალიტეტის ქონების საპრივატიზებო ობიექტების ნუსხაში. სხდომის დღის წესრიგში მოხდა ლანჩხუთის მუნიციპალიტეტის „სკოლამდელი საგანმანათლებლო სააღმზრდელო ცენტრისთვის“ და „სასწრაფო დახმარების ცენტრისთვის“ქონების სარგებლობის უფლებით გადაცემაზე, ასევე შპს „საფეხბურთ კლუბ გურია 2000_ის“ ლიკვიდაციაზე გამგებლისთვის თანხმობის მიღების საკითხებიც.
ასევე მოხდება გამგეობის სახანძრო-სამაშველო სამსახურის დებულებისა და სამსახურის პირადი შემადგენლობის დამტკიცების საკითხების ძალადაკარგულად გამოცხადება.
და კიდევ, უნდა დამტკიცდეს მუნიციპალიტეტის ქონების პრივატიზაციის გეგმა და ლანჩხუთის ტერიტორიაზე ძაღლებისა და კატების მოვლა-პატრონობისა და მათი პოპულაციების მართვის წესი.
