საქართველოს ეროვნული ნაკრების მთავარმა მწვრთნელმა კახი ცხადაძემ მოახლოებული ორი თამაშის წინ ნაკრების გაფართოებული შემადგენლობა დაასახელა.
კახი ცხადაძის დებიუტი ეროვნული გუნდის მთავარი მწვრთნელის პოსტზე 29 მარტს, მსოფლიოს ჩემპიონ გერმანიასთან ევრო 2016-ის შესარჩევ შეხვედრაში შედგება, მანამდე ოთხი დღის ადრე კი, 25 მარტს, საქართველო ასევე თბილისში უმასპინძლებს მალტას. თამაში ამხანაგურია.
_ მიუხედავად იმისა, რომ კლუბშიც ვმოღვაწეობ, ნაკრების წევრებს და კანდიდატებს თვალს ვადევნებ. ძირითადად კვლავ ლეგიონერებს ვეყრდნობი, თუმცა ხაზგასმით ვამბობ, რომ ნაკრების კარი ყველა იმ ფეხბურთელისთვისაა ღია, ვინც სათანადო ფორმაში იქნება. ცხადია, დაახლოებით ვიცი ვინ მოხვდება 22 კაცში, მაგრამ შანსი ყველას უნდა ჰქონდეს.
გერმანიასთან მატჩის წინ მალტის ნაკრებთან ამხანაგური პაექრობა გველის. ამ თამაშს გერმანიასთან მოსამზადებლად გამოვიყენებთ. ახლა კანდიდატების საქმეში ნახვის დრო არაა. რა თქმა უნდა, მერჩივნა სხვანაირად ყოფილიყო, მაგრამ ყველას მოგეხსენებათ რა სიტუაციაში ჩავიბარე გუნდი, ამიტომ, მალტელებთან ერთგვარ რეპეტიციას გავივლით. აქვე დავძენ, რომ საწვრთნელი შეკრებისას დღეში ორჯერადი ვარჯიშები გვექნება, თამაშის დღეს კი, 29 მარტს ვგულისხმობ, სტანდარტულ სიტუაციებს დავამუშავებთ.
ჩვენი გუნდის რამდენიმე წევრს 22 მარტსაც უწევს თამაში. ისინი ტურის შემდეგ შემოგვიერთდებიან, შეკრება კი 19 მარტს დაიწყება, _ აღნიშნა ცხადაძემ ჟურნალისტებთან საუბრისას.
მისივე თქმით, დაკარგული ჯერ არაფერია:
_ ამ შესარჩევში ნაკრებს არცთუ სახარბიელო სტარტი ჰქონდა, მაგრამ ვთვლი, რომ დაკარგული ჯერ არაფერია. მიმაჩნია, რომ ჩვენ შეგვიძლია თავიდან ავიცილოთ ის დასასრული, რაც გუნდმა ბოლო ორ საკვალიფიკაციო ტურნირში აჩვენა _ ბოლოსწინა ადგილს ვგულისხმობ.
მჯერა, რომ 13 ივნისს, პოლონეთში თამაშის წინ, უკეთ ვიქნებით მომზადებულნი. თითქმის გადაწყვეტილია, რომ პოლონეთში ჩასვლამდე ავსტრიაში გავივლით შეკრებას სადაც ერთ ამხანაგურ შეხვედრას ჩავატარებთ. სავარაუდოდ მაკედონიასთან.
შემიძლია დავადასტურო, რომ გია ცეცაძე, რომელიც წარმატებით მიღვაწეობდა ასაკობრივ ნაკრებში, ჩემი თანაშემწე იქნება. ფიზმომზადების მწვრთნელად უცხოელ სპეციალისტს ვიწვევ, მეკარეთა მწვრთნელად კი კვლავ მამუკა აბუსერიძე იმუშავებს. რაც შეეხება ექიმს, ეს მისია მერაბ ვარძუკაშვილს დაეკისრება. მასთან ადრეც ვთანამშრომლობდი და მის კომპეტენციაში ეჭვი არ მეპარება. მოგვიანებით დავასახელებ კიდევ ერთ თამაშემწეს.
რაც შეეხება კაპიტანს, სამკლაური კვლავ ჯაბა კანკავას განკარგულებაშია. მისი შეცვლის საკითხი არც დამდგარა. მე და ჩემი გუნდი სრულად ვენდობით ჯაბას და ვთვლი, რომ ის ამ პასუხისმგებლობას კარგად გაუმკლავდება.
მინდა, რომ ჩვენი ურთიერთობა ცივილური იყოს. გარწმუნებთ: ყველა ჟურნალისტთან კომუნიკაციისთვის მზად ვარ. აქვე ხაზგასმით ვამბობ, რომ ნაკრების თამაშის ხარისხსა და შედეგზე პასუხისმგებელი მხოლოდ მე ვარ. დანარჩენს, თუ ვინ მოხვდება ნაკრებში, ვინ ითამაშებს და სხვა წმინდა სათამაშო საკითხებს, მე გადავწყვეტ ჩემს გუნდთან ერთად, _ განაცხადა ნაკრების მთავარმა მწვრთნელმა.
ეროვნული ნაკრების გაფართოებული შემადგენლობა ასე გამოიყურება:
მეკარეები: გიორგი ლორია, ნუკრი რევიშვილი, ომარ მიგინეიშვილი, რევაზ თევდორაძე
მცველები: უჩა ლობჟანიძე, გურამ კაშია, გიორგი ნავალოვსკი, ლაშა თოთაძე, გიორგი ფოფხაძე, ლაშა სალუქვაძე, ლაშა დვალი, საბა კვირკველია, ალექსანდრე ამისულაშვილი, მამუკა კობახიძე, ზურაბ ხიზანიშვილი
ნახევარმცველები: ჯაბა კანკავა, ლევან ყენია, კახა მახარაძე, ბუბა დაუშვილი, ჯანო ანანიძე, გიორგი მერებაშვილი, ვალერი ყაზაიშვილი, თორნიკე ოქრიაშვილი, ნიკა ძალამიძე
თავდამსხმელები: ლევან მჭედლიძე, მათე ვაწაძე, ოთარ მარცვალაძე, ბაჩანა ცხადაძე, გიორგი ჭანტურია
