14 მარტს მესხის სტადიონზე "რაგბი ევროპის" ჩემპიონატის 2015 წლის გათამაშების მე-4 ტურში ქართველი ბორჯღალოსნები რუს დათვებს ურთიერთ შეხვედრების ისტორიაში მე-19-ჯერ ერკინებინ. მატჩი 17 საათზე დაიწყება.
მატჩის ბილეთები 8 მარტიდან ყოველდღიურად, მხოლოდ მესხის სტადიონის სალაროებში იყიდება.
სალაროები 11-დან 19 საათის ჩათვლით მუშაობს. დარჩენის შემთხვევაში ბილეთები მატჩის დღესაც გაიყიდება. ბილეთის ფასი 3 და 5 ლარია.
ბორჯღალოსნებისა და დათვების მეტოქეობა სათავეს 1993 წლიდან იღებს.
პირველი რკენა სოპოტში (პოლონეთი) 9:15 წავაგეთ, მას აქეთ კი ორი ათეული წელი გავიდა და უკვე 16-ჯერ ვძლიეთ ჩრდილოელი მეზობელი.
პირველი, ისტორიული გამარჯვება 29:20 ეროვნულ სტადიონზე მოვიპოვეთ 1996 წელს.
მეტი რეზონანსი მოჰყვა 1998 წლის შებმას ნაწვიმარ მოედანზე, როცა ულელოოდ, ჯარიმებით 12:6 ვიმარჯვეთ და რუსეთი მსოფლიო თასის შესარჩევს გამოვთიშეთ.
2001 წელს 25:23 მოვიგეთ პირველივე გასვლა ქარიან კრასნოდარში, 2002 წელს კი, ეროვნულზევე, საარაკო ჯახში 17:13 ვიმარჯვეთ და მსოფლიო თასზე პირველად გავედით.
საეტაპო იყო 2004 წლის გამარჯვებაც, როცა განახლებულმა გუნდმა მესხზე 9:3 ივარგა. მას აქეთ ჩვენი უპირატესობა აშკარა გახდა _ ბოლო ათ შეყრაზე ლელოთა ბალანსია 41/7, ჯამური ანგარიში კი 307:115.
რუსეთის მონაგარი ბოლო ხუთი მატჩიდან ოთხში ერთ-ნიშნა რიცხვია, საქართველოს მორიგი ათი გამარჯვებიდან კი გამოსაყოფია:
2006 წლის რბევა ეროვნულზე 46:19; 2008 წლის ციმბირული თოვლაობა 18:12; ლაშქრობანი მარიუპოლში 29:21 (2009) და თრაბზონში 36:8 (2010); დათვების უსიტყვო კაპიტულაცია ვაკეში 46:0 (2012); სულ 18 სამეზობლო რკენის ბალანსია 16-1 (1 ფრე) საქართველოს სასარგებლოდ.
ქულები 443:224, ლელოები 49/13
წყარო:rugby.ge
