მოსწავლეთა ევროპული მათემატიკური კონფერენციის -European Student Conference ,,EUROMATH 2015”- ფინალში მონაწილეობის მისაღებად საბერძნეთის დედაქალაქ ათენში საქართველოს 5 რაიონიდან 12 მოსწავლე გაემგზავრა.
მიმდინარე სასწავლო წლის ნოემბერ-დეკემბერში, განათლების სამინისტროს დაფინანსებითა და საერთაშორისო ასოციაცია "ბალავარის” ორგანიზებით, ევროკავშირის პროექტის _ ,,Le- MATH’’-ის საფუძველზე, საქართველოს 55 რაიონში განხორციელდა პროექტი ,,ვუერთდებით ევროპას!“.
საერთაშორისო საგანმანათლებლო ასოციაცია ,,ბალავარის’’ პრეზიდენტის ლალი ბერძენიშვილის ინფორმაციით მასში მონაწილეობა მიიღო 570-მა სკოლამ, 5000-ზე მეტმა მოსწავლემ, მასწავლებელმა და მშობელმა.
_ ასოციაცია ბალავარის სწავლისა და სწავლების ინოვაციურ მიდგომებზე დაფუძნებით პროექტი მიზნად ისახავს მათემატიკით მოსწავლეთა მასობრივად დაინტერესებას, მათემატიკის სწავლებაში სულ უფრო და უფრო მეტი მოსწავლისა და მშობლის ჩართულობას.
ჩვენ ეროვნულ დონეზე ოთხი საერთაშორისო მათემატიკური კონკურსი(Math-ea¬tre, MathFactor, MathPoster, MathPresentation) ჩავატარეთ და გამარჯვებულები ევროპული კონკურსის EUROMATH 2015-ის შესარჩევ ეტაპზე წარვადგინეთ, _ ამბობს ბერძენიშვილი.
საერთაშორისო კონკურსში Matheatre სამი სკოლის გუნდი იქნა წარდგენილი, კონკურსში MathFactor _ 2 მოსწავლე, კონკურსში MathPoster ასევე 2 მოსწავლე; საერთაშორისო ჟიურიმ მოიწონა საქართველოს მიერ წარდგენილი ყველა სკოლისა და მოს¬წავლის ნამუშევარი და გადაიყვანა ისინი ევროპის ფინალურ ტურში. გამარჯვებულთა შორის არიან როგორც დედაქალაქის, ასევე რეგიონული სკოლების მოსწავლეები.
ევროპის ქვეყნებიდან კონფერენციაზე მონაწილეობას იღებს 16 ქვეყნის 350 მოსწავლე, ასევე მონაწილეობენ ირანის, ლიბიისა და თურქეთის საჯარო და კერძო სკოლების მოსწავლეები.
_ ცხადია, ქართველი მოსწავლეები EUROMATH 2015-ზე მონაწილეობით, ბევრ სხვა სიკეთესთან ერთად, ძალიან დიდ გამოცდილებასაც შეიძენენ; ევროპულ კონფერენციაზე მათი მონაწილეობა საქართველოს სკოლებში ,,Le-MATH’’ პროექტის წარმატებით დანერგვის საწინდარი იქნება, რაც, თავისთავად, ხელს შეუწყობს მათემატიკის პოპულარიზაციას და ამ საგნით მოსწავლეთა მასობრივ დაინტერესებას, _ აღნიშნავს ასოციაციის პრეზიდენტი.
მისივე თქმით, კონკურენცია ძალიან დიდია, თუმცა, იმედოვნებს, რომ ქართველი მოსწავლეები საპრიზო ადგილებს დაიკავებენ:
_ მას შემდეგ, რაც ათენში ჩამოვედით, კიდევ უფრო მეტად გავაცნობიერეთ რაოდენ მნიშვნელოვანია საქართველოს მონაწილეობა ამ საერთაშორისო ინტელექტუალურ შეჯიბრში. ქართველი მოსწავლეები ტოლს არ უდებენ თავიანთ ევროპელ თანატოლებს, კონკურენცია ძალიან სერიოზულია, მაგრამ ჩვენ არ ვკარგავთ საპრიზო ადგილებზე გასვლის იმედს.
თუმცა, დიდი ვნებათა ღელვა გადავიტანეთ ათენში გამომგზავრების წინ, რადგან საქართველოს მოსწავლეთა მონაწილეობა საერთაშორისო მათემატიკურ კონფერენციაზე, მიზეზთა გამო, სერიოზული საფრთხის წინაშე დადგა. მაშინ, როცა იმედი უკვე თითქმის გადაწურული გვქონდა, ასოციაციამ დახმარებისათვის საქართველოს პრემიერ-მინისტრს, ბატონ ირაკლი ღარიბაშვილს, მიმართა.
ჩვენდა გასაოცრად (იმავდროულად, სასიხარულოდ!) მოქალაქეთა ხმამ ძალიან მოკლე დროში მიაღწია პრემიერ-მინისტრამდე, რაც ერთობ მოულოდნელი აღმოჩნდა ჩვენთვის. ამას ხომ ოდითგან მიჩვეული არ ვიყავით! ბატონმა პრემიერმა განსაკუთრებული გულისხმიერება გამოიჩინა ნიჭიერი ბავშვების მიმართ, ძალისხმევა არ დაიშურა, რათა ქართველ მოსწავლეებსაც მისცემოდათ შან-სი თავიანთი ინტელექტი და შემოქმედებითი უნარები ევროპელ მოსწავლეთა ძალიან პრესტიჟულ მათემატიკურ კონფერენციაზე გამოევლინათ.
პრემიერ-მინისტრის მიერ გამოჩენილი განსაკუთრებული გულისხმიერებითა და ოპერატიული დახმარებით, სახელმწიფო უწყებებისა და საბერძნეთის კონსულის ხელშეწყობით, ასევე ძალიან მოკლე დროში აღმოიფხვრა სერიოზული პრობლემები, რამაც საშუალება მისცა ევროპული კონკურსების პირველ ეტაპზე გამარჯვებულ ქართველ ბავშვებს მონაწილეობა მიეღოთ EUROMATH 2015-ის ფინალურ ტურში, _ ამბობს ბერძენიშვილი.
