ქალაქ ოზურგეთის მერია, გუშინ "გურია ნიუსზე" გამოქვეყნებულ მასალას პასუხობს, რომელსაც უცვლელად გთავაზობთ.
"გაზეთ "გურია News"- ის ვებ-გვერდზე გამოქვეყნებულ სტატიაში სათაურით "ოზურგეთის მერის ბრძანებები – თებერვალში N119, აპრილში N3" , სადაც რამდენიმე უზუსტობაა გაპარული.
პირველ რიგში გაცნობებთ, რომ ქვეყნის მასშტაბით მიმდინარეობს სახელმწიფო და ადგილობრივი თვითმმართველობის დაწესებულებებში საქმის წარმოების ერთიანი ელექტრონული სისტემის დანერგვა. დღეის მდგომარეობით, ზემოხსენებული დაწესებულებების უმრავლესობა უკვე ჩართულია სისტემაში.
2015 წლის 1 აპრილამდე ქალაქ ოზურგეთის მუნიციპალიტეტის მერიაში ბრძანებები გამოიცემოდა ერთიანი წესით (მაგ: თანამდებობაზე დანიშნვის, შვებულების, მივლინების და ა. შ.) და ინომრებოდა მიმდევრობით, ზრდადობის პრინციპით.
2015 წლის 1 აპრილიდან, ქალაქ ოზურგეთის მუნიციპალიტეტის მერია ჩაერთო საქმის წარმოების ერთიან ელექტრონულ სისტემაში და დღეის მდგომარეობით წარმოება მიმდინარეობს ერთიანი სისტემის მეშვეობით. მომზადებულ სამართლებრივ აქტს ნომერი ენიჭება ავტომატურად, პროგრამის მიერ. პროგრამა ბრძანებებს ახარისხებს ორ ტიპად: მივლინება/შვებულება და საორგანიზაციო ბრძანებები. სისტემაში ჩართვის შემდეგ საორგანიზაციო ბრძანებების ნუმერაცია გაგრძელდა ხოლო მივლინება/შვებულების ბრძანებებისათვის ნომრების მინიჭება დაიწყო N 1 -დან.
სამართლებრივი აქტისთვის ნომრის მინიჭებასთან დაკავშირებით ერთიან ელექტრონულ სისტემაზე რაიმე ზემოქმედება სრულიად შეუძლებელია. აქედან გამომდინარე, ეჭვები საქმის წარმოების წესების დარღვევაზე ან სამართლებრივ აქტისათვის არასათანადო ნომრის მინიჭებაზე საუბარი აბსურდია. შესაბამისად, სამართლებრივი აქტები რომლის შესახებაც საუბარია სტატიაში, გამოცემულია კანონმდებლობის სრული დაცვით.
ქალაქ ოზურგეთის მუნიციპალიტეტის მერია საქმიანობას ახორციელებს კანონმდებლობის სრული დაცვით და თვლის, რომ სტატიის მომზადებისას მეტი კომპეტენციის შემთხვევაში ამ თემის აქტუალიზება არ მოხდებოდა."
