ეროვნულ-დემოკრატიული ინსტიტუტის – NDI-ს კვლევის მიხედვით, გამოკითხულთა 45%-ის აზრით, ხელისუფლება მათთვის მნიშვნელოვან ცვლილებებს ახორციელებს, 50%-ის შეფასებით კი – არა.
კითხვაზე – რამდენად ეთანხმებით ან არ ეთანხმებით მოსაზრებას, რომ არსებული ხელისუფლება ახორციელებს თქვენთვის მნიშვნელოვან ცვლილებებს, აღნიშნულ მოსაზრებას 45% ეთანხმება, 50% კი, არ ეთანხმება.
რაც შეეხება შეკითხვას, საპარლამენტო ოპოზიცია რომ ხელისუფლებაში იყოს განახორციელებდა თუ არა მოსახლეობისთვის მნიშვნელოვან ცვლილებებს, 51%-ის აზრით, ეს ასე არ იქნებოდა, 22% კი – აღნიშნულ მოსაზრებას ეთანხმება.
გარდა ამისა, გამოკითხულთა 47% ფიქრობს, რომ რიგ საკითხებთან მიმართებაში, 2012 წლის ოქტომბერთან შედარებით საქართველოში მდგომარეობა არ შეცვლილა ან გაუარესდა.
უფრო კონკრეტულად, შეკითხვაზე 2012 წლის ოქტომბერთან შედარებით როგორც შეიცვალა მდგომარეობა საქართველოში: სამუშაო ადგილებთან მიმართებაში გამოკითხულთა 4% აცხადებს, რომ გაუმჯობესდა; 47%-ს აზრით არ შეცვლილა, 45%-ის შეფასებით კი – გაუარესდა. დანარჩენებმა აირჩია კატეგორია "არ ვიცი" ან პასუხიგან თავი შეიკავა.
თუმცა, გამოკითხულთა უმეტესობის აზრით, ორი წლის შემდეგ საქართველოში დღევანდელთან შედარებით უკეთესი მდგომარეობა იქნება.
შეკითხვაზე – როცა საქართველოს მომავალზე ფიქრობთ, თქვენი აზრით, რა მდგომარეობა იქნება 2 წლის შემდეგ" – რესპონდენტთა 33%-მა განაცხადა, რომ დღევანდელთან შედარებით უკეთესი მდგომარეობა იქნება, 7% მიიჩნევს, რომ ყველაფერი კარგად იქნება, 27%-ის აზრით, არაფერი შეიცვლება, 13%-ს მოლოდინი აქვს, რომ დღევანდელთან შედარებით უარესი მდგომარეობა იქნება, 2% კიდევ უფრო კატეგორიულია და ფიქრობს, რომ ყველაფერი ცუდად იქნება, 18%-მა კი შეკითხვაზე პასუხი არ იცის.
რაც შეეხება იმას, თუ როგორი მიმართულებით ვითარდება საქართველო, გამოკითხულთა 23%-ს შეფასებით, ქვეყანა სწორი მიმართულებით მიდის, 34%-ის აზრით, საქართველო საერთოდ არ იცვლება, 37% კი მიიჩნევს, რომ ქვეყანა არასწორი მიმართულებით ვითარდება.
კიდევ ერთი საკითხი, რასაც კვლევაში მნიშვნელოვვანი ადგილი უჭირავს, სიღარიბე და ფასების ზრდაა. ფასების ზრდასთან დაკავშირებით, გამოკითხულთა 1%-ის აზრით მდგომარეობა გაუმჯობესებულია, 8%-ის შეფასებით არ შეცვლილა, 90% კი მიიჩნევს, რომ ვითარება გაუარესდა.
სიღარიბე: 3%-ის აზრით მდგომარეობა გაუმჯობესებულია, 39%-ის აზრით – არ შეცვლილა, 56%-ის შეფასებით გაუარესდა.
ტერიტორიული მთლიანობა: 1% – გაუმჯობესდა, 74% – არ შეცვლილა, 21% – გაუარესდა. ხელმისაწვდომი ჯანდაცვა: 56% – გაუმჯობესდა, 26% – არ შეცვლილა, 14% – გაუარესდა. განათლება: 26% – გაუმჯობესდა, 51% – არ შეცვლილა, 9% – გაუარესდა. სასამართლო სისტემა: 18% – გაუმჯობესდა, 43% – არ შეცვლილა, 12% – გაუარესდა. სიტყვის თავისუფლება: 43% – გაუმჯობესდა, 39% – არ შეცვლილა, – 9% გაუარესდა.
კვლევა 27 მარტიდან 19 აპრილის პერიოდში ჩატარდა. კვლევის ფარგლებში 4 360 რესპოდენტი შერჩევითი პრინციპით გამოიკითხა.
