ოზურგეთის მუნიციპალიტეტის გამგეობაში ახლახან უმნიშვნელოვანესი პრეზენტაცია შედგა, რომელიც ოზურგეთის მუნიციპალიტეტის ხელმძღვანელობამ და "კავკასიის გენეტიკამ" ურთიერთშეთანხმებით მიაღწიეს.
სტუმრები _ კავკასიის გენეტიკის დირექტორი თამარ ყაჭაშვილი, გენერალური მენეჯერი დიმიტრი კვირიკაშვილი და მარკეტინგის და პიარის მენეჯერი სანდრო საყვარელიძე ოზურგეთის მუნიციპალიტეტში მოღვაწე სოფლის მეურნეობის დარგის სპეციალისტებს შეხვდნენ. საკითხი ღორების ხელოვნური განაყოფიერების დანერგვას შეეხებოდა.
პრეზენტაცია გახსნა ოზურგეთის მუნიციპალიტეტის სოფლის მეურნეობის განყოფილების ხელმძღვანელმა გიგა ხარაბაძემ. მან ისაუბრა, თუ როგორ შეუქმნა უდიდესი პრობლემა ჩვენს მეცხოველეებს რამდენიმე წლის წინ ქვეყანაში გავრცელებულმა ღორის ჭირმა. ამიტომ დარგის აღდგენა სასიცოცხლოდ აუცილებელი გახდა.
შეხვედრის მონაწილეებმა ისაუბრეს მნიშვნელოვანი ფაქტის შესახებ, რომ ოზურგეთის ა(ა)იპ სოფლის მეურნეობის ცენტრის ბაზაზე შეიქმნა სადემონსტრაციო ნაკვეთი, სადაც სერიოზული სამუშაოები ტარდება და იქ გამოყვანილი ნებისმიერი ჯიში ხელმისაწვდომი გახდება მოსახლეობისთვის.
შეხვედრის ინიციატორმა, ოზურგეთის მუნიციპალიტეტის გამგებელმა მერაბ ჭანუყვაძემ თავის გამოსვლაში განმარტა, რომ რაც აქამდე საველე პირობებში კეთდებოდა, იმ საქმეს ამიერიდან კარგად ორგანიზებული ბაზა ექმნება: _ სიტყვიდან გადავედით საქმეზე, თამაზ კილაძეს შევუქმენით პირობები, რომ მან ამჯერად მეღორეობის დარგში მიაღწიოს ჩვეულ წარმატებას, _ თქვა მან.
შეხვედრის დასასრულს, შედგა მემორანდუმის გაფორმების ცერემონიალი. ოზურგეთის მუნიციპალიტეტის გამგებელმა მერაბ ჭანუყვაძემ და სანაშენე საქმის და ხელოვნური განაყოფიერების ცენტრის _ "კავკასიის გენეტიკა", დირექტორმა თამარ ყაჭაშვილმა ხელი მოაწერეს მემორანდუმს ურთიერთანამშრომლობის შესახებ.
