ლანჩხუთის "გურიამ" დღეიდან ახალი სეზონისთვის მზადება გრიგოლეთში გააგრძელა. აქამდე კლუბი თბილისში ემზადებოდა არასრული შემადგენლობით და სამედიცინო შემოწმების გავლის შემდგომ, კახა გოგიაჩიშვილმა შეგირდები ზღვისპირა ზოლში სავარჯიშოდ იხმო, რა თქმა უნდა, გაფართოებული შემადგენლობით.
"ვინაიდან კლუბის საწვრთნელ ბაზაზე სარემონტო სამუშაოები მიმდინარეობს და კომპლექსი სრულ მზადყოფნაში რამდენიმე თვეში იქნება, მანამდე გუნდი ბაზის ახლომდებარე კერძო სახლში დაბანაკდება და სავარჯიშოდ ბაზის სტადიონს გამოიყენებს მხოლოდ" – გაგვიცხადა კლუბის ფინანსურმა დირექტორმა თენგიზ კიკვაძემ.
მანვე გვაუწყა, რომ ლიცენზირების საჯარიმო თანხა ორშაბათს უკვე გადაირიცხა ფეხბურთის ფედერაციის ანგარიშზე და კლუბის ახალ სეზონში მონაწილეობის საკითხი დადებითად არის გადაჭრილი.
"გურია" გასული სეზონის ძირითადი მოთამაშეების დიდმა ნაწილმა დატოვა. ამათგან გაბრიელ თებიძე, ჯემალ გოგიაშვილი, გიორგი მჭედლიშვილი და ბიძინა ცინცაძე "სამტრედიაში" გააგრძელებენ კარიერას. ალექსი ბენაშვილი -თბილისის "ლოკომოტივში" გადავიდა, გიგა ჭეიშვილი და ლევან ინგოროყვა ქობულეთის "შუქურაში", ხოლო ვილი ისიანი – ბოლნისის "სიონში". კლუბი ასევე დატოვეს ვაჟა მათიაშვილმა და კოკა ღაღანიძემაც.
ამ ეტაპზე შეკრებაზე არც ერთ უკრაინელი ლეგიონერი არ ჩანს, თუმცა, გამორიცხული არაა უახლოეს დღეებში, თუ საჭიროება იქნება, ხელმძღვანელობამ კლუბში რამდენიმე უცხოელი ფეხბურთელი მოიწვიოს.
ძველი შემადგენლობიდან გუნდში დარჩნენ: ალეკო კოშკაძე, თორნიკე მოსიაშვილი, ერეკლე კილაძე, კობა შალამბერიძე, შოთა გაბრიჩიძე, ვანო წილოსანი, მიხეილ გოგუაძე და რატი იმერლიშვილი. კლუბში რამდენიმე ახალწვეულიც ვარჯიშობს: მათ შორის თბილისის "დინამოს" ექს – გოლკიპერი ნიკა დაუშვილი, ლანჩხუთელთათვის კარგად ნაცნობი თენგიზ ჩიკვილაძე და დავით გელაშვილი ( ორივე ქუთაისის "ტორპედოდან"), ბექა ზაქრაძე, ნიკა მაისურაძე ( ორივე თბილისის "ვიტ ჯორჯია"), შოთა ჯიქია (ფოთის "კოლხეთი"), დათა ციცხვაია, სერგო ორბელაძე ( ორივე მარტვილის "მერანი"), კოტე ხიზანეიშვილი (რუსთავის "მეტალურგი") და ლაშა მჭედლიშვილი ("ზესტაფონი"). თუმცა, ვინ დარჩება გუნდში და ვინ არა, ეს მთავარი მწვრთნელის გადასაწყვეტია და სავარაუდოდ, კახა გოგიჩაიშვილი საბოლოო შემადგენლობას რამდენიმე დღეში დაასახელებს.
