ლანჩხუთის მუნიციპალიტეტის გამგებლის ყოფილი პირველი მოადგილე ვახტანგ ზენაიშვილი "გურია ნიუსში" გამოქვეყნებულ ლანჩხუთის მუნიციპალიტეტის გამგებლის ზაზა ურუშაძის და გამგეობის იურისტის, შოთა ჩაგუნავას კომენტარებს ეხმაურება.
"12 ოქტომბერს გაიმართა სასამართლო სხდომა, რომელმაც ნაწილობრივ დააკმაყოფილა ჩემი მოთხოვნა და დაავალდებულა გამგეობა წარედგინა სასამართლოსთვის დაკავებული თანამდებობიდან ჩემი გათავისუფლების საფუძველი. გამგებელი ზაზა ურუშაძე და მისი წარმომადგენელი სასამართლოში, იურიდიული სამსახურის უფროსი, შოთა ჩაგუნავა სასტიკი წინააღმდეგნი არიან სასამართლოს და საზოგადოებას გააცნონ გათავისუფლების მიზეზი და საფუძველი.
ოზურგეთის რაიონული სასამართლოს მოსამართლემ ბიძინა სტურუამ გამგეობის წარმომადგენელს უთხრა, რომ ისინი ადეკვატურად არ კითხულობდნენ კანონს. მართალია თქვა მან, გამგებელს დანიშვნისა და მოხსნის უფლება აქვს, მაგრამ არა დაუსაბუთებლად, სათანადო მიზეზისა და საფუძვლის გარეშე და რომ ეს ასეა, ამას საქართველოს კონსტიტუცია ამბობსო და შეაბამისი მუხლიც მიუთითა.
მოსამართლემ კითხვით მიმართა შ.ჩაგუნავას: მაჩვენეთ, იმ მუხლებში, რომლითაც გამგებელმა მისი მოადგილის გათავისუფლებისას იხელმძღვანელა, სად წერია, რომ ყოველგვარი მოტივაციის გარეშე შეუძლია ასეთი გადაწყვეტილების მიღებაო. ასეთი უფლება რომ გააჩნდეს გამგებელსო, დასძინა, ამის შესახებ გარკვევით ეწერებოდა თვითმმართველობის კანონშიო. ბუნებრივია ჩაგუნავამ მსგავსი ვერაფერი მიუთითა. იგი კვლავ, კანონის მათთვის სასურველ ინტერპრეტაციას დაეყრდნო და თქვა: გამგებელს საფუძვლის გარეშეც შეუძლია გაათავისუფლოსო… ბატონებს ურუშაძეს და ჩაგუნავას მინდა ვუთხრა (აქ "ვუთხრას" მაგივრად მინდოდა სიტყვა "შევახსენო" დამეწერა, მაგრამ უადგილოდ მეჩვენა–რაც არ იციან, აბა იმას როგორ შეახსენებ–ვ.ზ.), რომ კანონს არა მხოლოდ მუხლებად გაწერილი მშრალი იურიდიული ტერმინები ქმნის, არამედ მისი სულისკვეთებაც. ამ სულისკვეთების დანახვა და შეგრძნება ყველას არ შეუძლია, ასეთებისთვის კანონი ნებართვების და აკრძალვების გროვაა მხოლოდ და ამ ლაბირინთიდან "მართალი სამართლის" გამორკვევა უჭირთ ."ნიჭი, ძამიკო, ნიჭი"! სამართლის სულის აღმოჩენას ნიჭი უნდა. სწორედ ამიტომ უკვირთ, ვერ იგებენ და არ ეთანხმებიან ზოგიერთები მოსამართლის გადაწყვეტილებას. ვთქვათ, ისე წავიკითხეთ კანონი, როგორც ამას გამგებელი და მისი იურისტი კითხულობენ. რა გამოდის ამ შეთხვევაში?"!- ამბობს ზენაიშვილი.
მისივე თქმით, გამოდის ის, რომ "გამგებლის მოადგილეები და სამსახურის უფროსები ერთგვარი პარიათა (მიუკარებელთა) კასტა ვართ, არც კონსტიტუცია გვიცავს, არც შრომის კოდექსი, არც კანონი საჯარო მოხელის შესახებ, არც ადამიანის უფლებათა საერთაშორისო ნორმები. გაუფრთხილებლად, მოულოდნელად, კომპენსაციის გარეშე დარჩები უმუშევარი ისე, არავინ იქნება ვალდებული აგიხსნას – რატომ?!
_ გამოდის ის, რომ ჩვენ თანამშრომლები კი არა, მძევლები ვყოფილვართ. ვინაიდან ურუშაძე–ჩაგუნავასეული გააზრება აღნიშნული კანონისა სამოხელეო ნების პარალიზებას იწვევს, ასუსტებს ინიციატივებს, ზღუდავს ხელქვეითის უნარს ზემდგომთან ზედმატი შეთანხმებების გარეშე მიიღოს ესა თუ ის გადაწყვეტილება. შეუძლებელი ხდება მართებული რჩევა მივცეთ ხელმძღვანელს, შავზე შავი ვთქვათ, თეთრზე თეთრი, არ შევასრულოთ უმართებულო მითითებები.
ხომ შეიძლება კამათის, განსხვავებული აზრის გამოთქმის დროს (მითუმეტეს თუ ხელქვეითის აზრი საკითხის გადაწყვეტის უკეთეს ხედვას წარმოადგენს) ხელმძღვანელს რამე ეწყინოს და მოგჭამა ჭირი, ისე აღმოჩნდები ქუჩში, არც კი გეცოდინება რა დააშავე. აი, ამას ნიშნავს კანონის ურუშაძისეული გაგება და თუ ეს "გაგება" სწორია, თუ პარლამენტმა აღნიშნულ კანონში სწორედ ასეთი შინაარსი ჩადო, ღირსეული ხელმძღვანელი და თავმოყვარე იურისტი ასეთ "უსამართლო კანონს" პირადი და პოლიტიკური ანგარიშსწორებისთვის კი არ უნდა იყენებდეს, არამედ ხმალამოღებული უნდა იბრძოდეს მის გასაუქმებლად.
მაინც რატომ ჭირვეულობს ბატონი გამგებელი, რატომ "არ უმხელს" სასამართლოს გათავისფლების მიზეზს?! ბოლოსდაბოლოს კანონით რომც არ ევალებოდეს ასეთი რამ, საზოგადოების პატივისცემის გამო მაინც ვიტყვი: ამიტომ და ამიტომ გავათავისუფლეო! მაგრამ არა, მაგრამ ვერა! რადგან მშვენივრად იცის პოლიტიკური მოტივით ("თავისუფალი დემოკრატი" რომ ხარ ან პარტია დატოვე, ან თანამდებობაო–ვ.ზ.)ადამიანის სამსახურიდან გათავისუფლება სერიოზული დარღვევაა. სხვა საფუძველი კი გათავისუფლებისა, რომელიც საზოგადობისთვის და სასამართლოსთვის მისაღები იქნება, უბრალოდ არ არსებობს. ხელოვნურად რაიმეს გამოგონება ძნელიცაა და დაგვიანებულიც." _ თქვა ზენაიშვილმა.
"მსგავსი რამ კანონში არ წერია და ჩვენ ამ გადაწყვეტილებას გავასაჩივრებთ. მოსამართლემ რა იცის, მე რა ვიცი?! მე ის ვიცი, რომ კანონს იღებს პარლამენტი და იმ კანონში არ წერია, რომ მსგავსი რამის დავალდებულება შეუძლია ვინმეს ჩემთვის," _ ასეთი კომენტარი ლანჩხუთის მუნიციპალიტეტის გამგებელმა, ზაზა ურუშაძემ "გურია ნიუსთან" საუბრის დროს, სასამართლოს გადაწყვეტილების შემდეგ გააკეთა.
"მოსამართლეს აქვს პოზიცია, რომელიც მან გამოხატა. ჩვენ მოსამართლის გადაწყვეტილებას არ ვეთანხმებით. ორგანული კანონის აბსოლუტურად საპირისპიროს განმარტავს. ორგანული კანონის განმარტება იყო მისგან არასწორი. ამ შემთხვევაში გამგებელი ექსკლუზიური უფლებებით არის აღჭურვილი და არ ჭირდებოდა დასაბუთება, რისთვის გაათავისუფლა, გამგებლის პირველი მოადგილე ვახტანგ ზენაიშვილი."- ეს კი შოთა ჩაგუნავას კომენტარია, რაც ოზურგეთის რაიონული სასამართლოში გააკეთა.
