საცხოვრებელი სახლი, სამი მიწის ნაკვეთი, ორი არასაცხოვრებელი ფართი და ავტოფარეხი – გარემოსა და ბუნებრივი რესურსების დაცვის მინისტრის მოვალეობის შემსრულებლის გიგლა აგულაშვილის ოჯახს ეკუთვნის.
ამის შესახებ აგულაშვილის ქონებრივ დეკლარაციაშია აღნიშნული, რომელიც მან 2015 წლის 22 დეკემბერს შეავსო.
კერძოდ, წავკისში მდებარე 1000.00 კვ.მ-ის ფართობის, საგარეჯშო, ბადიაურში მდებარე 4402.00 კვ.მ-ისა და ამავე სოფელში მდებარე 880.26 კვ.მ-ის ფართობის მიწის ნაკვეთები გიგლა აგულაშვილის საკუთრებაშია.
აგულაშვილი ასევე ფლობს თბილისი, კეკელიძის ქუჩაზე 49.91 კვ.მ -ის არასაცხოვრებელ ფართს; ასევე, თბილისში, ნუცუბიძის ქუჩაზე მდებარე 268.48 კვ.მ -ის არასაცხოვრებელი ფართის თანამფლობელია (მეწილეები გიორგი ათაბეგაშვილი, ბესიკ ჭეჟიაა).
თბილისში, კეკელიძის ქუჩაზე მდებარე 100.00 კვ.მ-ის საცხოვრებელი სახლი აგულაშვილის მეუღლეს, ქეთევან გილაშვილს ეკუთვნის.
ხოლო ამავე მისამართზე მდებარე 30.00 კვ.მ-ის ფართობის ავტოფარეხი გიგლა აგულაშვილის საკუთრებაშია.
გარდა უძრავი ქონებისა, ქეთევან გილაშვილი ასევე ფლობს 2008 წელს გამოშვებულ მსუბუქ ავტომანქანა Suzuki Grand Vitara-ს.
რაც შეეხება მინისტრის მოვალეობის შემსრულებლის ოჯახის ფინანსურ მდგომარეობას, დეკლარაციაში აღნიშნულია, რომ 2014 წის განმავლობაში ოჯახის საერთო შემოსავალი მხოლოდ გიგლა აგულაშვილის მიერ საქართველოს პარლამენტის აგრარულ საკითხთა კომიტეტის თავმჯდომარის თანამდებობისთვის აღებული ხელფასი – 66465.00 ლარი და სასოფლო სამეურნეო პროდუქციის რეალიზაციიდან მირებული 21 000 ლარი იყო.
დეკლარაციის შევსების მომენტში კი, გიგლა აგულაშვილს ბანკი "ქართუს" ვიზა პლატინუმზე 19 498.69 ლარი, "თი–ბი–სი ბანკის" ვიზა კლასიკზე 21.92 დოლარი, "თი–ბი–სი ბანკის" მიმდინარე ანგარიშზე კი – 33.76 ლარი ჰქონდა.
შვილს, გიორგი აგულაშვილს "ლიბერთი ბანკის" სახელფასო ანგარიშზე 980.00 ლარი ჰქონდა;
მეუღლეს, ქეთევან გილაშვილს "თი–ბი–სი ბანკის" ვიზა კლასიკზე 49.45 დოლარი, ხოლო "ლიბერთი ბანკი" სახელფასო ანგარიშზე 9.21 ლარი ერიცხებოდა.
გარდა ამისა, ოჯახს ნაღდი ფულის სახით 65 ათასი დოლარი ჰქონდა. როგორც "გურია ნიუსთან" საუბრისას გიგლა აგულაშვილმა განმარტა, თანხა ოჯახმა ბინის რეალიზაციიდან მიიღო.
დეკლარაციის შევსების მომენტში 5000-5000 დოლარი ჰქონდათ გიგლა, მათე, გიორგი აგულაშვილებსა და ქეთევან გილაშვილს, ხოლო ლუკა აგულაშვილს 45 ათასი დოლარი.
როგორც აგულაშვილი ამბობს, ლუკა აგულაშვილი წელს სკოლას ამთავრებს და, სავარაუდოდ, სწავლას უცხოეთში გააგრძელებს.
"შესაბამისად, ოჯახში შვილების სწავლა-განათლება პრიორიტეტია და ეს გადაწყვეტილებაც აქედან გამომდინარეობს. ამიტომ გავანაწილეთ არასამართლიანად ოჯახის წევრებში ბინის რეალიზაციით მიღებული შემოსავალი", _ განმარტა აგულაშვილმა "გურია ნიუსთან" საუბრისას.
მისივე თქმით, ბინის რეალიზაციიდან მიღებული თანხა, რომელიც ახლა არ არის დეკლარაციის შემოსავლის გრაფაში ასახული, 2015 წლის დეკლარაციაში აისახება.
"დეკლარაციაში შემოსავალ-გასავლის გრაფაში აისახება გასული წლის მონაცემები. შესაბამისად, ბინის რეალიზაციით მიღებული შემოსავალი აისახება, მომდევნო წლის დეკლარაციაში. მეც ისევე, როგორც თქვენ, ვფიქრობდი და ასახული მქონდა მიმდინარე დეკლარაციაში ეს ინფორმაცია, მაგრამ ბიუროს თანამშრომლების რეკომენდაციით გავასწორე", _ აღნიშნავს აგულაშვილი.
რაც შეეხება დეკლარაციაში აღნიშნულს, რომ ფართის დაზუსტების შემდეგ ნასყიდობის ხელშეკრულებაში შევიდა ცვლილება, რომლის შემდეგაც აგულაშვილს 30 612.50 ლარი დაუბრუნდა, მინისტრის მოვალეობის შემსრულებელი განმარტავს, რომ "ნასყიდობის ხელშეკრულებით სამმა პირმა შევიძინეთ 300 კვადრატული მეტრი უძრავი ქონება და შესაბამისი თანხაც გადავიხადეთ".
"აზომვისას დადგინდა, რომ ფართი ნაკლები იყო. შესაბამისად, მხარეებმა მოვილაპარაკეთ და გამყიდველმა დაგვიბრუნა ზედმეტად გადახდილი თანხა. ეს შემოსავალიც აისახება მომდევნო წლის დეკლარაციაში", _ ამბობს აგულაშვილი.
კიდევ ერთი დაზუსტება, რაზეც აგულაშვილმა "გურია ნიუსთან" ისაუბრა – კოალიცია "ქართული ოცნება – დემოკრატიული საქართველოს" საარჩევნო ფონდში გაკეთებული 3000.00-ლარიანი შემოწირულობაა.
აგულაშვილი განმარტავს, რომ "ეს გასავალიც მომდევნო წლის დეკლარაციაში აისახება".
გარდა ამისა, მინისტრის დეკლარაციაში აღნიშნულია, რომ გიგლა აგულაშვილის სახელზე 17600.00-ლარიანი იპოთეკის ხელშეკრულებაა დადებული, რისთვისაც 3480.00 ლარის გასავალი ჰქონდა.
რაც შეეხება აგულაშვილის ოჯახის 2014 წლის გასავალს, დეკლარაციის მიხედვით, საერთო თანხამ 30 500 ლარი და 4832.32 დოლარი შეადგინა.
აგულაშვილი ამასთან დაკავშირებითაც განმარტავს, რომ ორი შვილი საქართველოში სწავლობს, ხოლო მესამე უცხოეთში სწავლობდა (წელს დაამთავრა სწავლა და დაბრუნდა ქვეყანაში) ამიტომ მისი სწავლის საფასური დოლარში გადაიხადეს.
დეკლარაციის მიხედვით, გიგლა აგულაშვილს სასოფლო-სამეურნეო პროდუქციის რეალიზაციიდან 21000.00 ლარის შემოსავალი აქვს მიღებული, რომელიც, მისივე განმარტებით, ხორბლის გაყიდვიდან მიიღო.
