ქალაქ ოზურგეთში, ყოფილი საავადმყოფოს შენობაში 51 უსახლკარო ოჯახს საცხოვრებელი ფართი გადასცეს.
ქალაქ ოზურგეთის მერმა, ბეგლარ სიორიძემ უბინაოებს გასაღები პირადად გადასცა.
“მარტოხელა ქალი ვარ, ვზრდი შვილიშვილს. ქირით ვცხოვრობდი, მაგრამ რადგან ვერ მოვახერხე ორი თვის ფულის გადახდა, წამოვედი და შემოვედი ყოფილი საავამდყოფოს შენობაში, მეტი გზა არ მქონდა.
ერთ საწოლზე ორი ადამიანი ვიძინებდით. დამეწვა სახლი, შემდეგ გარდამეცვალა მეუღლე. 12 წლის განმავლობაში არ დამიტოვებია არავინ, ყველგან დავდიოდი და ვითხოვდი დახმარებას.
სოციალურ დახმარებას არ ვიღებ, არ მოხერხდა არანაირად _ რა აღმოაჩინეს ასეთი ჩემთან, ვერ გავიგე, სამსახური მე არ მაქვს და შემოსავალი. 18 წელი ვმუშაობდი ექთნად და შემდეგ გამათავისუფლეს _ 54 წლის ვიყავი და ასაკიანი ხარო, მითხრეს. ეს რაც ახლა ხდება ნამდვილად დასაფასებელია, როგორც იქნა საკუთარი ჭერი მექნება და ბინის ქირის გამოც არ ვინერვიულებ, – გვითხრა მაყვალა ბურკაძემ.
51 ოჯახში მოხვდა ნადია ბალდა. ის ბოშაა და ქალაქში ყველა იცნობს.
_ ახალ ბინაში მეუღლესთან და შვილთან ერთად ვიცხოვრებ, ასეთი ბედნიერი არასდროს ვყოფილვარ, – თქვა ჩვენთან საუბრის დროს ნადია ბალდამ.
უსახლკაროებისთვის ბინის გადაცემის გურიის გუბენატორი გია სალუქვაძე, პარლამენტარი ზვიად კვაჭანტირაძე და ადგილობრივი ხელისუფლების წარმომადგენლები ესწრებოდნენ.
ქალაქის მერმა, ბეგლარ სიორიძემ ახალმობინადრეობა და შობა-ახალი წელი მიულოცა იქ მყოფ ადამიანებს.
“ასეთი ბედნიერი დღე ჩემი მერობის პერიოდში არ მქონია. რაც მთავარია პირობა შევასრულე და ქალაქში არცერთი უსახლკარო აღარ გვყავს.“ – თქვა ბეგლარ სიორიძემ.
შენობის სარეაბილიტაციო სამუშაოებმა 407 508 ლარი შეადგინა.
