პროკურორი, რომლის შვილის პარიზში ცხოვრების ხარჯებიც თბილისის მერიამ სოციალური დახმარების ბიუჯეტიდან დაფარა, მთავარი პროკურატურიდან შემოსავალის სახით ყოველწლიურად 38 560 ლარს იღებს. თუმცა, დედაქალაქის მერიაში და მთავარ პროკურატურაში აღნიშნულთან დაკავშირებით განცხადებას ჯერჯერობით არ აკეთებენ.
შეგახსენებთ, რომ "ნაციონალური მოძრაობის" ინფორმაციით, თბილისის მერიამ ქალაქის ბიუჯეტიდან ისანი-სამგორის რაიონული პროკურორის, ლეონიდ გერგედავას შვილს პარიზში სწავლის მიზნით, ცხოვრების ხარჯები დაუფინანსა.
როგორც "ნაციონალური მოძრაობის" ერთ-ერთი ლიდერი, ნიკა მელია აცხადებს, შესაბამისი ბრძანება თბილისის მერის, დავით ნარმანიას სახელზეა გამოცემული.
"დავით ნარმანიამ გამოსცა ბრძანება და სოციალური დახმარებისთვის განკუთვნილი მუხლიდან გამოყო 5 400 ათასი ლარი. ეს ის მუხლია, საიდანაც უნდა ფინანსდებოდნენ სოციალურად დაუცველები, უსახლკაროები და ა.შ. ეს არის ცინიზმი და უნდა ახსნას ნარმანიამ, რამ გაამწარა და რამ გააკეთებინა ეს სისულელე. ისანი–სამგორის რაიონული პროკურატურის ხელმძღვანელი ბატონი გერგედავა აუცილებლად უნდა გათავისუფლდეს დაკავებული თანამდებობიდან. ", _ განაცხადა მელიამ.
როგორც მელია განმარტავს, ნარმანიას მიერ, 2015 წლის სექტემბერში გამოცემული ბრძანებულებით გამოყოფილი თანხა გერგედავას შვილის საზღვარგარეთ – საფრანგეთში სწავლას და საცხოვრებელი ხარჯების ანაზღაურებას უნდა მოხმარდეს, "მისი ოჯახის მძიმე სოციალურ-ეკონომიური მდგომარეობის გათვალისწინებით".
მისივე თქმით, 2015 წელს თბილისის მერიამ/გამგეობებმა უამრავ სტუდენტს უარი უთხრა სწავლის დაფინანსებაზე (მათ შორის სოციალურად დაუცველ სტუდენტებს) და მათ სტუდენტის სტატუსი შეუჩერდათ, შესაბამისად, ისინი საქართველოში რეგისტრირებულ უმაღლეს სასწავლებლებში განათლებას ვეღარ იღებენ.
თბილისის მერიაში და მთავარ პროკურატურაში აღნიშნულთან დაკავშირებით კომენტარს ჯერჯერობით არ აკეთებენ. როგორც "გურია ნიუსს" უთხრეს, კომენტარის გაკეთებას თუ გადაწყვეტენ, შეგვატყობინებენ.
აღსანიშნავია, რომ საჯარო სამსახურის ბიუროს ვებ-გვერდზე განთავსებული, 2015 წლის 14 აგვისტოს შევსებული დეკლარაციის თანახმად, 38 560 ლარი იყო.
დეკლარაციაში აღნიშნულია, რომ მერიის მიერ თანხის გადარიცხვამდე ერთი თვით ადრე, ლეონიდ გერგედავას ნაღდი ფულის სახით, 4900.00 ლარი და 1000 ევრო ჰქონდა. მის საბანკო ანგარიშზე კი, 860 ლარი ირიცხებოდა. გარდა ამისა, დეკლარაციაში აღნიშნულია, რომ თამარ გერგედავას, ვისი სწავლის საფასურიც მერიამ დააფინანსა, სახელფასო ანგარიშზე "ლიბერთი ბანკში" 457.00 ლარი ჰქონდა. დედას, ასმათ ლოგუას კი, ამავე ბანკის სახელფასო ანგარიშზე 648.00 ლარი ერიცხებოდა.
აღსანიშნავია ისიც, რომ ლეონიდ გერგედავას წინა წელსაც ანალოგიური შემოსავალი აქვს მიღებული ამის შესახებ კი, 2014 წლის ქონებრივ დეკლარაციაშია აღნიშნული.
დეკლარაციის მიხედვით, ლეონიდ გერგედავას 100%-იან საკუთრებაშია ბინა თბილისში, ს.ჩიქოვანის ქუჩაზე, რომლის ფართობი – 168.00 კვ.მ-ია. ლეონიდ გერგედავა ასევე ფლობს 1260.00 კვ.მ-ის ფართობის მიწის ნაკვეთს დაბა ლიკანში.
დეკლარაციის მიხედვით, ლეონიდ გერგედავას სახელზე 50721.00-დოლარიანი იპოთეკური ხელშეკრულებაა (ხელშეკრულების ვადები 31/01/2011 – 31/01/2024) რომლის პროცენტის დასაფარადაც, 2014 წელს 8300.00 დოლარი გადაუხდია.
"გურია ნიუსი" ცდილობს ლეონიდ გერგედავასთან დაკავშირებას. დამატებით ინფორმაციას მოპოვებისთანავე შემოგთავაზებთ.
ამავე თემაზე:
პროკურორის შვილის სწავლის დაფინანსების საქმეზე მერიამ მოკვლევა დაიწყო
პროკურორი გერგედავა ამტკიცებს, რომ მერიას თანხა უკან დაუბრუნა
სოციალური სამსახურის თანამშრომელმა ნარმანია შეცდომაში შეიყვანა_ რას აცხადებენ მერიაში
