ქალაქ ოზურგეთის მუნიციპალიტეტის მერი ბეგლარ სიორიძე საქართველოს ადგილობრივი თვითმმართველობების წარმომადგენლობის ვიზიტის ფარგლებში ბრიუსელში იმყოფებოდა.
დაგეგმილი ვიზიტი ბრიუსელში ტერორისტული აქტის გახორციელებას დაემთხვა, თუმცა, ნატოს შტაბ-ბინაში დღის წესრიგით გათვალისწინებული ბრიფინგი და დისკუსიები მაინც შედგა.
ქალაქ ოზურგეთის მერი დისკუსიაზე, რომელსაც ნატოს გენერალური მდივნის სპეციალური წარმომადგენელი კავკასიასა და ცენტრალურ აზიაში, ჯეიმს აპატურაი უძღვებოდა, სიტყვით გამოვიდა. სადისკუსიო თემა ნატო-საქართველოს ურთიერთობებს ეხებოდა:
'' მე საქართველოს იმ რეგიონიდან გახლავართ, რომელიც ქვეყანაში პოლიტიკური პროცესების მიმართ ყოველთვის ყველაზე დიდ ინტერესს ავლენდა. შეხვედრებზე, სადაც მე მოსახლეობას ვხვდები, სხვადასხვა ადგილობრივი მნიშვნელობის საკითხთან ერთად მთავარი შეკითხვა ასეთია: ''როდის გავწევრიანდებით ნატოში?'' აქედან და ბევრი სხვა ფაქტორიდან გამომდინარე ვთვლი, რომ ნატოში ინტეგრაცია არა მხოლოდ საქართველოს ხელისუფლების პრიორიტეტია, არამედ ამის მომხრე თავად საზოგადოება, რიგითი მოქალაქეები არიან.
ის სამწუხარო ფაქტი, რომლის მომსწრენიც გავხდით, რომელმაც მსოფლიო შეძრა და უდანაშაულო მოქალაქეების სიცოცხლე იმსხვერპლა, თითოეული აქ მყოფი დელეგატის ტკივილია. როცა აეროპორტის ის საკონტროლო პუნქტი აფეთქდა, რომელიც ჩვენ რამდენიმე საათის წინ გავიარეთ, პირველი ადამიანური ემოცია, რამაც გამიელვა, იყო, რომ ჩვენ გადავრჩით. თუმცა გააზრების შემდეგ მივხვდი, რომ არა, ჩვენ არცერთი არ გადავრჩენილვართ, რადგან ტერორიზმი ადამიანებს, როგორც ფიზიკურად, ასევე, სულიერად ანადგურებს.
ყველამ უნდა გავიაზროთ, რომ ეს ბოროტება ყველა ჩვენგანის წინააღმდეგ არის მომართული და მის წინააღმდეგ მთელი მსოფლიო უნდა გაერთიანდეს. ვუსამძიმრებ ბელგიელ ერს და ვუთანაგრძნობ თითოეული გარდაცვლილის ოჯახს," _ განაცხადა ბეგლარ სიორიძემ.
ბრიუსელის მთავარ მოედანზე შეკრებილ მოქალაქეებს, რომლებიც ტერორიზმის წინააღმდეგ აქციას მართავდნენ, ქართული დელეგაცია შეხვედრების შემდეგ ყოველდღე უერთდებოდა.
(R)
