პიროვნება, ვისზეც ითქვა, რომ თსუ-ში მუშაობს, როგორც ე.წ. ოდეერი ჩვენთან 2015 წლის აგვისტომდე ირიცხებოდა, თუმცა მას შემდეგ ის უბრალოდ კანცლერის მოადგილე იყო, _ ამის შესახებ სახელმწიფო უსაფრთხოების სამსახურის ხელმძღვანელის მოადგილე ლევან იზორიამ პარლამენტში, სამი კომიტეტის გაერთიანებულ სხდომაზე განაცხადა.
იზორიას განმარტებით, აღნიშნული პირი, ვისზეც საუბრობენ, 2015 წლის აგვისტომდე, სუს-ის თანამშრომელთა რიგებში ირიცხებოდა, თუმცა აგვისტოს შემდეგ ის უნივერსიტეტმა დაიტოვა, მაგრამ უსაფრთხოების სამსახურის ფუნქციებს აღარ ასრულებდა.
"ადრე კანონში იყო ასეთი ჩანაწერი, რომ შინაგან საქმეთა მინისტრს შეეძლო ერთპიროვნულად გადაეწყვიტა, თუ ვინ იქნებოდა უსაფრთხოების სამსახურის თანამშრომელი. რეფორმების განხორციელების დღის წესრიგში დავსვით საკითხი იმის შესახებ, რომ მომხდარიყო ამ ინსტიტუტის გაუქმება და საერთაშიროსო პრაქტიკის დანერგვა. შევისწავლეთ დემოკრატიული ქვეყნების გამოცდილება და კვლევის შედეგად ცხადი გახდა, რომ გარკვეული უსაფრთხოების ზომებიდან გამომდინარე, საიდუმლოების ხარისხის უზრუნველყოფის მიზნით, უსაფრთხოების სამსახურს ცალკეულ სახელმწიფო დაწესებულებასა და ზოგჯერ კერძო სტრუქტურებშიც კი, რომლებსაც ქვეყნისთვის სტრატეგიული დანიშნულება აქვს, შესაძლოა თანამშრომელი ჰყოლოდა. როცა ამ ინსტიტუტს ვაყალიბებდით, ორიენტირი გვქონდა ამ პრაქტიკაზე. საკანონმდებლო რეალობიდან გამომდინარე ჩვენთან ასეა, ცალკეულ სტრუქტურებთან ნებაყოფლობითი თანამშრომლობით უნდა განსაზღვრულიყო სუბიექტთა წრე, სადაც იქნებოდა მაღალი რისკი უსაფრთხოების", _ განაცხადა ლევან იზორიამ.
მისივე თქმით, აღნიშნულ სუბიექტთა წრე განისაზღვრა და ამას არა სუს-ის ხელმძღვანელი, არამედ მთავრობა წყვეტს და შესაბამისად, ის გაცილებით მაღალი ლეგიტიმაციის მქონეა.
იზორიას განმარტებით, მთავრობის გადაწყვეტილების შემდეგ უკვე თავად სუბიექტი განსაზღვრავს, უსაფრთხოებიდან გამომდინარე ჰყავდეს თუ არა წარმომადგენელი უსაფრთხოების სამსახურიდან.
"რაც შეეხება უნივერსიტეტებს, ჩვენ კატეგორიულად უარი ვთქვით, რომ საგანმანათლებლო ორგანოში ყოფილიყო უსაფრთხოების სამსახურის წარმომადგენელი, თუმცა ეს იმას არ ნიშნავს, რომ იქაც არ არსებობს გარკვეული საფრთხეები, რაც სახელმწიფო უსაფრთხოებას უკავშირდება. მაგალითად, როცა უცხო ქვეყნიდან, ისეთიდან, სადაც ძალიან მოიკიდა ფეხი ტერორიზმმა, არიან სტუდენტები, საინტერესოა რა მიზნით არიან, რა სპეციფიკით, რა განზრახვებით არიან ჩამოსული. გამომდინარე იქედან, რომ ავტონომიურობის მაღალი ხარისხი აქვს საგანმანათლებლო დაწესებულებას, ჩვენ მივიღეთ პოლიტიკური გადაწყვეტილება, რომ ე.წ. ოდეერი ინსტიტუტებში არ იყოს", _ განაცხადა სუს-ის ხელმძღვანელის მოადგილემ და ბათუმისა და თელავის უნივერსიტეტების აკადემიური პერსონალისა და სტუდენტების განცხადებებსაც გამოეხმაურა, რომ აღნიშნულ სასწავლებლებში ე.წ. ოდეერები მუშაობენ.
"ამ კონკრეტულ პიროვნებაზე, ვისზეც ითქვა, რომ თითქოს აგრძელებს თსუ-ში მუშაობას, როგორც ე.წ. ოდეერი – არასწორია. ის, როგორც ე.წ. ოდეერი, ირიცხებოდა ჩვენთან 2015 წლის აგვისტომდე, თუმცა მას შემდეგ ის უბრალოდ კანცლერის მოადგილე იყო. თუ უნივერსიტეტმა გადაწყვიტა დაეტოვებინა ის მეგობრობის თუ სხვა ურთიერთობიდან გამომდინარე, ეს მისი პრეროგატივა იყო. განცხადებები გაკეთდა ასევე ბათუმის და თელავის უნივერსიტეტებთან დაკავშირებით, იქ ერთ-ერთი არის ჩვენი თანამშრომელი, მაგრამ მას არავითარი შეხება არ აქვს უნივერსიტეტის საქმიანობასთან, ის არის დოქტორანტი. გარწმუნებთ, სუს-საც ჰყავს თანამშრომლები, რომლებიც დისერტაციებს იცავენ და აქვთ აკადემიური ამბიციები, შესაბამისად, ყველას აკადემიურ საქმიანობას ვერ გავაიგივებთ სუს-ის საქმიანობასთან", _ აღნიშნა ლევან იზორიამ.
