ოზურგეთში, კულტურისა და დასვენების პარკი ერთადერთი ადგილია, სადაც გართობა შეიძლება. მიუხედავად ატრაქციონების სიმცირისა, აქ სულ ხალხმრავლობა და პატარების ჟრიამულია. პარკში მისვლა მხოლოდ პატარებს არ უხარიათ _ აქ ყოველდღე შეხვდებით შეყვარებულ წყვილებს, მეგობრებს, მოხუცებს. ერთი სიტყვით, ქალაქ ოზურგეთში კულტურისა და დასვენების პარკი ის ადგილია, სადაც ყველას უხარია მისვლა.
მიუხედავად ამისა, პარკში ბევრი პრობლემაა, რომელიც სასწრაფოდ ითხოვს მოგვარებას. ზამთარში, დიდთოვლობის დროს ჩამონგრეული ყველაზე პოპულარული ატრაქციონის _ავტოდრომის სახურავი დღემდე შეუკეთებელია.
გარდა დაშლილი ატრაქციონისა, ყველაზე თვალშისაცემი საბავშვო ატრაქციონებთან არსებული ელექტროგაყვანილობაა, რომელიც იზოლირების გარეშეა და ყველა ბავშვისთვის ხელმისაწვდომ ადგილზე, პლასტმასის ქილის ნაჭრითაა დაფარული.
_ ჩვენთან სპეციალისტის შტატია, რომელიც მაგ კუთხით მუშაობს. ახლა მიმდინარე რემონტია და ვფიქრობთ, რომ ეს პლასტმასები მეტალით შევცვალოთ, რადგან მუდმივად ხდება ფეხით ამის დაზიანება. შევცვლით, მივლენ, დაამტვრევენ და ასე გრძელდება დიდი ხანია, _ აღნიშნა "გურია ნიუსთან" საუბრისას პარკის დირექტორმა, ინგა დუმბაძემ.
მისივე თქმით, პარკის სარეაბილიტაციო თანხების მოსაზიდად აქტიური სამუშაოები მიმდინარეობს:
_ იყო ასეთი კომპანია _ "შავი ზღვის მარგალიტი", რომელიც გასულ წელს გვესტუმრა და დაგვპირდა, რომ პარკის პროექტსაც გააკეთებდნენ და რეაბილიტაციასაც მოახდენდნენ. დღემდე ველოდებით, თორემ ვფიქრობდით, რომ რაღაცა ზონების რეაბილიტაცია გაგვეკეთებინა. აქ, ფაქტობრივად, მოშლილია ყველაფერი. მთელი რიგი სამუშაოებია ჩასატარებელი და გვაქვს 20 000 ლარი სუბსიდიის სახით, _ ამბობს დუმბაძე.
_ ქალბატონო ინგა, ვინ აგებს პასუხს ბავშვების უსაფრთხოებაზე მაშინ, როცა ელექტროსადენები, შეიძლება ითქვას, რომ მიწაზე ყრია?
_ მართალი ბრძანდებით. თუმცა, ჩვენ გვყავს სპეციალისტი. თუ ბავშვმა დაამტვრია და ხელი მოკიდა, ვერაფერს გავხდებით. მაგ დროს მშობელმა უნდა მიხედოს.
_ ყველა ატრაქციონთან ელექტროგაყვანილობა საიზოლაციო ლენტით არის გადაბმული… ამ დროს იღებთ ბავშვების უსაფრთხოებაზე პასუხისმგებლობას?
_ კი, როგორ არა. ბავშვი თუ დაშავდა, რად გვინდა რამე?! _ აღნიშნა დუმბაძემ, რომლის თქმით, არსებული პრობლემების შესახებ ქალაქის მერს წერილობით რამდენჯერმე აცნობა.
"კულტურისა და დასვენების პარკში ამჟამად ერთ-ერთი ზონის რეაბილიტაცია მიმდინარეობს. თუმცა, პარკი ჩვეულ რეჟიმში მუშაობს, რადგან ტექნიკური თვალსაზრისით, უსაფრთხოების ზომები მთლიანად დაცულია. პარკს ჰყავს აღნიშნული პროფილის მქონე სპეციალისტი, შესაბამისად, გეგმიური შემოწმება-რემონტი უსაფრთხოების მიზნით, პარკში რეგულარულად ტარდება. ასევე, ახლო მომავალში ქალაქის მერია ელოდება დამატებით ფინანსურ სახსრებს პარკში მდებარე ავტოდრომის რეაბილიტაციისთვის, რომელიც დიდთოვლობის დროს დაზიანდა", _ აღნიშნეს ჩვენთან საუბრისას ქალაქ ოზურგეთის მერიის პრესსამსახურში.
აღსანიშნავია, რომ პარკს არც ახალგაზრდები უფრთხილდებიან _ კედლებზე, სკამებზე, ღობეებზე გაკეთებულ წარწერებს, სკამის ჩამომტვრეულ კიდეებს, დამტვრეულ ტირიფის ტოტებს ბევრს ნახავთ. პარკის თანამშრომლები ახალგაზრდებს შეცდომებზე ხშირად უთითებენ და იმის ახსნასაც ცდილობენ, რომ ეს პარკი ყველასია. მიუხედავად ამისა, სარემონტო ამფითეატრის კედლებზე ჩანაწერები ყოველდღიურად მატულობს: დ+გ=შ"; "სალო მიყვარხარ, შენ ჩემი სოცოცხლე ხარ" _ ამ წარწერებთან ასე მინაწერებსაც ნახავთ: "ამის დამწერი უზრდელიცაა!"
