საქართველოში "ყველაზე ცნობილი საბავშვო ბაღი" ჩოხატაურის მუნიციპალიტეტის სოფელ სამებაში მდებარეობს _ მან სახელი გასულ წელს "გურია ნიუსის" ჟურნალისტური გამოძიების შედეგად "გაითქვა".
ჩოხატაურის მუნიციპალიტეტსა და შპს "შემოქმედმშენს" შორის, #160 ხელშეკრულება 2014 წლის 11 ივნისს გაფორმდა.
ხელშეკრულების თანახმად, რომელსაც ხელს გამგებლის მოვალეობის აწ უკვე ყოფილი შემსრულებელი და დღეს გამგებლის მოადგილე თამაზ ჯინჭარაძე აწერს, #1 ბაგა-ბაღის, #2 ბაგა-ბაღის, სოფელ ამაღლების, სოფელ იანეულის და სოფელ სამების საბავშვო ბაღების სარეაბილიტაციო სამუშაოები უნდა გახორციელებულიყო. ამ სამუშაოებისთვის "შემოქმედმშენს" 181 111 ლარი ჰქონდა გამოყოფილი.
აღნიშნული ხელშეკრულების ფარგლებში ჩატარებულ სამუშაოებზე საბოლოო მიღება-ჩაბარების აქტი 2014 წლის 25 აგვისტოს შედგა.
ინსპექტირების ჯგუფმა დაადგინა, რომ #160 ხელშეკრულებით გათვალისწინებული ყველა სამუშაო ჩაბარებულია _ კომისიას არანაირი შენიშვნა შესრულებულ სამუშაოებთან დაკავშირებით არ ჰქონია.
ჟურნალისტური გამოძიების ფარგლებში ",გურია ნიუსმა" ყველა გარემონტებული საბავშვო ბაღი მოინახულა.
შესრულებული სამშენებლო სამუშაოების ჩამონათვალის თანახმად, "მოეწყო წყალსაწრეტი ღარები, მილები და ძაბრები, შეკეთდა არსებული იატაკი ლამინატის მოსაწყობად, დაიგო ლამინატი, მეთლახი, მოაბათქაშეს შიდა კედლების დაზიანებული ნაწილი ქვიშა-ცემენტით და შეიღება წყალემულსიის საღებავით, ჩაისვა ახალი კარი".
თუმცა, ეს ყველაფერი ფურცელზე. ფაქტების ჩვენ მიერ გადამოწმების შემდეგ გაირკვა, რომ ინსპექტირების ჯგუფის მიერ ჩაბარებული იანეულის საბავშვო ბაღის ერთ-ერთი "ხარისხიანი" დეტალი კედელში სახელდახელოდ გაკეთებულ ქვასაც გულისხმობდა, რომლის დანიშნულებაც, ბაღის აღმზრდელების განმარტებით, თაგვისგან თავდაცვა იყო.
უფრო მეტიც, ჩვენი ჟურნალისტური გამოძიების პროცესში დადგინა, რომ "გარემონტებული ბაღებიდან", ერთ-ერთი, სოფელ ამაღლებაში მდებარე შენობა, რომელსაც ბაღის სტატუსიც არ ჰქონდა, თუმცა, ხელშეკრულებაში როგორც ბაღი ისე ეწერა, ეკონომიკის სამინისტროს ბალანსზეა იყო, სამების ე. წ. ბაღი კი კერძო პირს ეკუთვნოდა.
ამ გამოძიებას შედეგი მოჰყვა _ მშენებლები დააკავეს და როგორც ფინანსთა სამინისტროს საგამოძიებო სამსახურში განგვიმარტეს, გამოძიებაც გააგრძელეს. თუმცა, მას შემდეგ ერთი წელი გავიდა და სხვა შედეგი არ დამდგარა.
შპს "შემოქმედმშენის" კონტრაქტორი კომპანია, "ჯორჯიან კომპანი", რომელმაც უშუალოდ შეასრულა სარემონტო სამუშაოები, "შავ სიაშიც" კი არ ჩაუსვამთ და კომპანია ობიექტების მშენებლობა/რემონტს დღესაც აგრძელებს.
რაც შეეხება 2014 წელს დაწყებულ მშენებლობებს _ სამებასა და ამაღლებაში რემონტი უკვე დასრულდა და ორივე შენობა ახლა მუნიციპალიტეტის ბალანსზეა.
სამების საბავშვო ბაღში სარემონტო სამუშაოები შპს "დეგომ" დაასრულა _ კომპანიამ ტენდერი 39 400 ლარად მოიგო.
ახლა, "ყველაზე ცნობილ ბაღს", სადაც კარი კედლების გარეშე იყო ჩასმული, კედლები აქვს, თუმცა, ჭერის ნაწილი ჩამოხსნილია. როგორც ადგილზე მისულებს გვითხრეს, ამის მიზეზი წვიმა გახდა:
_ სახურავიდან წყალი ჩამოვიდა და "პლასტიკატი" რომ არ გაფუჭებულიყო, ჩამოვხსენით, _ განგვიმარტა ბაღში მისულებს გამგებლის წარმომადგენლის თანაშემწემ.
სამების ბაღში, რომლის გახსნის თარიღი მუნიციპალიტეტში ჯერ არ იციან, მიღება-ჩაბარების "გადახალისებული" კომისიის წევრებთან ერთად მივედით. კედლების ნაწილი უკვე დაბზარულია, ერთ ნაწილს კი საღებავი აკლია:
_ როდესაც ჩავიბარეთ, მაშინ ბზარები არ იყო _ როგორც ჩანს, მერე გაჩნდა. ხდება ხოლმე. სახლში რემონტი რომ გააკეთოთ, იქაც შეიძლება მსგავსი რა მოხდეს. რაც შეეხება მიკლებულ საღებავს, გეთანხმებით, რომ აკლია, თუმცა, როცა საბავშვო ბაღი ჩავიბარეთ მაშინ არ ჩანდა, _ აღნიშნა ჩვენთან საუბრისას ინსპექტირების ჯგუფის ხელმძღვანელმა, გამგებლის მოადგილემ მინდია ჟღერიამ.
მისივე თქმით, იმისთვის რომ კედლები არ დაიბზაროს, საბავშვო ბაღის განიავება აუცილებელია, თუმცა, კითხვაზე, ეს ვინ უნდა გააკეთოს, ვერ გვპასუხობს.
გარდა კედლებისა, ინსპექტირების ჯგუფს ისიც "გამორჩა", რომ რამდენიმე ადგილზე "პლინტუსები" არ არის. ჯგუფის ერთ-ერთი წევრის, ვლადიმერ გოგიბერიძის თქმით, "პლინტუსების" გაკეთება ხარჯთაღრიცხვაში არ იყო და რაც გაკეთდა, კომპანიამ საკუთარი ხარჯებით გააკეთა:
_ თქვენ არ იცით, რა შრომა გავწიეთ, რომ ეს ბაღი ჩაბარებულიყო. საკმაოდ პრობლემურ კომპანიასთან გვქონდა საქმე, _ აღნიშნა გოგიბერიძემ და დასძინა, რომ "დეგოს", ხელშეკრულების თანახმად, ვალდებულება აქვს, 2 წლის განმავლობაში, არსებული ხარვეზი გამოასწოროს.
სამებაში მისულებმა ისიც გავარკვიეთ, რომ მშენებელ კომპანიას სხვა ვალდებულებაც აქვს _ "დეგოს" მუშების სახელფასო დავალიანება დღემდე გაუსტუმრებელი აქვს, რის შესახებაც ადგილობრივი ხელისუფლებაც საქმის კურსშია:
_ ვის არ მივმართეთ, მაგრამ ვერ შევძელით ჩვენი ნაშრომი მიგვეღო. ერთადერთი გზა დაგვრჩა _ ავდგებით და დავშლით ჩვენს გაკეთებულს და ამით დამთავრდება ყველაფერი, _ აღნიშნეს ჩვენთან საუბრისას ადგილობრივებმა, რომლებიც მშენებლობაზე მუშაობდნენ.
მინდია ჟღერიას თქმით, ადგილობრივ ხელისუფლებას არ აქვს ბერკეტი, რომ კომპანიას მუშების დავალიანების გადახდა დაავალდებულოს:
_ ჩვენ ამის იურიდიული მექანიზმი არ გაგვაჩნია. ასევე, პრობლემას ქმნის ისიც, რომ არც ერთ მუშასა და "დეგოს" შორის შრომითი ხელშეკრულება გაფორმებული არ არის _ ყველაფერი სიტყვიერი შეთანხმების საფუძველზე მოხდა და ჩვენ ვერაფერს გავხდებით, _ გვითხრა ჟღერიამ.
მუშები ამბობენ, რომ კომპანიის ხელმძღვანელებთან დაკავშირებას ვერ ახერხებენ. იგივეს გვიდასტურებენ ინსპექტირების ჯგუფის წარმომადგენლებიც. არადა, კომპანიას, ხელშეკრულების თანახმად, ხარვეზების გამოსწორების ვალდებულება აქვს:
_ ჩვენ ვეცდებით მათთან დაკავშირებას და თუ არ გამოჩნდნენ, ხარვეზები არ გაასწორეს, ამის გამო შეგვიძლია მივმართოთ სასამართლოს, _ აღნიშნა ვლადიმერ გოგიბერიძემ და პირობა მოგვცა, რომ შესაბამის პროცედურებს ამ კვირაში დაიწყებენ.
"დეგოს" ხელმძღვანელებთან დაკავშირებას "გურია ნიუსიც" შეეცადა, თუმცა, უშედეგოდ _ შესყიდვების სააგენტოს ვებგვერდზე მითითებული ტელეფონის ნომერი რეგისტრირებული არ არის, მუშების მიერ მოცემულ ნომერზე კი არავინ გვიპასუხა.
რაც შეეხება ამაღლების საბავშვო ბაღს, სამების ბაღის მსგავსად, ისიც დაკეტილია. დაბზარული კედლები, ჩამოცვენილი საღებავი, გატეხილი ლამინატი და მეტლახი, ცუდად ნაწარმოები მშენებლობა აქაც თვალში საცემია.
ინსპექტირების ჯგუფის ხელმძღვანელს ამ შემთხვევაშიც იგივე პასუხი აქვს _ ბაღს, თურმე, "განიავება" სჭირდება, რომ მიღება-ჩაბარების აქტის გაფორმების დროს არც კედლები იყო დაბზარული და არც საღებავი ჩამოცვენილი.
_ ის, რომ ლამინატი და მეტლახი გატეხილია, ალბათ, ვერ შევამჩნიეთ, _ გვითხრა ჟღერიამ.
ამაღლებაში, ინსპექტირების ჯგუფმა ვერც ცუდად დამაგრებული ე. წ. "ჟოლობი" შეაჩნია და ვერ გარე ფასადზე არსებული ხარვეზები, რომლის დანახვასაც დიდი დაკვირვება არ სჭირდება.
აღნიშნული საბავშვო ბაღის სარემონტო სამუშაოები შპს "იმერეთი 2014"-ის მიერ არის შესრულებული.
კომპანიას, სხვების მსგავსად, აქვს ვალდებულება, რომ არსებული ხარვეზები ორი წლის განმავლობაში საკუთარი ხარჯებით გამოასწოროს, თუმცა, ამის გამო მათვის ინსპექტირების ჯგუფს ჯერ არ მიPუმართავს.
ჩვენ შევეცადეთ დეტალები კომპანიის ხელმძღვანელებთან გადაგვემოწმებინა, თუმცა, ამ შემთხვევაში შესყიდვების სააგენტოს ვებგვერდზე მითითებული ტელეფონის ნომერი გამორთული იყო.
ინსპექტირების ჯგუფის წევრების თქმით, არსებული ხარვეზები უახლოეს ხანში გამოსწორდება. აღნიშნული პირობა ჯგუფმა გუბერნიის ადმინისტრაციის ადგილობრივ თვითმმართველობასთან ურთიერთობის სამსახურის მობილური ჯგუფის წარმომადგენლებს _ რევაზ ჯანელიძეს და გოჩა ჯაშსაც მისცეს, რომლებმაც "ხარისხიანად ჩაბარებული" ობიექტების ხარისხი ჩვენთან ერთად გადაამოწმეს, მათი უხარისხობაც აღწერეს, ჯგუფის წევრებს კი შენიშვნები და რეკომენდაციები მიაწოდეს.
