თსუ-ს რექტორის მოვალეობის შემსრულებლის ლადო პაპავას განცხადებით, ჩვენ გვაქვს მახინჯი დამოკიდებულება იმასთან დაკავშირებით, რომ თუ ვინმე მინისტრი იყო, ეს უკვე დანაშაულია და თუ ვინმე უშიშროებაში მუშაობდა ესეც დანაშაულია. ამის შესახებ პაპავამ განმარტება ეგრეთ წოდებული ოდეერების საკითხზე საუბრისას გააკეთა.
"ეს არის ავადმყოფური მენტალიტეტის შედეგი. დანაშაულია მაშინ, თუ ის იყო კორუმპირებული მინისტრი და ქვეყანა დაანგრია ან თუ იყო უშიშროების თანამშრომელი და ქვეყანა გაყიდა. თუ ვინმე მუშაობდა უშიშროების სამსახურში და შემდეგ უნივერსიტეტში აღმოჩნდა, არ ნიშნავს იმას, რომ ყველას კავშირი აქვს ახლაც უშიშროებასთან. ისინი ვინც უშიშროების სამსახურის ყოფილი თანამშრომლები იყვნენ, მაგრამ დღეს არანაირი კავშირი არ აქვთ უშიშროებასთან, ამ ამბების შემდეგ დაწერეს განცხადებები და წავიდნენ, მაგრამ ეს არ ნიშნავს, რომ ყველამ დაწერა განცხადება. ერთი რამ უნდა ვიცოდეთ,რომ თუ ადამიანი შექმნილი ვითარებიდან გამომდინარე წერს განცხადებას და მიდის, მას კავშირი არ ჰქონია უშიშროებასთან. მაგრამ თუ კონკრეტულ ადამიანზეა პრობლემა, მაგრამ არ წერს განცხადებას და არ მიდის, ესე იგი მას არ აქვს უფლება ეს გააკეთოს. მას უნდა უთხრან, რომ დაწეროს განცხადება, რასაც არ ეუბნებიან. აი, სად არის ძაღლის თავი დამარხული,"– აღნიშნა პაპავამ და სტუდენტებს მოუწოდა, გვერდით დაუდგნენ ახალ რექტორს და ებრძოლონ ამ მანკიერ სისტემას.
