"აბა, კარგად დაფიქრდით, 8 შვილის პატრონს, რომელსაც იძულებით გადაადგილებული ნათესავებიც ჰყავს ირგვლივ, სად შეიძლებოდა ეს მიწის ნაკვეთი წამეღო?!"_ ასეთ ორაზროვან პასუხს სცემს პარლამენტარი ელდარ-ლუკა კურტანიძე „გურია ნიუსის“ შეკითხვას – რატომ არ არის აღნიშნული 2016 წელს შევსებულ ქონებრივ დეკლარაციაში დიღმის სასწავლო საცდელი მეურნეობის ტერიტორიაზე არსებული 700.00 კვ.მ-ის ფართობის მიწის ნაკვეთი, რომელიც კურტანიძეს 2015 წელს შევსებულ დეკლარაციაში აღნიშნული აქვს.
შეგახსენებთ, რომ „გურია ნიუსმა“ კურტანიძის დეკლარაცია ცოტა ხნის წინ გამოაქვეყნა, სადაც აღნიშნული იყო, რომ 2015 წელს შევსებულ დეკლარაციაში ლუკა კურტანიძის უძრავი ქონება 5 მიწის ნაკვეთითა და 3 ბინით შემოიფარგლებოდა. თუმცა, 2016 წელს შევსებულ ქონებრივ დეკლარაციაში თბილისში, დიღმის სასწავლო საცდელი მეურნეობის ტერიტორიაზე არსებული 700.00 კვ.მ-ის ფართობის მიწის ნაკვეთი აღარ წერია. გაასხვისა თუ არა ეს მიწის ნაკვეთი კურტანიძემ მასთან დაკავშირების შემდეგაც უცნობი დარჩა.
ასევე, 2016 წლის დეკლარაციაში აღნიშნულია, რომ კურტანიძე ფლობს თბილისში, ქეთევან დედოფლის გამზირზე მდებარე 57.00 კვ.მ-ის ფართობის ბინას. დეკლარაციაში არ არის აღნიშნული რა დაუჯდა ეს ბინა კურტანიძეს ან როდის შეიძინა.
ასევე აღსანიშნავია, რომ 2014 წელს, კურტანიძემ სამშენებლო-სარემონტო სამუშაოებში 21 000 დოლარი დახარჯა.
„გურია ნიუსი“ ინფორმაციის გადასამოწმებლად ლუკა კურტანიძეს დაუკავშირდა, თუმცა, მან აღნიშნულ საკითხზე განმარტებებისგან თავი შეიკავა და ორაზროვანი პასუხი გაგვცა.
„შედით საჯარო რეესტრში და ნახავთ სად წავიდა ეს მიწის ნაკვეთი. ყველაფერი არის კანონის ფარგლებში. მე არ მიყვარს სხვის საკუთრებაში ყურება, მაგრამ რადგანაც ვალდებული ვარ ეს ვთქვა, როგორც შემიძლია ისე გეუბნებით. კითხვები თუ გაჩნდება, გავცემ პასუხს, მაგრამ როგორც შემიძლია, ისე გპასუხობთ. 8 შვილის პატრონს სად და როგორ შეეძლო ეს ქონება განეკარგა?!“ _ აღნიშნა კურტანიძემ.
ცნობისთვის, ლუკა კურტანიძეს დეკლარაციაში 6 შვილი უწერია: ნინო, ანა, ნოდარი, საბა, ბარბარე და ანამარია.
რაც შეეხება ქეთევან დედოფლის გამზირზე არსებულ 57.00 კვ.მ-ის ფართობის ბინას, რომელიც კურტანიძის დეკლარაციაში 2016 წელს გაჩნდა, პარლამენტარი გვპასუხობს, რომ მშენებარე ბინა დანაზოგით შეიძინა და რამდენიმე წლის განმავლობაში მის დასრულებას ელოდებოდა.
„მოგეხსენებათ, რომ პროფესიონალი სპორტსმენი ვიყავი და წლების განმავლობაში მქონდა დამოუკიდებლად შემოსავლის წყარო. ეს იყო მშენებარე ბინა, წლების განმავლობაში შენდებოდა. როგორც კი დასრულდა, შევიტანე დეკლარაციაში“, _ აღნიშნა კურტანიძემ.
გარდა ამისა, პარლამენტარი არ აკონკრეტებს, რომელი ფართის გასარემონტებლად გამოიყენა მან 2014-2015 წლებში 44 000 დოლარი.
„ჩემი პროფესიიდან გამომდინარე, მთელი მსოფლიო მაქვს შემოვლილი და ებრაელების იგავია ასეთი: „ორჯერ არ ვიხდი“, მირჩევნია, მეც ასე მოვიქცე, ამიტომ რაც გავაკეთე, ძალიან ხარისხიანი გავაკეთე ჩემი და ჩემი ოჯახის დანაზოგით. კიდევ რომ არ მქონდეს ამდენი ვალდებულება შვილების წინაშე, შეიძლება უფრო ძვირიანიც გამეკეთებინა“, _ აღნიშნა „გურია ნიუსთან“ საუბრისას კურტანიძემ.
