"ბევრი მოსამართლე მინახავს ჩემთან ატირებული. საქმე რომ შეხვდა ამას ვერ განვიხილავო, ტიროდა ჩემს კაბინეტში, რომ მას არ ჰქონდა ამის უნარი და ძალა, ამას ვერ გავაკეთებო. ასეთი მოსამართლეები დარჩნენ სისტემაში და ჩემს მიმართ გამოთქვეს პრეტენზია, რომ მენეჯმენტი არ უვარგა ახვლედიანსო", _ ამის შესახებ თბილისის საქალაქო სასამართლოს ყოფილმა თავმჯდომარემ, მამუკა ახვლედიანმა "გურია ნიუსთან" ინტერვიუში განაცხადა.
ახვლედიანის თქმით, მოსამართლეების ნაწილს ჰქონდა მცდელობა საქმეებზე გადაწყვეტილებები მასთან შეეთანხმებინათ.
"2012 წელს საკუთარი კაბინეტებიდან ვერ გამოდიოდა ბევრი მოსამართლე დღეს რომ თავი მოაქვს დამოუკიდებელ მოსამართლედ. ჩემთან სიები ამოჰქონდათ გადაწყვეტილებების შესათანხმებლად. მომდევნო კვირაში რა გადაწყვეტილება უნდა გამოეტანათ. ამაზე ეს სასჯელი უნდა მივუსაჯო, ამაზე ეს სასჯელიო. პირველივე დღიდან ეს ავკრძალე. ვერცერთხელ ჩემთან ვერ შეათანხმეს ეს, თუმცა მცდელობა ჰქონდათ ამის. სიები მიდევს დღემდე იმ მოსამართლეების, ძალიან თავი რომ მოაქვთ დამოუკიდებელ მოსამართლეებად, თურმე ნუ ასწავლის მამუკა ახვლედიანი დამოუკიდებლობას. დიახაც, ვასწავლი, მათ არ იციან დამოუკიდებლობა რა არის. არა აქვს მნიშვნელობა რამდენი ხანი მუშაობდა მოსამართლედ. ის თავიდანვე როგორიც იყო, ისეთია დღესაც. ბევრი განვითარდა და კარგიც არის, მაგრამ ბევრი ძველ დროში დარჩა. აქ არ ვგულისხმობ წინა მთავრობის დროს, კიდევ უფრო ძველ დროს ვამბობ.
ამ ადამიანებს იცით რაში აკლდათ მამუკა ახვლედიანი? – გადაწყვეტილებას ვერ ათანხმებდნენ ვერავისთან. მე ამაში ვხედავ პრობლემას. გეუბნებით, ბევრი მოსამართლე მინახავს ჩემთან ატირებული. საქმე რომ შეხვდა ამას ვერ განვიხილავო, ტიროდა ჩემს კაბინეტში, რომ მას არ ჰქონდა ამის უნარი და ძალა, ამას ვერ გავაკეთებთო. ასეთი მოსამართლეები დარჩნენ სისტემაში და ჩემს მიმართ გამოთქვეს პრეტენზია, რომ მენეჯმენტი არ უვარგა ახვლედიანსო. მენეჯმენტს რას ეძახდნენ ისინი იცით? – გრაფიკი უნდა შემედგინა თურმე, უნდა ამოსულიყვნენ ჩემთან, თავისი პასუხისმგებლობისგან რომ გათავისუფლებულიყვნენ გადაწყვეტილების მიღებისას. ყველაზე, რა თქმა უნდა, ამას ვერ ვიტყვი, დაახლოებით ასეთი 10%-ია, მაგრამ ეს 10% იყო აქტიური ჩემთან დაკავშირებითაც, რომლებიც თავის თავზე პასუხისმგებლობის აღება არ უნდათ. მათ მოსამართლეობა კი არ უნდათ, თანაშემწეობა უნდათ მოსამართლის ხელფასით. რომ სასამართლოს თავმჯდომარემ უთხრას, რა საქმეზე რა გააკეთოს და შემდგომ თუ ვინმე პასუხს მოსთხოვს, თქვას, ამაში დამნაშავე სასამართლოს თავმჯდომარეაო", _ ამბობს ახვლედიანი და ეჭვობს, რომ "ალბათ, იგივე ხდება ახლაც".
"მაგრამ არ მინდა ყურმოკრული ინფორმაციით ვისარგებლო. მე ვსაუბრობ იმაზე, რაზეც მე თვითონ მქონდა შეხება. ვერ ვისაუბრებ ყურმოკრულ ამბებზე, თუმცა, ძალიან ბევრი ასეთი ამბავი ვიცი. მათ კი გამომიშვეს სასამართლოდან და მოსამართლეობიდან, მაგრამ ჩემს თავს ისევ მოსამართლედ ვთვლი. ჩემი ეთიკა და მორალი მაქვს. მათსავით არ ვისაუბრებ ბრალდებებზე. მთავარია მათთვის ვინმეს ბრალი დასდონ და არა აქვს მნიშვნელობა რას საუბრობენ", _ განაცხადა ახვლედიანმა "გურია ნიუსთან" ინტერვიუში.
ვინ არიან სასამართლო სისტემის "გენერლები" და "პოლკოვნიკები", ვინ მართავს დღეს მოსამართლეებს, რა როლი აქვს მართვაში ნინო გვენეტაძეს, როგორ აპირებს არასამთავრობო სექტორიდან სისტემაში მიმდინარე მოვლენების კონტროლს, _ ამ საკითხებზე "გურია ნიუსი" თბილისის საქალაქო სასამართლოს ყოფილ თავმჯდომარესთან, მამუკა ახვლედიანთან ინტერვიუს მოგვიანებით შემოგთავაზებთ.
ამავე თემაზე:
მათი მიზანია თავიანთი კანდიდატები დანიშნონ სასამართლო სისტემაში – მამუკა ახვლედიანი
