რიო-დე-ჟანეიროში მიმდინარე ოლიმპიურ თამაშებზე გუშინ დიდი იმედგაცრუება გველოდა. ძიუდოისტთა შეჯიბრებაზე უპირობო ფავორიტად შერაცხული ავთანდილ ჭრიკიშვილი ასპარეზობდა. სპორტის ამ სახეობის სპეციალისტების ვარაუდით, 81 კგ. წონით კატეგორიაში ქართველი გამარჯვების უპირობო კანდიდატად მოიაზრებოდა.
სამწუხაროდ, ავთანდილმა ვარაუდი ვერ გაამართლა. ოქროს ვინღა ჩივის, საერთოდ უმედლოდ დაგვირჩა. ალბათ, ფსიქოლოგიურ წნეხს ვერ გაუძლო, რადგან ყველა მეტოქესთან მისი ჭიდაობა მეტად არადამაჯერებელი გახლდათ.
თავდაპირველად კუბელ ივან ფელიპე სალვა მორალესს სძლია. შემდეგ მის გზას სალვადორელი ხუან დიეგო ტურსიოსი გაუყენა.
მეოთხედფინალში ჩვენებურმა იტალიელი მატეო მარკონჩინი დაამარცხა. სამაგიეროდ, ნახევარფინალში აშშ-ის წარმომადგენელ ტრევის სტივენთან წააგო, ოდნავ მოგვიანებით კი ბრინჯაოს მედლისთვის ბრძოლაშიც ვერ ივარგა და იაპონელ ტაკანორი ნაგასეს დანებდა.
გუშინ მშვილდოსან ქალთა ასპარეზობის ფლეი-ოფი დაიწყო. სამწუხაროდ, პირველ წრეში ხათუნა ნარიმანიძემ უკრაინელ ლიდია სიჩენიკოვასთან წააგო.
გუშინვე ნინო სალუქვაძემ სპორტული პისტოლეტიდან სროლის შეჯიბრში მიიღო მონაწილეობა. ფინალურ ჯგუფში კი გავიდა, მაგრამ მედლისთვის ვერ იბრძოლა და ასპარეზობა მეექვსე ადგილზე დაასრულა.
დღეს ძიუდოისტები 90კგ წონით კატეგორიაში იასპარეზებენ. საქართველოს ღირსებას ევროპის სამგზის ჩემპიონი ვარლამ ლიპარტელიანი დაიცავს. ჩვენებური თავდაპირველად ტაჯიკ კომრონშოკ უსტოპირიონს დაუპირისპირდება. მისი ძლევის შემთხვევაში ნაურუელ ოვინი უერასა და ბელიზელ რენი ჯეიმს შორის გამარჯვებულს შეხვდება. წესითა და რიგით, მეოთხედფინალამდე მისვლა არ უნდა გაუჭირდეს, იქ კი, სავარაუდოდ, ჰოლანდიელ ნოელ ვან ტ ენდის დაუპირისპირდება.
დღეს გაგრძელდება ქალ მშვილდოსანთა ფლეი-ოფის შეხვედრები. ქრისტინე ესებუა ინდოელ დეპიკა კუმარის დაუპირისპირდება, იულია ლობჟანიძე კი მექსიკელ ალეჰანდა ვალენსიას.
დღეს, შეჯიბრებაში ჰოლანდიელ-ქართველი ძიუდოისტი ქალი ესტერ სტამიც ჩაერთვება, რომელიც პირველ წრეში მონღოლ ნარანჯანგალ ცენდ-აიუშს შეხვდება.
ნინო სალუქვაძის ვაჟი, ცოტნე მაჭავარიანი დღეს სპორტული პისტოლეტით შეჯიბრში იასპარეზებს.
დღესვე ოლიმპიურ სარბიელზე მოფარიკავეთა შეჯიბრში მოხმალავე სანდრო ბაზაძეს ვიხილავთ. ჩვენებური პირველ წრეში ბრაზილიელ რენზო აგრესტას დაუპირისპირდება.
