ოქრუაშვილის დიდი გამოცდა

გუშინ რიო-დე-ჟანეიროში მიმდინარე ზაფხულის ოლიმპიურ თამაშებზე მხოლოდ ერთმა ქართველმა სპორტსმენმა იასპარეზა. ბექა ღვინიაშვილი ძიუდოსტთა 100 კგ წონითი კატეგორიის შეჯიბრში ჩაება.

ახალგაზრდა ქართველი ფალავანი მეტად ნიჭიერი და პერსპექტიულია.  მისი „მშობლიური“ წონა 90 კგ გახლავთ, მაგრამ იქ ვარლამ ლიპარტელიანი ასპარეზობს. იმდენად დიდი გახლდათ ოლიმპიურ თამაშებზე გამოსვლის სურვილი რომ ბექამ წონა შეიცვალა და სულ რაღაც ნახევარ წელიწადში ოლიმპიადის საგზურიც მოიპოვა.
გუშინ ქართველმა თავდაპირველად ბრიტანელი ბენჯამენ ფლეტჩერი დაამარცხა, შემდეგ კი მის გზას ბელგიელი ტომა ნიკოფოროვი გაუყენა.
მეოთხედფინალში ღვინიაშვილი გამოცდილ ფრანგ სირილე მარეტს დაუპირისპირდა. სამწუხაროდ მეტოქეს ვერ აჯობა და ბრძოლა ბრინჯაოს მედლისთვის გააგრძელა. იქ კი იაპონელი რაინოსუკე ჰაგა ელოდა. აზიელს მედგარი წინააღმდეგობა გაუწია, მაგრამ მხოლოდ ერთი გაფრთხილებით წააგო.
დღეს ოლიმპიურ თამაშებზე სამი ქართველი იასპარეზებს. ძიუდოისტთა ტურნირის ბოლო დღეს საქართველოს ღირსებას ადამ ოქრუაშვილი დაიცავს რომელიც +100 კგ წონით კატეგორიაში იბრძოლებს.

ჩვენებურისთვის წინასწარი კენჭისყრა ულმობელი აღმოჩნდა. ოქრუაშვილი პირველივე წრეში იაპონელ ჰისაიოში ჰარასავას დაუპირისპირდება, მისი ძლევის შემთხვევაში კი მომდევნო წრეში აზერბაიჯანის სახელით მოჭიდავე უშანგი კოკაურს შეხვდება.

იაპონელი უპირობო ფავორიტად მიიჩნევა. იმედია ადამ ოქრუაშვილი მას უშეღავათო ბრძოლას გაუწევს და დღის ხმაურიანი სენსაციის შემოქმედიც გახდება.
დღეს რიო-დე-ჟანეიროში ბატუტზე მხტომელ ლუბა გოლოვინასაც ვიხილავთ. ეს ასპარეზობა გოლოვინასთვის ზედიზედ მესამეა.  2008 წლის პეკინის ოლიმპიადაზე მეექვსე ადგილი დაიკავა, ოთხი წლის შემდეგ, ლონდონის ოლიმპიურ თამაშებზე კი მეშვიდე ადგილზე გავიდა. იმედია დღეს წინა შედეგებს გააუმჯობესებს და მედლისთვისაც იბრძოლებს.

დღესვე ოლიმპიურ თამაშებზე მძლეოსანთა ასპარეზობა დაიწყება. ჩვენი ქვეყნის ღირსებას სიგრძეზე მხტომელი ბაჩანა ხორავა დაიცავს.