"თანხა, რომლითაც ჩქაროსნული ავტომაგისტრალი შენდება, საქართველოს მიღებული აქვს უცხოური ფონდიდან იმ პირობით, რომ მაგისტრალის გაყვანით გამოწვეული ზარალის ანაზღაურება მოხდება სამართლიანი და ღირსეული კომპენსაციის პირობებში. თუმცა, მათ ჩემთან და ჩემს კომპანიონთან _ ივლიანე მანთიძესთან მიმართებაში, დაარღვიეს საერთაშორისო ხელშეკრულების ეს პუნქტი", _ ამბობს "გურია ნიუსთან" საუბარში გოჩა ჩხეტია, რომლის 20 ჰა ფართობზე, სადაც ფერმა და თევზის ტბორი აქვს გაშენებული, ჩქაროსნული მაგისტრალის გადის.
ჩხეტიასა და მანთიძის ინფორმაციით, მათ არათუ კომპენსაციის თანხა არ მიუღიათ, რომელიც მაგისტრალის გაყვანით ზარალის ასანაზღაურებლად ეკუთვნით, არამედ არც ოფიციალური სახით მიუღიათ პასუხი, ერგებათ თუ არა ეს თანხა საერთოდ.
"ჩვენ ზეპირად გვეუბნებიან მხოლოდ, რომ თანხას ვერ მივიღებთ, ოფიციალური პასუხი არ გვეღირსა. მსგავს პრეცედენტს, რომ კომპენსაცია არ მიეცათ, ლანჩხუთში მეორეს ვერ ნახავთ. ვფიქრობ, ეს მიზანმიმართული შურისძიებაა, რისი ერთ-ერთი მიზეზი შეიძლება ისიც იყოს, რომ ჩემს კომპანიონს ოპოზიციური მოსაზრებები აქვს _ მეც პარტია "გირჩის" წევრი გახლავართ", _ ამბობს გოჩა ჩხეტია, რომლის ამგვარ მოსაზრებას ივლიანე მანთიძეც იზიარებს.
"ყოველთვის ოპოზიციონერის იმიჯი მქონდა, ვფიქრობ, სწორედ ამიტომ მიდგანან კრიჭაში. ასე იყო წინა ხელისუფლების დროსაც და ახლაც იგივე გრძელდება. 24 წელია, იჯარას ვიხდით და 20 ჰექტარზე ფერმა და სატბორე მეურნეობა გვაქვს. თუმცა, რატომღაც არ გვცნეს და არ შეგვახვედრეს აუდიტის სამსახურს. ეტყობა, უთხრეს, ეს მიწა სახელმწიფო საკუთრებააო. მაგრამ 20 ჰექტარი რომ შეღობილია, შიგ საქონელი და თევზი იქნება, ხომ უნდა იფიქრო, რომ მას პატრონიც ეყოლება?! გამგეობაში გვეუბნებიან, ჩვენ არაფერ შუაში ვართო და ხელს აუდიტის სამსახურისკენ იშვერენ, რომელიც თვალითაც არ მინახავს. ვითხოვთ _ გაგვარკვიონ, ვითვლებით თუ არა მოიჯარედ და გვეკუთვნის თუ არა კომპენსაცია. ორი თვის წინ მივმართე ამის თაობაზე საგზაო დეპარტამენტს, თუმცა, პასუხს ამ დრომდე არავინ მაძლევს. თუ აქამდე უკანონოდ ვიყავი სახელმწიფო ტერიტორიაზე, როგორ მაჩერებდნენ?! დღემდე პატიოსნად ვიხდიდი ყველა გადასახადს და თუ არ ვიყავი მოიჯარედ, მაშინ თანხას როგორღა მახდევინებდნენ?" _ კითხვას სვამს ივლიანე მანთიძე და დასძენს, რომ საქმე აუცილებლად გახდება სასამართლო დავის საგანი.
მანთიძის კითხვაზე _ თუ ის მოიჯარედ არ ითვლება, თანხას როგორ და ვის უხდიდა, პასუხის მიღება გამგეობის ეკონომიკის სამსახურიდან ვცადეთ, თუმცა, საქმის დეტალები მათთვისაც ბუნდოვანია:
"ყველა დოკუმენტაცია, რომელიც 2006 წლამდე იყო, დაარქივებულია ოზურგეთში და რა და როგორ იყო, ამის თქმა საქმის შესწავლის გარეშე შეუძლებელია. სად და როგორ იხდიდა მანთიძე იჯარის თანხას, ვერაფერს გეტყვით. ის იყო ჩვენთან მოსული ამ საკითხთან დაკავშირებით, განცხადებაც დავაწერინეთ. ჩვენმა თანამშრომელმა სთხოვა მას, წარმოედგინა დოკუმენტაცია, რაც მას არ წარმოუდგენია. სამწუხაროდ, დეტალურ ინფორმაციას ამის თაობაზე მე არ ვფლობ, მასთან კონტაქტი ჩემს ერთ-ერთ თანამშრომელს ჰქონდა, რომელიც ახლა შვებულებაში იმყოფება", _ გვითხრა სამსახურის უფროსმა გოგი ფაცურიამ.
როგორც ირკვევა, გოჩა ჩხეტია და ივლიანე მანთიძე ლანჩხუთში, სოფელ ჭყონაგორაში არსებული 20 ჰა მიწის ნაკვეთით უკვე 24 წელია, სარგებლობენ და პრობლემებიც ხელშეკრულებასთან დაკავშირებით არაერთხელ ჰქონიათ. ჩხეტიას თქმით, პირველად, ხელშეკრულება იჯარის თაობაზე 1992 წელს გააფორმა 10-წლიანი ვადით. თუმცა, როგორც თავად ამბობს, კანონმდებლობაში გახორციელებული ცვლილების საფუძველზე, ხელშეკრულების ხელახალი გაფორმება მოსთხოვეს და თანხაც, რომელიც 10 წლის ვადით წინასწარ ჰქონდა გადახდილი, წყალში გადაყრილი აღმოჩნდა.
"რატომღაც ისე ხდებოდა, რომ კანონში ხშირ-ხშირად შედიოდა ცვლილებები, რის საფუძველზეც ყოველი ახალი მოსული ჩინოვნიკი მაიძულებდა ხელშეკრულების თავიდან გადაფორმებას. 1992 წელს გაფორმებული ხელშეკრულება გარკვეული ხნის შემდეგ თავიდან გამაფორმებინეს, ახლა უკვე სამი წლის სამი წლის ვადით. 1997 წელს კი ლანჩხუთის გამგეობის გადაწყვეტილებით 10-წლიანი სარგებლობის უფლებით ხელახლა გადმომეცა და გაფორმდა შესაბამისი ხელშეკრულება. თუმცა, ამ პერიოდში რამდენიმე წლით ქვეყნიდან გასვლა მომიწია, რა დროსაც ჩემს კომპანიონთან, ივლიანე მანთიძესთან მივიდნენ გარკვეული პიროვნებები და უთხრეს, რომ ხელშეკრულება არა 10 წლით, არამედ ხუთწლიანი ვადით იყო გაფორმებული. ასე მოტყუებით ჩასწორდა ხელშეკრულება, რომელსაც მოქმედების ვადა 2007 წლის ნაცვლად 2003 წელს გაუვიდა. 2003 წლიდან კი ყველა დოკუმენტაცია ჩემი კომპანიონის, ივლიანე მანთიძის სახელზე გადაფორმდა, რომელმაც იმთავითვე მიმართა გამგეობას იჯარის თაობაზე შესაბამისი განაცხადით. მაგრამ, რატომღაც მოხდა ისე, რომ გამგეობის გადაწყვეტილებას მიწის იჯარით გაცემის შესახებ არ მოჰყვა ხელშეკრულების გაფორმება", _ ამბობს გოჩა ჩხეტია.
თუ რატომ ვერ მოხერხდა გამგეობის გადაწყვეტილების გადატანა ხელშეკრულებაში, ამ საკითხზე საუბრისგან ჩვენი რესპონდენტი ამ ეტაპზე არ საუბრობს და იმედს იტოვებს, რომ მუნიციპალიტეტი საკუთარი ხარვეზის გამოსწორებას შეეცდება:
"ჯერჯერობით, თავს შევიკავებ იმის გასაჯაროებისგან, თუ რატომ ვერ გაფორმდა ხელშეკრულება. მინდა ჩემი სიტყვები გამაფრთხილებელ აქციასავით იყოს იმათთვის, ვისაც ბრალი მიუძღვის ამაში.
ვფიქრობ, ყველაფერი შეგნებულად კეთდება ჩვენ მიმართ. საერთაშორისო აუდიტს, რომელთანაც ხელშეკრულება აქვს გაფორმებული საგზაო დეპარტამენტს, უნდა შეეფასებინა ის ზარალი, რაც ამ 20 ჰექტარზე ავტომაგისტრალის გაყვანის შედეგად მოგვადგება მე და ჩემს კომპანიონს, მაგრამ, რატომღაც, დაუმალეს აუდიტს, რომ ამ ტერიტორიაზე არსებობს ფერმა, რომ ის არის საიჯარო ნაკვეთი, რომ იქ არის თევზის მეურნეობა. ამ ინფრასტრუქტურის მოშლით კი გარკვეული ზარალი გვადგება ჩვენ", _ დასძენს გოჩა ჩხეტია.
საკითხთან დაკავშირებით საქართველოს საავტომობილო გზების დეპარტამენტის წარმომადგენელს ვასილ ბაზაძეს დავუკავშირდით. ბაზაძის თქმით, ივლიანე მანთიძეს ოფიციალური პასუხი გზების დეპარტამენტიდან უახლოეს დღეებში მიეწოდება: "სამწუხაროდ, პასუხი უარყოფითია და ივლიანე მანთიძე ვერ მიიღებს კომპენსაციის თანხას, იმ მარტივი მიზეზის გამო, რომ არ არსებობს ხელშეკრულება, რომლის თანახმადაც მანთიძე მიწის მოსარგებლედ ჩაითვლება".
