ნატო-ს გენერალური მდივნის, ჩრდილო-ატლანტიკური საბჭოს, საქართველოს პარლამენტის თავმჯდომარის და პარლამენტის წევრებს შორის შემდგარი მედიისთვის დახურული შეხვედრის შემდეგ, საქართველოს პარლამენტის თავმჯდომარემ, დავით უსუფაშვილმა ჟურნალისებთან განაცხადა, რომ ნატო რასაც გვპირდება, ასრულებს.
"ზოგადად, ნატო რასაც გვპირდება, ასრულებს. შეგვპირდნენ, რომ 2016 წლის სექტემბერში ჩრდილო-ატლანტიკური საბჭოს სხდომა ჩატარდებოდა საქართველოში და ეს პირობა შესრულდა. ამას კი, ჰქონდა ძალიან კონკრეტული მიზანი და ამოცანა, ჯერ კიდევ ერთი წლის წინ. ამით, ჩვენ, ორივე მხარეს, საქართველოს და ნატოს, გვინდოდა ხაზი გაგვესვა იმისთვის, რომ სწორედ საარჩევნო კამპანიის პროცესში, ჩვენ, საქართველოს წამყვანი პოლიტიკური პარტიები კიდევ ერთხელ ვამცნობთ ქართულ საზოგადოებას, რომ ჩვენი სვლა ნატო-სკენ არის წარმატებული და ყოველი დღე ჩვენ გვაახლოებს იმ ძალიან მნიშვნელოვან ამოცანას, როდესაც ქვეყანა იქნება საბოლოოდ და სამუდამოდ დაცული და ჩვენი უსაფრთხოება იქნება გარანტირებული. ჩვენ, ამ შეხვედრაზე გვქონდა საშუალება, ჩვენი პოზიციები გამოგვეთქვა ამის თაობაზე", _ განაცხადა უსუფაშვილმა.
საქართელოს პარლამენტის თავმჯდომარის თქმით, რომ ნატო-ს წევრმა სახელმწიფოებმა შეხვედრაზე აღნიშნეს, რომ საქართველოს ნატო-ში გაწევრიანება შეუქცევადი პროცესია.
"ნატოს გენერალურ მდივანთან, ბატონ სტოლტენბერგთან შეხვედრაზე, კიდევ სხვა მნიშვნელოვან საკითხებზეც ვისაუბრეთ. ძალიან კონკრეტულ თემებზე და უფრო ფართო ფორმატში მოვისმინეთ ჩვენ ნატო-ს წევრი სახელმწიფოების ძალიან მყარი პოზიცია, რომ არა მხოლოდ საქართველოს ნატოში გაწევრიანებაა შეუქცევადი პროცესი, არამედ მანამდეც არის ძალიან ბევრი პროექტი და პროგრამა, რომელიც წარმატებით ხორციელდება", _ თქვა პარლამენტის თავმჯდომარემ.
უსუფაშვილმა ჟურნალისტებთან საუბრისას, ასევე, აღნიშნა, რომ ნატო-ს წევრი სახელმწიფოები კმაყოფილები არიან საქართველოში მიმდინარე რეფორმებით, მაგრამ კიდევ უფრო მეტი აქვს ქვეყანას გასაკეთებელი.
"ნატო-ს ყველა წევრი სახელმწიფო არის კმაყოფილი საქართველოში მიმდინარე რეფორმებით. ცხადია, მათაც გვითხრეს და ჩვენც ვიცით, რომ გვაქვს კიდევ მეტია გასაკეთებელი სასამართლოს მიმართულებით, სხვა მიმართულებებით, ამაზეც იყო საუბარი და საბოლო ჯამში, ეს იყო ძალიან წარმატებული, ნაყოფიერი შეხვედრა და კიდევ ვიმეორებ, თავად შეხვედრის დროს ჰქონდა განსაკუთრებული დატვირთვა და მე მოხარული ვარ, რომ ეს პირობა შესრულდა, ისევე, როგორც შესრულდება ბუქარესტის სამიტის დაპირება", _ აღნიშნა უსუფაშვილმა.
საქართველოს პარლამენტის თავმჯდომარის თქმით, ნატო გარკვეულია საქართველოში მიმდინარე პროცესებში.
"რაც შეეხება დანარჩენ საკითხებს, გარწმუნებთ, არანაირ ძალადობრივ ფაქტებზე არ ყოფილა საუბარი და ვერც იქნებოდა, იმიტომ, რომ ეს ის ქვეყნები არიან, რომლებმაც ძალიან კარგად იციან, რა ხდება საქართველოში. ვინ-ვინ და ნატო-მ კარგად იცის, რა ხდება საქართველოში, გასაგები მიზეზების გამო. ამიტომ, შედარება 2012 წლის წინასაარჩევნო კამპანიასთან, იმ ძალადობასთან, უბედურებასთან, რაც გადავიარეთ და ახლა ორი თვის წინ კორცხელში მომხდარი ინცინდენტის ერთ დონეზე დაყენება, ეს უბრალოდ ღიმილის მომგვრელია ბევრისთვის, მათ შორის, ნატო-ს წევრი სახელმწიფოების წარმომადგენლებისთვის. ეს არ ნიშნავს იმას, რომ ჩვენ მშვიდად უნდა ვიყოთ და გარანტირებულია ყველაფერი. პარლამენტმაც, მთავრობამაც, ყველამ, ყველაფერი უნდა გავაკეთოთ იმისთვის, რომ წინასაარჩევნო გარემო იყოს სათანადო, არ იყოს არანაირი პრობლემა, მაგრამ რაიმე პარალელები იმასთან დაკავშირებით, რომ რა იყო 2012 წელს და რა არის ახლა, არასერიოზულია და ამიტომ ამას არცერთი წევრი ნატოს სახელმწიფოსი არ კადრულობს და არ იკადრებს. რაც შეეხება სასამართლოში არსებულ საკითხებს, აქ იენს სტოლტენბერგმაც და სხვებმაც ხაზი გაუსვეს, მიესალმნენ იმ რეფორმებს და გადადგმულ ნაბიჯებს, რაც გაკეთდა. მაგრამ იმათმაც იციან და დიახ, ჩვენც ვხედავთ, რომ გასაკეთებელი არის კიდევ ძალიან ბევრი, ”_ განაცხადა საქართველოს პარლამენტის თავმჯდომარემ, დავით უსუფაშვილმა ჟურნალისტებთან, ნატოს გენერალურ მდივანთან, იენს სტოლტენბერგთან შეხვედრის შემდეგ.
