ბათუმში, აქციის მონაწილეებმა პოლიციის მანქანას ცეცხლი წაუკიდეს. დაზიანებული კიდევ რამდენიმე, როგორც პოლიციის, ასევე კერძო პირების ავტომობილები.
ბათუმში მიმდინარე აქციის მონაწილეები დაკავებული პირების – 6 ადამიანის გათავისუფლებას ითხოვენ.
აქციის მონაწილეები თანამდებობიდან აჭარის საპატრულო პოლიციის ახალი უფროსის კახა ბუხრაძის გადაყენებასაც მოითხოვენ. მათი განცხადებით,
სწორედ ბუხრაძის დანიშვნის შემდეგ ქალაქში მძღოლების მიზანმიმართული დაჯარიმება დაიწყო.
აჭარაში უკვე გაემგზავრა შინაგან საქმეთა მინისტრი გიორგი მღებრიშვილი. გამგზავრებამდე მინისტრმა ჟურნალისტებთან კომენტარი გააკეთა და აღნიშნა, რომ რომ დაკავებული 6 მოქალაქე გაათავისუფლა.
„მე გავითვალისწინე აჭარის მთავრობის თავმჯდომარის თხოვნა, რომ გამეთავისუფლებინა ადმინისტრაციული წესით დაკავებული პირები, მიუხედავად იმისა,
რომ მე ეს ადამიანები გავათავისუფლე მათ მიმართ ადმინისტრაციული სამართალწარმოება არ შეწყვეტილა და შემიძლია გთხრათ,
რომ ეს ადამიანების აუცილებლად სასამართლოს წინაშე წარდგებიან,“ – განაცხადა გიორგი მღებრიშვილმა.
მინისტრმა აღნიშნა, რომ მიმდინარე პროვოკაციული მოქმედება კანონის აღსრულებას ხელს ვერ შეუშლის.
„ყველა ის პირი, ვინც თავის თავს კანონზე მაღლა აყენებს უმკაცრესად იქნებიან დასჯილი. უნდა ვიცოდეთ ყველამ,
რომ ჩვენ ყველანი ვართ კანონის წინაშე თანასწორი და ყველანი ერთნაირად ვაგებთ პასუხს კანონის წინაშე,“ – განაცხადა გიორგი მღებრიშვილმა.
შინაგან საქმეთა მინისტრი საჭიროების შემთხვევაში საკადრო გადაადგილებებსაც არ გამორიცხავს.
შეგახსენებთ, რომ თავდაპირველად, „ბათუმი პლაზასთან“ ადგილობრივებსა და საპატრულო პოლიციის თანამშრომლებს შორის მომხდარი დაპირისპირების დროს ორი ადამიანი დააკავეს. საზოგადოებრივს შინაგან საქმეთა სამინისტროში განუცხადეს, რომ საპატრულო პოლიციამ ერთ-ერთი მოქალაქე მოძრაობის შეფერხების გამო დააჯარიმა, რის შემდეგაც აღნიშნულმა მძღოლმა პოლიციას წინააღმდეგობა გაუწია, მას გამოესარჩლა მეორე მოქალაქე და ორივე მათგანი ადმინისტრაციული კოდექსის 173-ე მუხლის საფუძველზე დააკავეს, რაც პოლიციელის კანონიერი მოთხოვნისადმი დაუმორჩილებლობას გულისხმობს.
აღნიშნულ ფაქტს ბათუმში ხალხმრავალი აქცია მოჰყვა, რომელიც რამდენიმე საათია, მიმდინარეობს. როგორც აქციის მონაწილეები აცხადებენ, საპატრულო პოლიცია მოქალაქეებს უსაფუძვლოდ აჯარიმებს. მოქალაქეების თქმით,ბოლო პერიოდში, სამართალდამცავები ზედმეტად აგრესიულად იქცევიან, რაც მოსახლეობის უკმაყოფილებას იწვევს. აღსანიშნავია, რომ რამდენიმე თვის წინ, ბათუმის პოლიციის ხელმძღვანელობა შეიცვალა.
