საქართველოს შინაგან საქმეთა მინისტრის მოადგილეს მერაბ მალანიას, გასულ წელს, მინისტრზე თითქმის ორჯერ მეტი ხელფასი აქვს აღებული. მისმა შემოსავალმა 2016 წელს, 138 448 ლარი შეადგინა. ამის შესახებ მინისტრის მოადგილის ქონებრივ დეკალარაციაშია აღნიშნული, რომელიც 2017 წლის 27 მარტს შეავსო.
დეკლარაციის თანახმად, 2016 წლის 13 იანვრიდან 31 დეკემბრამდე მერაბ მალანიას შემოსავალი შინაგან საქმეთა სამინისტროდან 138 448 ლარი იყო. თუმცა, დეკლარაციაში ტექნიკური შეცდომაა დაშვებული, მალანიას ხელფასის აღების პერიოდად 13-31 დეკემბრის პერიოდი აქვს მითითებული, რასაც უწყებაში არ ადასტურებენ და ამბობენ, რომ 138 448 ლარი არა ორი კვირის, არამედ მთელი წლის შემოსავალია.
აქვე უნდა აღინიშნოს ისიც, რომ მინისტრის მოადგილემ გასულ წელს, შს მინისტრზე 62 589 ლარით მეტი აიღო. როგორც გიორგი მღებრიშვილის ქონებრივ დეკლარაციაშია აღნიშნული, 2016 წელს მისი შემოსავალი სამინისტროდან 75 859,05 ლარი იყო.
რაც შეეხება მალანიას წინა წლების შემოსავლებს, 2016 წელს შევსებულ დეკლარაციაში წერია, რომ მას საქართველოს შინაგან საქმეთა სამინისტროს დეპარტამენტის დირექტორის თანამდებობიდან 80026.68 ლარი აქვს აღებული; ხოლო 2014 წლის დეკლარაციის თანახმად კი, საქართველოს შინაგან საქმეთა სამინისტროს უფროსი ინსპექტორის თანამდებობიდან – 10561.97 ლარი მიუღია.
რაც შეეხება მალანიას სხვა ქონებას, რომელიც მას დეკლარაციაში უწერია. ის ფლობს ორ ბინას და არასაცხოვრებელ ფართს თბილისში.
კერძოდ, მერაბ მალანიას 100%-იან საკუთრებაშია 2009 წელს, 37500,00 – დოლარად ნაყიდი ბინა თბილისში, მუხიანის პირველ მიკრო რაიონში, რომლის ფართობიც 43,00 კვ.მ-ია.
ასევე, 2014 წელს, 75000,00-დოლარად შეძენილ 262,00 კვ.მ-ის ფართობის ბინას თბილისში, ანგია ბოჭორიშვილის ქუჩაზე და ამავე მისამართზე, ამავე წელს, 1900,00-დოლარად შეძენილ 18,00 კვ.მ-ის არასაცხოვრებელ ფართს.
ასევე, მალანიას საკუთრებაშია მსუბუქი ავტომანქანა mercedes 124, რომელიც მას 2006 წელს 4500,00-დოლარად უყიდია.
მინისტრის მოადგილის საკუთრებაშია სამი საბრძოლო იარაღი: 2004 წელს ნაჩუქარი glock 17; 2016 წელს ნაჩუქარი zig-zauer 1911 და стечкин.
რაც შეეხება მინისტრის მოადგილის ოჯახის ფინანსურ მდგომარეობას, დეკლარაციის შევსების მომენტში მის საბანკო ანგარიშზე თი–ბი–სი ბანკში 1665,00 ლარი (-) იყო; “საქართველოს ბანკის” საკრედიტო ანგარიშზე – 2988,48 ლარი (-); ამავე ბანკის ანაბარზე – 496,91 ლარი (+) და 1640,65 დოლარი, ხოლო სახელფასო ანგარიშზე – 4471,31 ლარი იყო.
მერაბ მალანიას სახელზე 4 სესხია. 80000,00 –დოლარიანი იპოთეკური სესხი მას „ქართუ“ ბანკიდან 2014 წელს აუღია და ვადა 2024 წელს ეწურება. პროცენტის დასაფარად კი, გასულ წელს 1007,00 დოლარი გადაუხდია. ამავე ბანკიდან აქვს აღებული 2016 წელს 35000,00 დოლარიც, რისი პროცენტის დასაფარადაც 2016 წელს 440,00 დოლარი აქვს გადახდილი.
2015 წელს, მალანიას „საქართველოს ბანკიდან“ 10000,00 – ლარიანი სამომხმარებლო სესხი აქვა აღებული. სესხის დაფარვის ვადა 2019 წელს იწურება, ხოლო პროცენტისთვის 303,54 ლარი გადაუხდია.
რაც შეეხება 3595,00 ლარიან განვადებას, მალანიას ის 2016 წელს გაუკეთებია და გასულ წელს საქართველოს ბანკისთვის 483,25 ლარი გადაუხდია.
მერაბ მალანიას დეკლარაციაში ასევე აღნიშნულია, რომ ოჯახს გარდა ამ თანხებისა სოლიდური გასავალი ჰქონია. კერძოდ, გიორგი მალანიას სწავლის საფასური 3500,00 ლარი გადაუხდია; 7350,00 –ლარიანი ავეჯი შეუძენია და სარდაფის რემონტისთვის 10000,00 ლარი გადაუხდია.
ცნობისთვის, მერაბ მალანია მინისტრის მოადგილედ 2016 წლის 14 იანვარს დაინიშნა.
შინაგან საქმეთა სამინისტროს ვებ-გვერდზე განთავსებული ინფორმაციის თანახმად,
1991-1995 წწლებში ის თბილისის იურიდიული ინსტიტუტში იურიდიულ ფაკულტეტზე სწავლობდა.
29.02.15-13.01.2016 წლებში იყო შსს-ს სპეციალური და საგანგებო ღონისძიებების ცენტრის განსაკუთრებულ დავალებათა დეპარტამენტის დირექტორი;
24.02.15-29.04.2015 წწ. – შსს-ს მიგრაციის დეპარტამენტის დირექტორი;
23.01.2014-24.02.2015 წწ. – შსს-ს სსიპ დაცვის პოლიციის დეპარტამენტის უფროსი ინსპექტორი;
01.04.2013-23.01.2014 წწ. – საქართველოს სახელმწიფო დაცვის სპეციალური სამსახურის დაცვის განყოფილების უფროსი;
13.06.2002-01.04.2013 წწ. – შსს-ს სსიპ დაცვის პოლიციის დეპარტამენტის დაცვის ინსპექტორი;
22.05.2001-13.06.2002 წწ. – საქართველოს სახელმწიფო დაცვის სპეციალური სამსახურის სპეციალური დანიშნულების ქვედანაყოფის ქვეგანყოფილების უფროსის მოადგილე;
01.11.2000-22.05.2001 წწ. – საქართველოს სახელმწიფო დაცვის სპეციალური სამსახურის სპეციალური დანიშნულების ქვედანაყოფის საბრძოლო ჯგუფის უფროსი;
28.05.1999-01.11.2000 წწ. – საქართველოს სახელმწიფო დაცვის სპეციალური სამსახურის სპეციალური დანიშნულების ქვედანაყოფის ოფიცერი;
04.06.1998-28.05.1999 წწ. – საქართველოს სახელმწიფო დაცვის სპეციალური სამსახური, დაცვის თანამშრომელი;
იცის რუსული და ინგლისური.
ჰყავს მეუღლე და ორი შვილი.
