პატივცემულო რედაქცია! მაინტერესებს, კონკრეტულად რომელია ვაზის გურული ჯიშები. ვცხოვრობ დაბალ ზონაში, სადაც გაცილებით ცივა, ვიდრე მაღალ ადგილებში. გთხოვთ, მირჩიოთ, რომელი ჯიშის გაშენება სჯობს ჩემს საკარმიდამო ნაკვეთში?
პატივისცემით კახა ქინქლაძე, ოზურგეთი, სოფელი, გურიანთა
ვაზის გურული ჯიშები ძალზე ბევრია: აკიდო, ათინაური, ალადასტური, თეთრი კამური, კლარჯული, კეთილოური, მტევანდიდი, მტრედისფეხა, საკმიელა, საფერავი, ქაქუთურა, შავი კამური, ჩხავერი, ჭუმუტა, ჯანი, ნაკაშიძის ჯანი…
საერთოდ, დაბალ ზონაში, მით უფრო, თუ იქ ჭარბტენიანი ნიადაგია, სახარბიელო არ არის ვაზის გაშენება იმიტომ, რომ, შესაბამისად, შაქრიანობა არ ექნება მაღალი. მიუხედავად იმისა, რომ სასურველი არ არის ვაზის ჩაყრა დაბალი ზონის გურიაში, ეს იმას არ ნიშნავს, რომ არ შეიძლება! ნებისმიერი ჯიში ივარგებს, ოღონდ სიმწიფისას შაქარი უნდა დააგროვოს ნაყოფმა, რაც ასეთ ადგილებში ნაკლებად ხდება და ხარისხიც იქნება დაბალი.
სხვა ჯიშებთან შედარებით, სასურველია, დაბალ ზონაში დაირგოს ათინაური. მიწა თუ ტენიანია, ნაკვეთის ირგვლივ აუცილებლად მოახდინოთ დრენაჟირება, ხოლო თუ თიხნარია, მოაკირიანეთ და საქმეს მერე შეუდექით.
ანდრო ვაშალომიძე
