კომპანია „წყალ მარგებელს“ 2017 წელს 20 წელი შეუსრულდა, ამ საიუბილეო თარიღს დაემთხვევა 24 ივნისს გურიაში, სოფელ ნაბეღლავში, კომპანიის ახალი, მრავალპროფილური უალკოჰოლო სასმელების ქარხნის გახსნა.
ღონისძიებას ესწრებოდნენ პრემიერ მინისტრი ბ-ნი გიორგი კვირიკაშვილი, მინისტრთა კაბინეტის წარმომადგენლები, გურიის გუბერნატორი ბ-ნი გია სალუქვაძე, ჩოხატაურის მუნიციპალიტეტის გამგებელი ბ-ნი ირაკლი კუჭავა, ლანჩხუთისა და ჩოხატაურის მაჟორიტარი დეპუტატი ქ-ნი ნინო წილოსანი, კომპანია ‘რაუხის“ მფლობელი და აღმასრულებელი დირექტორი ბ-ნი იურგენ რაუხი, შვეიცარიის ელჩი საქართველოში ბ-ნი ლუკას ბეგლინგერი, ავსტრიის ელჩი საქართველოში ბ-ნი არად ბენკო, 100-მდე უცხოელი სტუმარი და მთლიანობაში 600 სტუმარზე მეტი.
ამ ქარხანაში „წყალი მარგებელი“ აწარმოებს, როგორც მინერალურ წყალ „ნაბეღლავსა“ და წყაროს წყალ „ბახმაროს“, ასევე ევროპაში წვენებისა და უალკოჰოლო სასმელების ერთ-ერთი უმსხვილესი მწარმოებელი კომპანია „რაუხის“ წვენებს, ცივ ჩაის, ლიმონათსა და სხვა უალკოჰოლო სასმელს. ქვეყნისთვის მნიშვნელოვანია, რომ საქართველოში წარმოებული საერთაშორისო ბრენდის პროდუქტი მრავალ ქვეყანაში გავა ექსპორტზე.
ჩვენი ქარხანა თანამედროვე ინდუსტრიის თვალსაჩინო ნიმუშია, იგი სრულად შეესაბამება მსოფლიო სტანდარტებს და რეგიონის უმსხვილეს საწარმოს წარმოადგენს. აშენდა 20 000 კვადრატული მეტრის ახალი შენობა და ხიდი მდინარე გუბაზეულზე, ასევე მოეწყო გარე ინფრასტრუქტურა 3 ჰექტარზე. დამონტაჟდა შვიდი საწარმოო ხაზი. ქარხნის ტექნოლოგიური დაგეგმვა და აღჭურვა სრულად უზრუნველყო მსოფლიოში ცნობილმა კომპანიებმა გერმანულმა „Krones”-მა და შვედურმა „Tetra Pak”-მა.
ამ პროექტის ფარგლებში ქარხნის გათბობა-გაგრილებისთვის და ტექნოლოგიური მიზნებისათვის გამოყენებული იქნება განახლებადი ენერგია, რაც ეკოლოგიურს ხდის წარმოებას.
აღსანიშნავია, რომ მხოლოდ ჩოხატაურის მუნიციპალიტეტის ადგილობრივი ბიუჯეტი 2016 წელს კომპანიამ სხვადასხვა გადასახადების სახით მთლიანობაში დაახლოებით 1 400 000 ლარამდე გადაიხადა. 2017 წელს კი გადასახადის თანხის მნიშვნელოვანი ზრდა იგეგმება.
მინდა დიდი მადლობა გადავუხადო ყველას, ვინც მონაწილეობა მიიღო ჩვენი ქარხნის მშენებლობაში. განსაკუთრებით ქართულს კომპანიებს: „ინსტა“-ს, „სინერჯი“-ს, „საქწყალპროექტ“-ს, „ენერგოპრო“-ს, „ანკარა ქეთერინგ“- ს, იმ ადამიანებს, ვინც თავდაუზოგავად შრომობდა თვეების მანძილზე, ჩვენს ყველა თანამშრომელს, ვინც თუნდაც მცირედი წვლილი შეიტანა ამ პროექტის წარმატებით დასრულებაში.
მინდა მადლობა გადავუხადო ადგილობრივ ხელისუფლებას, რომლისგანაც მუდმივად ვგრძნობდით ყურადღებასა და მხარდაჭერას.
განსაკუთრებულად მინდა გამოვყო კომპანია შპს „გზამშენი 18“ და მისი დირექტორი ბ-ნი თემურ ჯახვა. მათ უმოკლეს ვადაში პროფესიონალურად შეასრულეს უდიდესი სამუშაო და მათი ძალისხმევით დაგებული გზები კიდევ დიდი ხნის მანძილზე დარჩება ხეობის სოციალურ სამსახურში.
პროექტის წარმატებით დასრულება და „რაუხისა“ და „წყალი მარგებლის“ თანამშრომლობა მნიშვნელოვან წვლილს შეიტანს ქვეყნის ექსპორტის ზრდასა და ეკონომიკურ წინსვლაში.
სს „წყალი მარგებლის“ დირექტორი გია გოგოლაძე
