ქართული ოცნება” თბილისის მერობის კანდიდატს ხვალ წარადგენს. მმართველი გუნდი ამ თანამდებობაზე ვიცე პრემიერს, ენერგეტიკის მინისტრს კახა კალაძეს დაასახელებს, თუმცა მანამდე, დაგეგმილია პოლიტსაბჭოს სხდომა, რის შემდეგაც პრემიერმინისტრი გააკეთებს განცხადებას.
მმართველ გუნდში აცხადებენ, რომ კახა კალაძე თბილისის მერობის უალტერნატივო კანდიდატია.
„კახი არის ჩვენი გუნდის ერთ-ერთი ძლიერი ფორვარდი და რა თქმა უნდა, მისი განხილვა ამ პოზიციაზე არის ძალიან რეალური. მას აქვს დიდი შანსები და მას აქვს დიდი შესაძლებლობები, რომ იყოს წარმატებული მერი,“ – განაცხადა არჩილ თალაკვაძემ.
„ქართულ ოცნებაში“ მეორე ტურს არ ელოდებიან. პარლამენტის ვიცე სპიკერის, გია ვოლსკის თქმით, კახა კალაძე მერის არჩევნებში გამარჯვებას პირველივე ტურში შეძლებს.
მისივე თქმით, კალაძე კარგი მეურნეა და მისი თვისებები სრულად შეესაბამება იმ ამოცანებს, რომელიც დედაქალაქის წინაშე დგას.
rusatvi2.ge
