საქართველოს კალათბურთელთა ეროვნული ნაკრები მომავალი ევროპის ჩემპიონატისთვის ემზადება. ჩვენი გუნდი ამჟამად ლიტვის ქალაქ კლაიპედაში იმყოფება და საერთაშორისო ამხანაგური ტურნირისთვის ემზადება. ამ შეჯიბრში ქართველების გარდა ლიტვის, ლატვიისა და პოლონეთის ნაკრებები იასპარეზებენ. საქართველოს ეროვნული გუნდი ხვალ ლატვიას დაუპირისპირდება.
კვლავ უგუნდოდაა საქართველოს ნაკრების ფეხბურთელი ჯაბა კანკავა. რამდენიმე დღის წინ მან ფრანგულ „რეიმსთან“ ხელშეკრულება ოფიციალურად გაწყვიტა. გუშინ თურქულ სპორტულ მასმედიაში გავრცელდა ცნობა რომ ქართველის სამსახურით ორი გუნდი – „გენჩლერი“ და „სივასპორი“ არიან დაინტერესებულები. ამ დღეებში კანკავა თურქეთს ესტუმრება და ამ გუნდების ხელმძღვანელებს შეხვდება.
ქართველმა ფეხბურთელმა ნიკა ძალამიძემ „იუვენტუსთან“ ერთწლიანი ხელშეკრულება გააფორმა. საუბარია არა იტალიურ გუნდზე, არამედ რუმინეთის პირველობაზე მოასპარეზე ბუქარესტის „იუვენტუსზე“. ძალამიძე ბოლო პერიოდში პოლონურ „ლეჩნაში“ თამაშობდა. ამ გუნდს ის რამდენიმე კვირის წინ გამოეთხოვა.
კატალონიურმა „ბარსელონამ“ ოფიციალურად განაცხადა რომ ბრაზილიის ეროვნული გუნდის თავდამსხმელი ნეიმარი გუნდს ტოვებს და კარიერას ფრანგულ „პარი სენ ჟერმენში“ გააგრძელებს. დღეს ნეიმარი პარიზულ გუნდთან სამედიცინო შემოწმებას გაივლის, უახლოეს დღეებში კი კონტრაქტსაც გააფორმებს.
ორი დღის წინ ნეიმარი ქალაქ ბარსელონაში იმყოფებოდა. საღამო ხანს ერთ-ერთ ადგილობრივ ბარში შეიარა და დიდ შარსაც გადაეყარა. ნეიმარი „ბარსას“ ფანებს დაუპირისპირდა. რომლებმაც ბრაზილიელი ვარსკვლავის მისამართით უცენზურო გამონათქვამები არ დაიშურეს. სანამ დაპირისპირება ხელჩართულ ჩხუბში გადაიზრდებოდა ინციდენტი დაცვის თანამშრომლებმა განმუხტეს.
ნეიმარს „პარი სენ ჟერმენში“ ალბათ „მონაკოს“ თინეიჯერი შემტევი კილიან მბაპეც შეუერთდება. დიახ, არ გაიკვირვოთ. რამდენიმე დღის წინ გავრცელდა ცნობა რომ მბაპე მადრიდის „რეალმა“ შეიძინა, მაგრამ გამოხდა ხანი და ეს გარიგება სიმართლე არ აღმოჩნდა. ბოლო წუთებში ფეხბურთელმა „სამეფო გუნდში“ გადასვლაზე უარი განაცხადა. გუშინ მბაპე „მონაკოს“ ხელმძღვანელობას შეხვდა და განუცხადა რომ კარიერის გაგრძელება „პარი სენ ჟერმენში“ სურს. ფრანგული მასმედიის მტკიცებით ყველაფერი უკვე გარკვეულია და ახალგაზრდა თავდამსხმელს პარიზულ გუნდთან პირადი ხელშეკრულება უკვე გაფორმებული აქვს. მაინც სად გადადის მბაპე? ყველაფერი ალბათ უახლოეს დღეებში გადაწყდება.
