საკონსტიტუციო სასამართლოს მოსამართლეობის კანდიდატად საპარტალემტო უმრავლესობამ ევა გოცირიძე დაასახელა. მისი კანდიდატურა 2016 წელს ,,ქართულმა ოცნებამ“ ადამიანის უფლებათა ევროპულ სასამართლოში მოსამართლეობის კანდიდატად წარადგინა, თუმცა ევროსაბჭოს საპარლამენტო ასამბლეამ გოცირიძის კანდიდატურა დაიწუნა. საქართველოს პარლამენტში ევა გოცირიძის, როგორც საკონსტიტუციო სასამართლოს მოსამართლედ წარდგენას უმრავლესობაში შემავალმა ექვსმა ფრაქციამ დაუჭირა მხარი. კანდიდატურის დამტკიცების შემთხვევაში კი ის ლალი ფაფიაშვის ჩაანაცვლებს, რომელსაც საკონსტიტუციო სასამართლოში უფლებამოსილების ვადა 28 დეკემბერს ეწურება.
საპარლამენტო უმრავლესობის წევრი გიორგი გაჩეჩილაძე ფიქრობს, რომ საკონსტიტუციო სასამართლოს მოსამართლის კანდიდატად ევა გოცირიძის დასახელება სწორია, რადგან მისი თქმით, გოცირიძე ამ თანამდებობისთვის შესაბამისი გამოცდილებითა და უნარ-ჩვევებით გამოირჩევა. როგორც ,,ქართული ოცნების“ წევრი აცხადებს, საკონსტიტუციო სასამართლოში მოსამართლეთა დამოუკიდებლობა დაცულია.
,,ვფიქრობ, სწორია მმართველი გუნდის მიერ საკონსტიტუციო სასამართლოს მოსამართლის კანდიდატად ევა გოცირიძის დასახელება, რადგან ის გამოცდილი და პრინციპული პიროვნება. ცრუ ინფორმაცია ვრცელდება, სტრასბურგის სასამართლოში მისი, როგორც მოსამართლის დაწუნება კი არ მომხდარა, არამედ სხვა პროცესი განვითარდა და პირობები გამკაცრდა. ეს უფრო იურისტებს ეცოდინებათ, რომლებიც ჩართულნი იყვნენ ამ პროცესში. ვფიქრობ, არასწორია რაიმე სახის კრიტიკა საკონსტიტუციო სასამართლოსთან მიმართებაში იმიტომ, რომ საკონსტიტუციო სასამართლოს მოსამართლეები პრეზიდენტზე, პარლამენტზე და ხელისუფლებაზე დიდი ვადით აირჩევიან, აქედან გამომდინარე, ისინი თავისუფალნი და დამოუკიდებლები არიან ზეგავლენისგან. ის ფაქტი, რომ მოსამართლეები ხელისუფლების მიერ აირჩევა არაფერს ნიშნავს. მთავარი მათი ხელშეუხებლობაა, რომელიც მაქსიმალურად უნდა იყოს დაცული“ _ განაცხადა გიორგი გაჩეჩილაძემ
საპირისპიროს ფიქრობს ადვოკატთა ასოციაციის პრეზიდენტი ზაზა ხატიაშვილი. ის ეწინააღმდეგება მმართველი გუნდის გადაწყვეტილებას და აცხადებს, რომ ევა გოცირიძე ხელისუფლბის ნება-სურვილის გამტარებელი იქნება. მისი თქმით, ,,ქართულმა ოცნებამ“ გოცირიძეს ლევან მურუსიძის მხარდაჭერისთვის საჩუქარი გაუკეთა.
“ქალბატონ ევა გოცირიძესთან მიმართებით სამოქალაქო საზოგადოების მხრიდან ძალიან ბევრი კითხვის ნიშანი არსებობდა. როცა ხელისუფლებამ ევა გოცირიძე ადამიანის უფლებათა ევროპის სასამართლოს მოსამართლის კანდიდატად დაასახელა, მაშინ აქციები მოვაწყვე და გავაპროტესტე გადაწყვეტილება. ვფიქრობ, ,,ქართულმა ოცნებამ“ ევა გოცირიძეს საჩუქარი გაუკეთა, იმიტომ, რომ მან ხმა მისცა ლევან მურუსიძეს. ევა გოცირიძეს ნათქვამი აქვს, მე ვიცოდი ლევან მურუსიძის არასახარბიელო რეპუტაციის თაობაზე და მაინც მივეცი ხმაო. როგორ შეიძლება ასეთი მოსამართლე დამოუკიდებელი იყოს. ის ხელისუფლების ნება-სურვილის შემსრულებელი იქნება. მე გარკვეულწილად ვიცოდი კიდეც, რომ ხელისუფლბა ევა გოცირიძეს ამ თანამდებობაზე დაასახელებდა“ _ განაცხადა ხატიაშვილმა.
შეგახსენებთ, რომ ევა გოცირიძე 2017 წელს მოსამართლეების კრიტიკის შეზღუდვის ინიციატივით გამოდა. მაშინ გოცირიძე აცხადებდა, რომ ჟურნალისტური ეთიკის ქარტია არაეფექტურია, რადგან მოსამართლის მიმართ გამოთქმული კრიტიკული აზრის გამო ჟურნალისტებს სანქციები არ უწესდებათ.
ჟურნალისტებთან საუბრისას ევა გოცირიძემ ეს განცხადება უარყო და თქვა, რომ მას მცდელობა კი არ ჰქონდა თავისუფალი აზრი შეეზღუდა, არამედ მედიის წარმომადგენლებს შეახსენა, რომ გამოხატვის თავისუფლება ცილისმწამებლურ განცხადებებს არ გულისხმობს.
”მნიშვნელოვანია თვითკონტროლი, რომელიც ჟურნალისტებმა საკუთარი ფუნქციის შესრულებისას უნდა განახორციელონ. იყო ბევრი შემთხვევა, როცა ჟურნალისტების ან სხვათა მხრიდან, ვისაც ტელეარხებზე იწვევდნენ, ხდებოდა სხვა პირების შეუარაცხყოფა. მე ვცდილობდი საზოგადოებისთვის იმის შეხსენებას, რომ არც მედიის თავისუფლება და არც გამოხატვის თავისუფლება შეურაცხყოფისა და ცილისწამების თავისუფლებას არ გულისხმობს”- განაცხადა გოცირიძემ.
ევა გოცირიძემ დაამთავრა თბილისის სახელმწიფო უნივერსიტეტის იურიდიული ფაკულტეტი სამართალმცოდნეობის სპეციალობით 1987 წელს. 1980 წლიდან მუშაობდა საქართველოს უზენაეს სასამართლოში სხვადასხვა თანამდებობაზე, 1980-1981 წწ-ში იყო კოდიფიკატორი,ხოლო 1980-1984 წწ-ში ინსპექტორი. 1990-1991 წწ-ში მუშაობდა მოქალაქეთა მიღებისა და საჩივრების განყოფილების კონსულტანტად. 1996-1997წწ-ში იყო სასამართლოს პრაქტიკის განზოგადების განყოფილების უფროსი.
1997 წელს იყო ადამიანის უფლებათა ცენტრის დირექტორი. 2000 წლიდან იყო საქართველოს უზენაესი სასამართლოს ადამიანის უფლებათა ცენტრის დირექტორი. 2005 წლიდან იყო საქართველოს უზენაესი სასამართლოს მრჩეველი ადამიანის უფლებათა ევროპულ სასამართლოში. 2011 წლიდან საქართველოს საპატრიარქოს წმინდა ანდრია პირველწოდებულის სახელობის ქართული უნივერსიტეტის მოწვეული სპეციალისტი. საქართველოს იუსტიციის საბჭო, წევრი 1997-2000 წწ-ში არის საქართველოს იუსტიციის უმაღლესი საბჭოს წევრი. 2013- 2017 წლებში იყო იუსტიციის უმაღლესი საბჭოს არამოსამართლე წევრი.
