ჩვენს მკითხველს მუდამ ვურჩევთ, რომ მწვანილეულის დათესვა აუცილებელია ყოველი თვის დასაწყისში ან ორ თვეში ერთხელ. ასეთ მწვანილთა რიცხვს მიეკუთვნება ქინძი, თვის ბოლოკი, წიწმატი და სხვა. განსაკუთრებით უნდა მივაქციოთ ყურადღება საშემოდგომო თესვას, რადგან ზამთარში მწვანილეულის ფასი ძალიან მატულობს, თუმცა, ჩვენი მოსახლეობის დიდმა ნაწილმა, ვინც მიწის ნაკვეთებს ფლობს, ჯერ კიდევ ვერ ისწავლა დროული დათესვა და ნათესის ისე მოვლა, რომ მომდევნო ოთხი-ხუთი თვის განმავლობაში საკუთარი მწვანილი ჰქონდეს ბოსტანში და საოჯახო ეკონომია დაზოგოს.
აგვისტოს დასაწყისში დათესილი ნიორი და ხუთ ოქტომბერს დათესილი ცერცვი დღეისთვის უნდა გამოიყურებოდეს ისე, როგორც ფოტოზე ჩანს. ვადების მიხედვით, ეს არის ყველაზე საუკეთესო მიდგომა ამ ორი აგროკულტურის მიმართ. თუმცა, თუ ჯერ არ დაგვითესია, სასწრაფოდ ვიმოქმედოთ, რადგან დეკემბერი კარს მოგვადგა. ვიდრე ნიადაგი კიდევ ინარჩუნებს სითბოს, დავთესოთ ცერცვი, ნიორი, ქინძი, ბოლოკი, ოხრახუში. ასევე, შეიძლება ფხალეულის _ წითელი, ჭყანა _ დათესვა. სასურველია ნათესებს, ცერცვის და ნივრის გარდა, ღამით პოლიეთილენი გადავაფაროთ, რათა თესლს გაღვივება და ამოსვლა არ გაუჭირდეს.
ახლა თითოეული დღე ძვირფასია მწვანილეულის დასათესად, რადგან აცივებასთან ერთად, ადვილი შესაძლებელია, თესლი მიწაში ჩალპეს და შრომამ ამაოდ ჩაგიაროთ.
კიდევ ერთხელ შევახსენებთ ჩვენს მეურნეებს, თითოეულ ოჯახს, ნუ დაიზარებენ თუნდაც პრიმიტიული ფორმით, პოლიეთილენგადაფარებული კვალსათბურის მოწყობას, რომ ზამთარში მწვანილეულის ყიდვა არ დაჭირდეთ.
ყველას კარგად ახსოვს გასული წლის ზამთრის პერიოდი, როცა ერთი კილოგრამი ქინძის ფასმა 20-25 ლარს მიაღწია, ასევე იყო ოხრახუშის, ნიახურის თუ ცერეცოს ფასი. სამწუხაროდ, დღეისთვის საკარმიდამო ნაკვეთებში რომ ჩამოვიაროთ, ვნახავთ, რომ უმრავლესობას ზემოთ აღნიშნული მწვანილეული დათესილი არ აქვს. ზამთარში კი ბევრს ვსაუბრობთ მწვანილის სიძვირეზე და “ვიღაცას” განუწყვეტლივ ვადანაშაულებთ ფასებზე “ცეცხლის წაკიდებაში”.
