„ვართ სოციალურად დაუცველი ოჯახი. წყლის მაღალი დავალიანების გამო, რომელიც 470 ლარს შეადგენს და ძველი დავალიანებაა, ელექტრო ენერგია გაგვითიშეს. დავალიანების გადანაწილების თხოვნით მივმართეთ კომპანია GWP-ს, მაგრამ არანაირი შედეგი არ არის. არც შეღავათები გვერიცხება კომუნალურ გადასახადებზე. დავალიანების გადანაწილებას ვიხვეწებით, მიუხედავად იმისა, რომ დავალიანება იმ დროისაა, როდესაც წყლის და შუქის თანხა ერთად მოდიოდა. ბავშვს ანემია აქვს. სოციალური დახმარებით მიღებული შემოსავალი წამლებსაც კი არ ყოფნის. თანხის ერთიანად გადახდის საშუალება არ გვაქვს. სინათლე რამდენიმე დღით მეზობელმა მოგვცა. იქნებ დამეხმაროთ “, _ ეს წერილი „გურია ნიუსმა“ თბილისში მცხოვრები მ. ყ.-სგან მიიღო, რის შემდეგაც კომპანია GWP-ს, იმის გასარკვევად დავუკავშირდით, თუ რატომ ეთქვა სოციალურად დაუცველ ოჯახს უარი წყლის მაღალი დავალიანების გადანაწილებაზე.
როგორც კომპანიიდან გვაცნობეს, აღნიშნულ აბონენტს თანხის გადანაწილებაზე უარი არ მიუღია და მან თვითონ დაარღვია რამდენიმე წლის წინ გადანაწილებული დავალიანების გადახდის პირობები.
„აღნიშნულ აბონენტს ვალის გადანაწილებაზე უარი არ მიუღია. 2011 წლიდან 5 წელიწადზე ჰქონდა გადანაწილებული დავალიანება, თუმცა, ის გადანაწილებულ დავალიანებას არ იხდიდა, რითაც დაარღვია ხელშეკრულების პირობები. მიუხედავად ამისა, კომპანია კეთილი ნებით ითვალისწინებს აბონენტის სტატუსს და მზად არის კიდევ ერთხელ გადაუნაწილოს დარიცხული დავალიანება. კომპანია „ჯორჯიან უოთერ ენდ ფაუერი“ დავალიანების გადანაწილების საკითხს განიხილავს აბონენტების მომართვის საფუძველზე. აუცილებლად უნდა აღინიშნოს, რომ კომპანია თითოეული აბონენტის დავალიანების საკითხს ინდივიდუალურად განიხილავს და გადასახადს უნაწილებს ორივე მხარისთვის მისაღები პირობებით“, _ გვაცნობეს GWP-დან.
იმის გასარკვევად კი, თუ რატომ არ დაერიცხა სოციალურად დაუცველ ოჯახს კანონით გათვალისწინებული კომუნალური ვაუჩერი, „გურია ნიუსი“ თბილისის მერიის სოციალურ მომსახურებათა სამსახურს დაუკავშირდა.
„ამ ოჯახს ჩარიცხული აქვს კომუნალურ გადასახადებისთვის გამოყოფილი ვაუჩერები. შეიძლება მიმდინარე თვის ქვითარი მიიღო, მაგრამ ამ თანხის ჩარიცხვა მოხდება იანვრის დასაწყისში. წინა თვისთვის გათვალისწინებული თანხა კი ჩარიცხული აქვს“, _ გვაცნობეს უწყებიდან.
