“ჩემ მიმართ გამოთქმული ფრაზები არის აბსურდული და არასერიოზული”, _ ამის შესახებ ეკონომიკისა და მდგრადი განვითარების მინისტრმა დიმიტრი ქუმსიშვილმა ბადაგონის საქმესთან დაკავშირებით განაცხადა.
მისივე განმარტებით, მთავრობამ ქვეყანაში საკუთრების უფლებას დაუბრუნა ფასეულობა და ბიზნესს მისცა თავისუფლება.
“ჩემ მიმართ გამოთქმული ფრაზები არის აბსურდული და არასერიოზული. ფრაზის შინაარსი მდგომარეობს იმაში რომ, როდესაც მე გახლდით ფინანსთა მინისტრი, ფინანსთა სამინისტროს საგამოძიებო სამსახურში შევიდა განცხადება. რა თქმა უნდა ეს არის აბსოლუტურად არასერიოზული და ამაზე მე კომენტარს მეტს ვერ გავაკეთებ.
ჩვენ ვართ მთავრობა რომელმაც ამ ქვეყანაში საკუთრების უფლებას დაუბრუნა ფასეულობა და ბიზნესს მისცა თავისუფლება. რაც შეეხება დისკრიმინაციის მცდელობას და შანტაჟს, საგამოძიებო უწყებებს სიმართლის დადგენის მიმართულებით ეს ხელს ვერ შეუშლის”, – განცხადა დიმიტრი ქუმსიშვილმა.
შეგახსენებთ, რომ 7 თებერვალს, კომპანია “ბადაგონში” ფინანსთა სამინისტროს საგამოძიებო სამსახური შევიდა. როგორც უწყება აცხადებს, “ბადაგონთან” დაკავშირებით დიდი ოდენობით წილის მართლსაწინააღმდეგოდ მითვისების საქმეზე გამოძიება 2017 წლის იანვარში დაიწყო. გამოძიება ფინანსთა სამინისტროს საგამოძიებო სამსახურმა “გრაკორო თრეიდინგ ლიმითედის” განცხადების საფუძველზე დაიწყო. საქმეზე გამოძიება სისხლის სამართლის კოდექსის 182-ე მუხლის (მითვისება ან გაფლანგვა) მე-3 ნაწილის “ბ” ქვეპუნქტის მიხედვით მიმდინარეობს. დამტკიცების შემთხვევაში, დანაშაული ისჯება თავისუფლების აღკვეთით ვადით შვიდიდან თერთმეტ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე. ბადაგონის” მფლობელი გიორგი სალაყაია ბრალდებებს უარყოფს. კომპანიის ადვოკატის ირაკლი ყანდაშვილმა განცხადებით “ბადაგონს” აქვს ყველა დოკუმენტაცია, რომელიც წილის შესყიდვის კანონიერებას ადგენს. გიორგი სალაყაიას კიდევ ერთი ადვოკატის ზაზა ხატიაშვილი განმარტებით, “ბადაგონის” საქმის უკან გავლენიანი პირები დგანან. მისი თქმით, “ბადაგონის” საქმით ბიზნესმენი დავით ბეჟუაშვილი და ვიცეპრემიერი და ეკონომიკის მინისტრი დიმიტრი ქუმსიშვილი არიან დაინტერესბული. ის, კომპანიაში ფინანსთა სამინისტროს საგამოძიებო სამსახურის შესვლას დავით ბეჟუაშვილისა და დიმიტრი ქუმსიშვილის მიერ დაგეგმილ პროვოკაციად აფასებს.
