რისთვის იყენებენ საკრებულოს თანამდებობის პირები ბიუჯეტიდან გამოყოფილ 3 850 ლიტრ საწვავს
ჟანა მეგრელიშვილი
გურია ნიუსი
ოზურგეთის მუნიციპალიტეტის საკრებულოს თანამდებობის პირები ყოველ თვეში, ბიუჯეტიდან 3 ათას 850 ლიტრ საწვავს იღებს. ამის შესახებ “გურია ნიუსი“ ერთხელ უკვე წერდა (ოზურგეთის მუნიციპალიტეტის საკრებულოს თავმჯდომარეს _ 600 ლიტრი; თავმჯდომარის მოადგილეს _ 350 ლიტრი; კომისიის თავმჯდომარეებს _ 200 ლიტრი; ფრაქციის თავმჯდომარეს _ 150 ლიტრი და მოადგილეს 50 ლიტრი, სულ _ 200 ლიტრი; აპარატის უფროსს _ 140 ლიტრი; აპარატის უფროსის მოადგილეს _ 80 ლიტრი; თავმჯდომარის თანაშემწეს _ 80 ლიტრი; განყოფილების უფროსს 40 ლიტრი; სპეციალისტებს _ 40 ლიტრი.
საინტერესოა, თუ რისთვის იყენებს საკრებულოს თანამდებობის პირები ბიუჯეტიდან გამოყოფილ საწვავს. აღნიშნულთან დაკავშირებით საჯარო ინფორმაციის მოთხოვნით მივმართეთ საკრებულოს, რომ მოეწოდებინათ ოზურგეთის მუნიციპალიტეტის საკრებულოში თანამდებობის პირებზე დარიცხული საწვავების შესახებ ინფორმაცია. კონკრეტულად: საკრებულოს თავმჯდომარის, მოადგილის, კომისიების, ფრაქციების თავმჯდომარეების მიერ გახარჯული საწვავების მიზნობრიობა, გაწერილი დღეების მიხედვით _ სად და რა მიზნებისთვის იხარჯება მათთვის გამოყოფილი საწვავი.
ოფიციალურად მოწერილ პასუხში მხოლოდ თანამდებობის პირებისთვის გამოყოფილი საწვავის ოდენობის შესახებ იყო აღნიშნული. შესაბამისად, პრესსამსახურის მეშვეობით თითოეულ მათგანს ვთხოვეთ, კომენტარის გაკეთება, რაში იხარჯება ბიუჯეტიდან გამოყოფილი საწვავი. მათ პასუხი ერთფეროვანი იყო _ გამოყოფილი საწვავი უფლებამოსილების გახორციელებას ხმარდება:
შოთა გოგიბერიძე, ფრაქცია “ოზურგეთელ მშრომელთა და ხელმოკლეთა ინტერესებისათვის“ თავმჯდომარე ამბობს, რომ საკრებულოს და ფრაქციის სხდომებზე გასატანი საკითხების განხილვის მიზნით, ხშირად უწევს გასვლა მუნიციპალიტეტის ტერიტორიაზე სხვადასხვა სოფლებში და ქალაქის უბნებში, გარდა ამისა, სხვა საკითხების დასაზუსტებლად დედაქალაქსა და მეზობელს მუნიციპალიტეტებში ჩასვლა.
ლევან მგელაძე, ფრაქცია “ოზურგეთის მომავლისთვის“ თავმჯდომარე, ქალაქის მაჟორიტარი: ჩემი, როგორც მაჟორიტარი დეპუტატის და ფრაქციის თავმჯდომარის უფლებამოსილების გახორციელებისა და მოსახლეობასთან შეხვედრების მიზნით.
გიორგი ჩაგანავა , საფინანსო-საბიუჯეტო კომისიის ხელმძღვანელი, დაბა ლაითური მაჟორიტარი: მოგეხსენებათ, მე გახლავართ დაბა ლაითურის მაჟორიტარი და ამავდროულად, კომისიის ხელმძღვანელი. თითქმის ყოველდღიურ რეჟიმში მიწევს შეხვედრები მოსახლეობასთან ადგილზე მისვლით. საჭიროებისამებრ, ვატარებთ გასვლით სხდომებსაც. სწორედ ჩემი უფლებამოსილების გახორციელების მიზანს ხმარდება საწვავის გარკვეული ლიმიტი.
გენო ჩავლეშვილი, ფრაქცია „ქართული ოცნება-მწვანეები“ თავმჯდომარე: სამსახურებრივი საქმიანობის შესასრულებლად, მათ შორის, მოსახლეობასთან შეხვედრებისათვის.
დავით მჟავანაძე , ფრაქცია „ერთიანი ნაციონალური მოძრაობის“ ყოფილი თავმჯდომარე, სოფელ ჭანიეთის მაჟორიტარი: მე შევთავაზებდი ყველა დაინტერესებულ პირს დილა დაიწყოს ჩვენთან ერთად და ჩაატარონ ასეთი ექსპერიმენტი, რას აკეთებს დეპუტატები მთელი დღის მანძილზე. მე ვერ ავიღებ პასუხისმგებლობას სხვა პარტიებსა და კოლეგებზე, თუმცა, „ერთიანი ნაციონალური მოძრაობის“ ყველა დეპუტატი სამუშაო და არასამუშაო დღეებს უთმობს სხვადასხვა სოფლებში მოსახლეობასთან შეხვედრებს. თითოეული წევრი, საჭიროებისამებრ, ფრაქციის თავმჯდომარის ავტომობილს იყენებს შეხვედრებისთვის. შევთავაზებ, ასევე, ყველა დაინტერესებულ პირს შეამოწმოს კილომეტრაჟები ყოველთვიურად, ხშირ შემთხვევაში, უფრო მეტია, ვიდე გამოყოფილი საწვავის ლიმიტი.
გოჩა კილაძე, აგრარულ საკითხთა, ქონების მართვისა და ბუნებრივი რესურსების საკითხების კომისიის თავმჯდომარე, სოფელ სილაურის მაჟორიტარი: სოფელში მოსახლეობასთან შეხვედრებს, გახლავართ კომისიის თავმჯდომარე და ვიყენებ უფლებამოსილების გახორციელების მიზნით.
ლელა საჯაია, განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის თავმჯდომარე, ქალაქის მაჟორიტარი: გამოყოფილი საწვავის ლიმიტი ხმარდება შეხვედრებს ამომრჩევლებთან. კომისია, რომლის თავმჯდომარეც ვარ, ბევრ სხვადასხვა სფეროს მოიცავს. მიწევს გასვლითი სხდომების ჩატარებაც, ასევე, კომისიის მუშაობიდან გამომდინარე, გასვლა მაქვს საგანმანათლებლო დაწესებულებებში, ასევე, სოციალურ საკითხებზე მუშაობისას მაქვს შეხვედრები. საწვავის ლიმიტი ხმარდება სამსახურებრივი მოვალეობის შესრულებას.
დავით ჭაკნელიძე, ფრაქცია “ქართული ოცნება-კონსერვატორების” თავმჯდომარე, სოფელი შრომის მაჟორიტარი: სადეპუტატო უფლებამოსილების, სამსახურებრივი მოვალეობის შესრულებას.
ბახვა დოლიძე, ფრაქცია “ქართული ოცნება-მრეწველების” თავმჯდომარე: ჩვენი ფრაქციის თითოეული წევრი ხვდება მოსახლეობას, მათ შორის მეც. დამტკიცებული საწვავის ლიმიტი ჩვენი უფლებამოსილების გახორციელებას ხმარდება.
დავით დარჩია, საკრებულოს თავმჯდომარე: საკრებულოს თანამდებობის პირები, მათ შორის მეც, დამტკიცებული ლიმიტის ფარგლებში, ხარჯებს ვიყენებთ უფლებამოსილების გახორციელების მიზნით.
ლავრენტი ბიგვავა, სივრცით-ტერიტორიული დაგეგმარების და ინფრასტრუქტურის კომისიის თავმჯდომარე: დამტკიცებული საწვავის ლიმიტი გამოიყენება სამსახურებრივად შესასრულებელი მოვალეობების გახორციელების მიზნით. მათ შორის: მუნიციპალიტეტის ტერიტორიაზე მდებარე ინფრასტრუქტურული პროექტების გახორციელებაზე პერიოდული მონიტორინგი ადგილებზე მისვლა; დასაგეგმი წლის ბიუჯეტში და მუნიციპალიტეტის განვითარების პრიორიტეტების დოკუმენტში შესატან ინფრასტრუქტურული პროექტების გახორციელების მიზანშეწონილობის შესწავლა შესაბამისი ობიექტების ადგილებზე დათვალიერების მიზნით; მუნიციპალიტეტის ტერიტორიებზე ქუჩების, მოედნებისა და სხვა უამრავი ქონების სახელდების მიზნით, მოსახლეობასთან კონსულტაციების გამართვა; მოსახლეობისა და იურიდიული პირების მიერ შემოტანილი განცხადებების, წინადადებების, რეკომენდაციების და საჩივრების შესწავლა ადგილზე მისვლის გზით, თანამდებობრივი უფლებამოსილების გახორციელების ფარგლებში, სხვადასხვა მიმდინარე ხასიათის სამუშაოების სრულყოფილად გახორციელება.
ეროდი გორდელაძე, სამანდატო, საპროცედურო, იურიდიულ საკითხთა და ეთიკის კომისიის თავმჯდომარე, სოფელ ბახვის მაჟორიტარი: გამოყოფილი საწვავის ლიმიტი ხმარდება კომისიაში საკითხების წინასწარ მომზადებასა და შესწავლას. ამომრჩევლებთან შეხვედრას, მათ მიერ დასმული ცალკეული საკითხების მოგვარებას, ცალკეულ დავალებათა შესრულებას. მიღებული ცალკეული წერილებისა და საჩივარ-განცხადებების შესწავლას, ადგილზე მისვლით.
გიორგი ღურჯუმელიძე, საკრებულოს თავმჯდომარის მოადგილე: ლიმიტის ფარგლებში გამოყოფილი ხარჯების განკარგვა ხდება სამსახურებრივი უფლებამოსილებებისა და დეპუტატის უფლებამოსილებების გასახორციელებლად. ლიმიტირებული ოდენობის ხარჯვა ხდება ფაქტობრივი ხარჯის მიხედვით. ხოლო ლიმიტის სრულად არ ათვისების შემთხვევაში, ის ეკონომიის სახით რჩება მუნიციპალიტეტის ბიუჯეტში.
ტარიელ აროშიძე, ფრაქცია „ქართული ოცნების“ თავმჯდომარე სოფელ კონჭკათის მაჟორიტარი: მე არა მარტო სოფელ კონჭკათის მაჟორიტარი, არამედ უმრავლესობის ფრაქციის ხელმძღვანელი ვარ. მუდმივ კომუნიკაციაში ვარ ამომრჩევლებთან, როგორც ინდივიდუალურ რეჟიმში, ასევე, ვმართავ შეხვედრებსაც სხვადასხვა სოფლებში. გარდა ამისა, საკრებულოს დარგობრივი კომისიების მუშაობაში ვერთვები, მიწევს ჩემს კოლეგებთან ერთად გასვლითი სხდომებიც. გამოყოფილი საწვავი, რა თქმა უნდა, ხმარდება უფლებამოსილების გახორციელებას.
