ოზურგეთის მუნიციპალიტეტის მერიის წინააღმდეგ სასამართლო დავას არაერთი დაქვეითებული საჯარო მოხელე განაგრძობს. ერთ-ერთი მათგანია ოზურგეთის მუნიციპალიტეტის მერიის ადმინისტრაციული სამსახურის ყოფილი უფროსი ხათუნა სურგულაძე. იგი აღნიშნული თანამდებობიდან საინვესტიციო განყოფილების უფროსად ჩამოაქვეითეს და, როგორც თვითონ განმარტავს, ეს იმიტომ მოხდა, რომ ოზურგეთის მუნიციპალიტეტის მერიამ მობილობის პროცესი კანონმდებლობის უხეში დარღვევით განახორციელა.
_„ადგილობრივი თვითმმართველობის კოდექსის თანახმად, ახლადარჩეულ მერს საჯარო სამსახურის ბიუროსთან კოორდინაციით უნდა უზრუნველეყო 2017 წელს გაუქმებული მუნიციპალიტეტის საჯარო მოსამსახურეთა მობილობის წესით გადაყვანა ახალშექმნილ მუნიციპალიტეტებში. მობილობა კი ითვალისწინებს, რომ მოსამსახურე, მისივე თანხმობით, გადაყვანილი იქნეს იმავე ან სხვა საჯარო დაწესებულებაში მისი თანამდებობის ტოლფას თანამდებობაზე, ხოლო ასეთი თანამდებობის არარსებობისას _ დაბალ თანამდებობაზე, მისი კომპეტენციის გათვალისწინებით. ჩემ შემთხვევაში, მერიაში ტოლფასი თანამდებობების არსებობის მიუხედავად, მოხდა ჩემი დაქვეითება, _ გვითხრა სურგულაძემ და აღნიშნა ისიც, რომ ადმინისტრაციული სამსახურის უფროსად, მიუხედავად კონკურსისა, რომელიც ფორმალობად მიაჩნია, მაინც შარაშენიძის ფავორიტი გოგი ინწკირველი დაინიშნება, რომელიც არჩევნებზე მისი აქტიური მხარდამჭერი იყო და ჯერ კიდევ 2017 წლის 20 ნოემბერს განაცხადა ერთ-ერთ ადგილობრივ მედიასთან შარაშენიზძმ, რომ ამ სამსახურის უფროსად გოგოი ინწკირველს მოიაზრებდა.
კითხვაზე, თუ რა საწინააღმდეგო არგუმენტები წაუყენა მას მერიამ, ხათუნა სურგულაძე ამბობს, რომ მერია ამას ხსნის „ახალი სტრუქტურული ერთეულების შექმნით“ და შესაბამისად, „ფუნქციონალური“ ცვლილებით, რომ მე შესაბამისი კვალიფიკაცია არ გამაჩნია ამ ახალ სამსახურში უფროსად მუშაობისა. ძალიან ალოგიკურია ეს ახსნა, ვინაიდან დღეის მდგომარეობით, სამი სამსახურის უფროსის პოზიციაზე „ვერ შეირჩა“ მოსამსახურეები, მაშინ, როდესაც რიგი პროფესიონალი და კვალიფიციური ადამიანები დაქვეითდნენ თანამდებობრივად. ეს პოლიტიკურ დევნა და ნეპოტიზმია, _ ამბობს სურგულაძე.
ყველაზე მთავარი _ თუ რა მოლოდინი აქვს ხათუნა სურგულაძეს სასამართლო პროცესიდან, ის ამბობს, რომ ოზურგეთის მუნიციპალიტეტის მერმა, მისი აზრით, მობილობა აღიქვა არა ვალდებულებად, არამედ საკუთარ უფლებად. ამიტომ მიმართა სასამართლოს და აქვს იმედი, რომ რაკი საჯარო სამსახურის შესახებ ახალმა კანონმა ბევრი რამ შეცვალა მოხელის სასარგებლოდ, სიმართლე გაიმარჯვებს.
_ მობილობა ვალდებულებაა და არა საკუთარი უფლება. ის აბსოლუტურად ახალი რეგულაცია და ამ მიმართულებით სასამართლო პრაქტიკა ნაკლებად არსებობს. ამიტომ წინასწარ დასკვნის გაკეთება არამართებულად მიმაჩნია. ის კი მინდა, მივმართო ოზურგეთის მუნიციპალიტეტის საკრებულოს ყველა წევრს, დაინტერესდნენ ოზურგეთის მუნიციპალიტეტის მერიის მიერ გახორციელებული მობილობის პროცესით, _ გვითხრა მან.
ხათუნა სურგულაძის სასამართლო პროცესი ჯერ ჩანიშნული არ არის. მან გვითხრა, რომ სასამართლოს აქვს ხუთი თვის ვადა. სამი თვე უკვე შესრულდა და ყოველდღე ელოდება პროცესის ჩანიშვნას.
“გურია ნიუსმა” კომენტარისთვის დაკავშირებით სცადა ოზურგეთის მუნიციპალიტეტის მერთან კონსტანტინე შარაშენიძესთან, მაგრამ მან ჩვენს სატელეფონო ზარებს არ უპასუხა. ჩვენ დავუკავშირდით მერიის პრესასთან და საზოგადოებასთან ურთიერთობის სამსახურის უფროსს ეკატერინე მგელაძეს, რომელმაც გვიპასუხა, რომ ვერც თითონ შეძლო შარაშენიძესთან დაკავშირება.
