დღეს, ოზურგეთში, დიდი სამამულო ომის დასრულებისა და ფაშისტურ გერმანიაზე გამარჯვების 73-ე წლისთავის აღსანიშნავი ღონისძიება ჩატარდა.
ღონისძიებას ოზურგეთის თეატრის დირექტორი ზაზა ჯინჭარაძე უძღვებოდა.
_ ჩვენ გვერდით არიან ისინი, ვინ საკუთარ თავზე გამოსცადეს ფაშიზმის სისასტიკე და ომის საშინელება. დღეისთვის, ოზურგეთში შვიდი ვეტერანია რეგისტრირებული. მათ მუნიციპალიტეტის მერიამ საჩუქარი მოუმზადა, თითოეულს 350 ლარის ოდენობით. ხოლო ვეტერანთა დეპარტამენტმა თითოეულს 600 ლარი გადასცა. მივესალმოთ მათ და დიდხანს სიცოცხლე ვუსურვოთ, _ მიმართა ზაზა ჯინჭარაძემ შეკრებილ საზოგადოებას.
გურიის გუბერნატორი მერაბ ჭანუყვაძე თითოეულ ვეტერანს მიესალმა.
„შეუფასებელია თქვენი ღვაწლი ჩვენი სამშობლოსთვის. თქვენ ხართ მაგალითი, როგორ უნდა ვიბრძოლოთ ჩვენი ქვეყნისთვის. განსაკუთრებული პატივი უნდა მოგაგოთ თქვენ, ვინც ჩვენს გვერდით ხართ და გითხრათ უდიდესი მადლობა. ასევე, მადლობა უნდა ვუთხრათ მუნიციპალიტეტის მერიას და ვეტერანთა საბჭოს, რომლებიც ყოველ წელს აწესებენ საჩუქარს თქვენთვის, _ მიმართა მან ვეტერანებს და ასევე, მილოცვა გადასცა პრემიერ-მინისტრისგან. გუბერნატორმა მადლობა გადაუხადა ტარიელ თავდიშვილს, რომლის ინიციატივითაც ვეტერანებს უფასოდ ჩაუტარდებათ ნებისმიერი სამედიცინო გამოკვლევა.
მუნიციპალიტეტის მერის მოადგილემ, ირაკლი სირაძემ ჯანმრთელობა და მხნეობა უსურვა ყველა ვეტერანს, რომლებმაც გაუძლეს ყველაზე დაუნდობელი და სასტიკი ომის საშინელებას.
_ წილობრივად საქართველომ ყველაზე მეტი მსხვერპლი გაიღო ამ ომში. გილოცავთ კიდევ ერთხელ და განსაკუთრებული პატივით მინდა, მოვიგონოთ ისინი, ვინც შეეწირნენ ამ სასტიკ ომს და მათი საფლავი დღემდე არ ვიცით, _ თქვა მან.
საზეიმო შეხვედრაზე მოსულ საზოგადოებას 93 წლის ვეტერანი შოთა მანჯავიძე მიესალმა:
„გისურვებთ, არავის გენახოთ ის საშინელება, რაც ჩვენ ვიხილეთ. ბედნიერ და მშვიდობიან ქვყანაში გეცხოვროთ“, _ თქვა ვეტერანმა.
ვეტერანებს მიესალმა ფოლკლორული ანსამბლი „იადონი“.
