თბილისში მომხდარ მოვლენებს საქართველოს პრეზიდენტი, გიორგი მარგველაშვილი გამოეხმაურა.
პრეზიდენტმა სამართალდამცავებს მადლობა გადაუხადა და აღნიშნა, რომ სახელმწიფო კინაღამ სამოქალაქო დაპირისპირებამდე მივიდა.
„ვნახეთ, როგორც პოლიტიკური, ისე ადმინისტრაციული ქმედებების სრული კრახი და შეცდომების მთელი წყება, რომელიც დაიწყო რეიდით თუ სპეცოპერაციით და შემდეგაც გრძელდებოდა. რანაირად შეიძლება მოვახერხოთ, რომ რამდენიმე საათში სამოქალაქო დაპირისპირების ასეთ ზენიტამდე მივიდეთ, დღემდე კითხვის ნიშნის ქვეშ რჩება. ამ კითხვის ნიშნებს სჭირდება ძალიან პირდაპირი პასუხები. რანაირად შეიძლება რამდენიმე საათში მოვახერხოთ, რომ მივიდეთ იმ წერტილამდე, რომ კინაღამ სამოქალაქო დაპირისპირების ზღვარზე აღმოვჩნდით. ჩვენი მიზანი იყო და რჩება, შევინარჩუნოთ ერთდროულად გამოხატვისა და სიტყვის თავისუფლება, ამავე დროს მოვახერხოთ და წესრიგი შევინარჩუნოთ როგორც დედაქალაქის ქუჩებში, ასევე საზოგადოებრივ-პოლიტიკურ პროცესში. მინდა, მადლობა ვუთხრა პატრულის წარმომადგენლებს, რომლებიც იქ იდგნენ და თავის მისიას ასრულებდნენ – არ მომხდარიყო დაპირისპირება ორ აქციას შორის. მადლობა ვუთხრა იმ მძიმე სამუშაოსთვის, რომელიც მათ ევალებოდათ და შეასრულეს“, _ განაცხადა მარგველაშვილმა.
