ხეხილის მოსავლიან ბაღებში, ისეთი უხვი მსხმოიარობისას, როგორც ამ სეზონზე გვაქვს გურიაში, განსაკუთრებით ხნიერ ნარგაობებში, ხშირია შტამბის განტოტვის ადგილას ტოტების ჩამოხლეჩა. ამის მიზეზია ვარჯის არასრულყოფილი ფორმირება და განტოტვების ცუდი შეხორცება. ასეთი ტოტი დიდი მოსავლის დროს ვერ უძლებს ნაყოფის სიმძიმეს და განშტოების ადგილას იხლიჩება. აღნიშნული ვარჯიდან ცალკეული დედა ტოტების გამოთიშვა ძლიერ ამცირებს მოსავალს, აქვეითებს ხის ცხოველმყოფელობას და ხშირად ახმობს მას.
ჩამოხლეჩის თავიდან ასაცილებლად ტოტები ლითონის წვრილი, გამძლე მავთულით უნდა დავამაგროთ. თუმცა, ეს ღონისძიება თუ არასწორად ჩავატარეთ, პირიქით, შესაძლებელია, უფრო დავაზიანოთ ტოტები _ მოჭერილი მავთული მცენარის ტოტებში ღრმად იჭრება და საფრთხეს უქმნის კამბიუმს, აფერხებს ფოთლებიდან ფესვებში საკვების მიწოდებას. ამიტომ ასეთი ტოტების დამაგრება რეკომენდირებულია, როგორც მავთულით, ისე სპეციალურად დამზადებული (თუნდაც შინაურ პირობებში) საჭერებით.
განტოტვიდან 30-40 სმ სიმაღლეზე, მოპირდაპირე ტოტებზე წვრილი ბურღით აკეთებენ თითო ნახვრეტს, რომელშიც არჭობენ მავთულის ბოლომოღუნულ სამაგრს. თუ განტოტვა დიდია და შეხორცება სუსტი, მაშინ ასეთი სამაგრი მოპირდაპირე მხარეზეც უნდა ჩაისვას, პირველის ოდნავ ზემოთ ან ქვემოთ. რკინის სამაგრი უნდა იყოს წვერწამახული. მავთულის მერქანში ჩარჭობის სიღრმე დამოკიდებულია ტოტის სისქეზე. პრაქტიკაში, უმჯობესია გამოვიყენოთ 1-1,4 სმ სისქის რკინის მავთული. ნახვრეტის სიგანე აღნიშნულ სიმაგრეზე, 2-3 მმ-ით ნაკლები უნდა იყოს.
ცუდი შეხორცების განტოტვის დამაგრება შესაძლებელია, აგრეთვე, მავთულის შემოჭერითაც. მხოლოდ შემოჭერის ადგილას, მავთულის ქვეშ, აუცილებლად უნდა დაიდოს რაიმე რბილი მასალა, მაგალითად რეზინი ან სხვა _ იგი რკინის მავთულს არ მისცემს მერქნის ჩაჭრის საშუალებას.
