ეკონომიკის მინისტრი, გიორგი ქობულია, რომელიც თანამდებობაზე, დაახლოებით, თვე-ნახევრის წინ დაინიშნა, შვებულებაში მესამედ გავიდა. ამავე მიზეზით მინისტრი მთავრობის სხდომას არც გუშინ დასწრებია.
ქობულია ,,კურიერთან“ საუბრისას აცხადებს, რომ მისი თანამდებობაზე დანიშვნა მოულოდნელი იყო, ამიტომ პირადი საქმეების მოგვარება ახლა უწევს. ამასთან, მინისტრი ჯანმრთელობის პრობლემებზეც საუბრობს.
,,მე რომ მცოდნოდა, მინისტრად ვდგებოდი არა ივლისში, არამედ მაისში, მაშინ, რა თქმა უნდა, ასეთი საკითხი არ იდგებოდა. რადგან გადაწყვეტილება მოხდა ძალიან სწრაფად, მე უკვე ვეღარ შევცვალე ბევრი რაღაც. ჯანმრთელობასთან მქონდა კიდევ რაღაცები დაკავშირებული, რაც უნდა დავასრულო“, _ განაცხადა ქობულიამ.
ეკონომიკის ახლად დანიშნულ მინისტრს ხანგრძლივი შვებულების გამო საზოგადოების ნაწილი მწვავედ აკრიტიკებს.
პოლიტოლოგი გია ხუხაშვილი მიიჩნევს, რომ ეკონომიკის მინისტრს საზოგადოების მიმართ პასუხისმგებლობის გრძნობა არ გააჩნია. ამასთან, ხუხაშვილის თქმით, მინისტრს არ აქვს გაცნობიერებული, რომ აღნიშნულ თანამდებობას იკავებს.
,,მისი დანიშვნა საკმაოდ სპონტანური გადაწყვეტილება იყო, რასაც არასერიოზულობის ელფერი დაჰკრავს.
პირველ რიგში, მინისტრს უნდა ჰქონდეს პასუხისმგებლობის მაღალი გრძნობა, მისთვის მნიშვნელოვანი უნდა იყოს საზოგადოებრივი აზრი და როდესაც მინისტრი თავს უფლებას აძლევს, რომ თვე-ნახევრის განმავლობაში შვებულებაში გავიდეს, ჩანს, რომ მისთვის საზოგადოებრივი აზრი, მაინცდამაინც, არ არის მნიშვნელოვანი.
არ გამორიცხავ, რომ მას აქვს შვებულებაში გასვლის რეალური მიზეზები, მათ შორის, ძველი საქმეების დახურვასთან დაკავშირებით და იგივე, ჯანმრთელობის პრობლემებთან დაკავშირებით, მაგრამ ეს უნდა სცოდნოდა იმ მომენტში, როცა თანხმდებოდა მინისტრობას.
ფაქტია, რომ მას კარგად არ აქვს გაცნობიერებული რომ მინისტრია იმიტომ, რომ რეპუტაცია შენდება პირველივე დღიდან და პირველივე დღიდან ასეთი სტარტი მის რეპუტაციას არანაირად წაადგება. ამას ვერ აცნობიერებს, რაც ძალიან ცუდია“, _გვითხრა ხუხაშვილმა.
ეკონომიკის მინისტრი თანამდებობაზე 12 ივლისს დაინიშნა.
