ქეთო თოხაძე ოზურგეთის მუნიციპალიტეტის სოფელ მელექედურის მკვიდრია. იგი 93 წლისაა, ხელჯოხის დახმარებითაც ვერ ახერხებს გადაადგილებას, თუ მეორე ხელით ღობეს არ ჩაეჭიდა. ასე მოძრაობს ის სახლიდან ჭიშკრამდე და პირიქით, რა დროსაც მეზობლებს გასძახის, რომ მშიერია, მთელი დღის განმავლობაში ლუკმა არ უჭამია და ითხოვს პურის ნატეხს.
ჩვენ სწორედ ასეთი ფაქტის შემსწრე გავხდით, როცა ის მეზობლებს ეძახდა და ლუკმას ითხოვდა.
_ სოციალური დახმარება მომიხსნეს, პენსია კი მაქვს, მაგრამ შვილიშვილი მყავს ინვალიდი, დასჭირდათ და წინასწარ გამოვიტანეთ. უარს ხომ ვერ ვეტყოდი. პენსიის ნაწილს ვიღებ, თუმცა, ეს წამალშიც არ მყოფნის. ვაჟიშვილთან ვცხოვრობ, მას ავადმყოფი შვილი ჰყავს, თავისი გასჭირვებია, უმუშევარია, რა ქნას. მეორე შვილს თავისი ოჯახი აქვს, ჩემთან ვერასდროს მოდის. ტყუილს ხომ არ ვამბობ. მეზობლების იმედად ვარ. გემუდარებით, წამიყვანონ მოხუცთა თავშესაფარში, არაფერს დავაშავებ. ძალიან გეხვეწებით, ასე მოვკვდები, მიშველეთ, _ გვეუბნება სასოწარკვეთილი მოხუცი.
ქეთო თოხაძეს, როგორც მეზობლებმა თქვეს, გასულ წელს ადგილობრივი ხელისუფლების დახმარებით სახლი გადაუხურეს და და ერთი პრობლემა მოეხსნა _ სახლში წვიმა აღარ ჩაუდის. თუმცა, მთავარი რაც არის _ მოხუცს მუდამ საკვების და მოვლის პრობლემა აქვს. როგორც მეზობლები აღნიშნავენ, მისი ასე ყოფნა უკვე აღარ შეიძლება.
_ ვაჟიშვილი კი უვლის შეძლებისდაგვარად, მაგრამ იმასაც იმდენი პრობლემა აქვს, უმუშევრობით დაწყებული დ შვილის ავადმყოფობით დამთავრებული, დიდი სურვილიც რომ ჰქონდეს, მოხუცის მოვლას ვერ მოახერხებს, _ ამბობენ მეზობლები.
ქეთო თოხაძეს არ ახსოვს, როდის მოუხსნეს სოციალური დახმარება. მისი თქმით, აქვს ნახევარ ჰექტრამდე მიწის ფართობი, რომელზეც ცოტა თხილი და ხილი კი არის გაშენებული, თუმცა, დიდი ხანია, მუშაობა აღარ შეუძლია.
_ წამიყვანეთ, გემუდარებით, როგორმე თავშესაფარში წამიყვანეთ, არ შეგიძლიათ, დამეხმაროთ? ღმერთი დაგეხმარებათ, რაიმე მომიხერხეთ, ნუ მომკლავთ, ასე ნუ დამტოვებთ. ყოველდღე მაკლდება ძალ-ღონე. ცალი ხელით ჯოხს რომ დავიჭერ, მეორეთი ღობეს ვეჭიდები და ასე მივდივარ ჭიშკრამდე. დღეს უფრო არ შემიძლია, ვიდრე გუშინ. დამეხმარეთ, როგორმე ვინმეს ხმა მიაწვდინეთ _ ასე მოგვძახოდა მოხუცი, რომელიც ცდილობდა ნაბიჯის გადმოდგმას, თან ღობეს ეჭიდებოდა.
„ნეტა, იმდენი შემეძლოს, გამოგყვეთ, მთავრობაში მიმიყვანდით და იგენი რავა წეიწყმენდენ ისე სულს, სადმე თავშესაფარში არ მიმიყვანონ“, _ მოგვაძახა მოხუცმა უკვე წამოსულებს.
ამ მეტად შემაწუხებელი ვითარების შესახებ, „გურია ნიუსი“ სოციალური მომსახურების სააგენტოს, გურიის სოციალური მომსახურების სამხარეო ცენტრის ხელმძღვანელს, თეა ლომჯარიას ესაუბრა.
“მოგეხსენებათ, რომ წელს გახორციელდა მთელი რიგი რეგულაციები სოციალური პროგრამის დანიშვნის პრიორიტეტების საკითხებში. ეს ცვლილებები, ძირითადად, იმიტომ გატარდა, რომ აუცილებელი საჭიროების მიხედვით უფრო მეტმა მოქალაქემ მიიღოს დახმარება.
ამ ეტაპზე მიმდინარეობს ქეთო თოხაძის ოჯახის შესწავლა ახალი მეთოდოლოგიის მიხედვით და მიენიჭება ახალი სარეიტინგო ქულა“, _ გვითხრა ლომჯარიამ.
