მექსიკური სამზარეულოს ძირითადი ელემენტები _ სიმინდის ფქვილი და ლობიო ყველაზე “ახლობელია” გურული სამზარეულოსთვის.
სიმინდის ლავაში _ ტორტილია, მექსიკელებისთვის პურს ცვლის და ძირითადი კერძები ტორტილიას გადახვევის ტექნიკით განსხვავდებიან ხშირ შემთხვევაში: ბურიტო ტორტილიაში იხვევა, ენჩილიადა ტორტილიას კონვერტში ჩადებული შიგთავსია; ჩიმიჩანგი _ ტორტილიას მილაკებში” ჩადებული შიგთავსი; უევოსი _ ტორტილიაზე შემწვარი ერბოკვერცხი.
ტორტილიას პურის ნაცვლად ატანენ სხვადასხვა სალათს და მრავალფეროვან საწებლებს, ტკბილ დესერტებს.
აცხობენ მხოლოდ სიმინდის ფქვილის, პურის ფქვილის ან შერეულ ტორტილიებს მარტივი ინგრედიენტებით: 400 გრამი პურის და მჭადის ფქვილის ნარევი; სუფრის (წვრილი) მარილი ნახევარი ჩაის კოვზი, ერბო ან ზეითუნის ზეთი 3 სუფრის კოვზი, 250-300 მლ ლიტრი წყალი.
ჯამში კარგად ავურიოთ ფქვილი და მარილი, ჩავასხათ ცხიმი და ნელ-ნელა დავამატოთ წყალი. მოვზილოთ რბილი ცომი. გადავიტანოთ ფიცარზე და ვზილოთ, სანამ ცომი ხელს არ მოშორდება. დააფარეთ ხელსახოცი და 30 წუთით დაასვენეთ ცომი.
ფიცარს მოაყარეთ ფქვილი, დაყევით ცომი ბურთულებად და გააბრტყელეთ ძალიან თხელ წრეებად. გახურებულ ტაფაზე, რომელიც არ იკრავს, გამოაცხვეთ ორივე მხრიდან უცხიმოდ. გამომცხვარი ტორტილიები 2-3 დღე კარგად ინახება მაცივარში, გამოყენების წინ კი უნდა შეათბოთ.
ბურიტო
მასალა: 500 გრ ძროხის ხორცის ფარში; 1 ქილა მოხარშული ხმელი ლობიო; 200 გრ პომიდვრის სოუსი; 150 გრ მაგარი ყველი; 1 თავი ხახვი; 1-2 კბილი ნიორი; თუ ცხარე გსურთ _ 1 ცალი წიწაკა ჩილი; თითო პატარა კონა ქინძი და ოხრახუში; მარილი, შესაწვავად _ ზეთი, 5 ცალი ტორტილია.
მომზადება: წვრილად დავჭრათ ხახვი და ნიორი, მოვშუშოთ დარბილებამდე, დავუმატოთ ფარში და შეყავისფერებამდე ვწვათ; დაწრეტილი ლობიო ჩავაყაროთ და ამოვურიოთ; დავასხათ პომიდვრის სოუსი, დავაყაროთ ალყად დაჭრილი წიწაკა, პილპილი, მარილი. 5-7 წუთი ვშუშოთ. ჩამოვდგათ ცეცხლიდან და მოვაყაროთ წვრილად დაჭრილი მწვანილი.
ტორტილიაზე დავდოთ მზა ფარში კიდეზე, მოვაყაროთ მსხვილად დახეხილი ყველი და გადავახვიოთ, თან კიდეები შევუკეცოთ, როგორც “ბლინჩიკს”.
თუ ბურიტოს წინასწარ ვამზადებთ, სუფრასთან მიტანამდე გრილზე ან უცხიმო ტაფაზე შეათბეთ.
