U-15 წლამდე ასაკის საქართველოს ჩემპიონატს ბერძნულ-რომაულ ჭიდაობაში წელს გურჯაანმა უმასპინძლა, სადაც შედეგიანი აღმოჩნდა ლანჩხუთის სპორტული ცენტრის აღსაზრდელის ოთარ (პოპი) ჯანელიძის ასპარეზობა.
ლანჩხუთელმა ფალავანმა ოთხი შეხვედრა ჩაატარა და ოთხივე შეხვედრა აშკარა უპირატესობით მოიგო.
ფინალურ ეტაპზე ჯანელიძის მეტოქე საქართველოს ნაკრების წევრი, ევროპის პირველობის მონაწილე და მიხეილ სალაძის საერთაშორისო ტურნირის გამარჯვებული ლევან ორჯონიკიძე იყო, რომელთანაც გურულ მოჭიდავეს უარყოფითი ბალანსი ჰქონდა, თუმცა, როგორც მწვრთნელი დავით მჟავია ამბობს, ამჯერად ოთარმა სრული მობილიზებით ჩაატარა შეხვედრა.
„ჩვენმა ლომმა უდიდესი სიხარული მომანიჭა, ამ შეხვედრის დამთავრების შემდეგ ორთავე სიხარულის ცრემლებს ვღვრიდით. რაც მთავარია, შრომა დაგვიფასდა ოთარსა და მეც. მას კიდევ აქვს შესაძლებლობა, წელს მეორედ გახდეს საქართველოს ჩემპიონი, ოღონდ ამჯერად მასზე 2 წლით უფროსებში U-17 წლამდე ასაკში, რომელიც 12-15 მარტს გაიმართება ხაშურში, მასთან ერთად კიდევ სამი ლანჩხუთელი მოჭიდავე მიიღებს მონაწილეობას _ ყველასათვის ნაცნობი საქართველოს სამგზის ჩემპიონი და ერთხელ ვიცე-ჩემპიონი, მსოფლიოს პირველობის ბრინჯაოს მედალოსანი და ევროპის ვერცხლისა და ბრინჯაოს მედლის მფლობელი თამაზ ღლონტი; საქართველოს პრიზიორი და ევროპის პირველობის მონაწილე ლუკა ჭყონია და საერთაშორისო ტურნირების ბრინჯაოს პრიზიორი და რესპუბლიკური ტურნირის გამარჯვებული დავით სულაბერიძე“, _ ამბობს, ლანჩხუთელ ფალავანთა პირადი მწვრთნელი, სსრკ სპორტის ოსტატი დავით მჟავია.
