ამ წუთებში პოლიტიკური მოძრაობა „გირჩის“ ლიდერი ზურა ჯაფარიძე, მოძრაობის აქტივთან ერთად ჩოხატაურში იმყოფება. მხარდამჭერებთან შეხვედრაზე, რომელიც ნოდარ დუმბაძის სკვერში იმართება, მხოლოდ რამდენიმე ადამიანი მივიდა.
როგორც “გურია ნიუსთან” მოძრაობის ლიდერმა ზურა ჯაფარიძემ განაცხადა, მხარდამჭერთა შეხვედრაზე არ მისვლა რამდენიმე მიზეზმა განაპირობა:
“მხარდამჭერთა არ მოსვლის ერთ–ერთი ძირითადი მიზეზი, ალბათ, ისაა, რომ ჩვენ რეგიონული სტრუქტურები არ გვაქვს, რომ ამ გზით გვეცნობებინა მოსახლეობისთვის შეხვედრის შესახებ. ჩვენ მხოლოდ ფეისბუქის საშუალებით დავაანონსეთ, რაც შეიძლება ბევრმა ვერც ნახა, ამიტომ ადამიანების მცირე ნაწილს ვხვდებით, თუ ამას შეხვედრა ჰქვია; მეორე მიზეზი ისაა, რომ ისეთ რაიონში, როგორიც ჩოხატაურია, სადაც ადამიანების შემოსავლის ერთადერთ წყაროს საბიუჯეტო ორგანიზაციებიდან მიღებული ხელფასი და რაღაც დახმარებები წარმოადგენს, ადამიანებს ექნებათ შიშის ფაქტორი, რომ ისიც არ დაკარგონ, რაც აქვთ; ამავე დროს ჩართულია სუს–იც. ასე იყო გუშინ ოზურგეთშიც და ასეა აქაც _ ვხედავთ, რომ მოდიან ადამიანები, მანქანებიდან ფოტოებს იღებენ და მიდიან, _ ამბობს ზურა ჯაფარიძე, რომლის თქმითაც, პარლამენტში მოხვედრის შემთხვევაში, ძირითადად, ოთხ პროექტზე გაამახვილებენ ყურადღებას.
“თუ პარლამენტში მოვხვდებით, პირველ რიგში, რასაც შევცვლით, ესაა ქონების პროექტი. ანუ, აქტივები, რომლებიც ბოლშევიკებმა წაართვეს ჩვენს წინაპრებს, უნდა დაუბრუნდეს მოქალაქეებს და მოქალაქეები გახდნენ მესაკუთრეები; გადასახადების შემცირების და ერთი გადასახადის პროექტი. საქართველო უნდა იყოს ბრენდი, რომელსაც ექნება მხოლოდ ერთი დაბალი გადასახადი და მთავრობის ზომა იქნება შემცირებული 15%-მდე; გარდა ამისა, ჩვენ გვაქვს განათლებაზე ხედვა _ კერძო საგანმანათლებლო დაწესებულებები სრულად გათავისუფლდნენ სახელმწიფო რეგულაციებისგან, რომ კონკურენცია გაჩნდეს და ვნახოთ, რა ტიპის სასწავლებლები მუშაობენ კარგად და რა ტიპის _ ვერ მუშაობენ; მართლმსაჯულების რეფორმის პროექტი, რომელზეც უკვე გვაქვს წინასწარი შეთანხმება გაფორმებული სხვა ოპოზიციურ პარტიებთან ერთად _ რა შეიძლება შეიცვალოს მართლმსაჯულების სისტემაში, რომ სასამართლომ, რაც შეიძლება სწრაფად დაიბრუნოს ნდობა“, _ გვითხრა ჯაფარიძემ.
