აჭარაში ეპიდვითარება სერიოზულია.
ინფექციური საავადმყოფოს სამედიცინო დირექტორის, მარინა ეზუგბაიას თქმით, „ინციდენტობის მაჩვენებელი 42.4-ია. ეს ნიშნავს, რომ აჭარა წითელი ზონაა“.
მართალია რეგიონის ჩაკეტვაზე საუბარი არ არის, მაგრამ აჭარაში ვითარების დასტაბილურება რეკომენდაციის შესრულებაზე, მათ აღსრულებაზე კონტროლის მექანიზმების გაძლიერებასა და კონტროლის გაფართოებაზეა დამოკიდებული.
რამდენიმე დღეა, რაც ბათუმში მოქალაქეებს კორონავირუსზე ტესტის გაკეთების შესაძლებლობა სპეციალურად მოწყობილ კარვებშიც აქვთ.
მოქალაქეებს, კარვებში მისვლისა და გამოკვლევის ჩატარებისკენ დაავადებათა კონტროლისა და საზოგადოებრივი ცენტრის დირექტორმა, ამირან გამყრელიძემაც მოუწოდა.
„გურია ნიუსმა“ სცადა გარკვევა, რამდენად დიდია მოქალაქეების დაინტერესება ტესტის ჩასატარებლად_ ამ საკითხზე წითელი ჯვრის საზოგადოების კოორდინატორს, გიორგი ბოლქვაძეს ვესაუბრეთ.
ბოლქვაძის თქმით, მოქალაქეების დაინტერესება დიდია, თუმცა, მათ ნაწილს კორონავირუსის არსებობის არ სჯერა.
„მოქალაქეების დაინტერესება ძალიან დიდია. თითო კარავში ზოგჯერ 200-ზე მეტი ტესტი კეთდება დღეში. არიან ადამიანები, რომლებიც მაღალ მოქალაქეობრივ პასუხისმგებლობას იჩენენ, რომლებსაც შეხება ჰქოდათ კოვიდინფიცირებულთან ან რომელიმე კლასტერთან და მიუხედავად იმისა, რომ საეჭვო სიმპტომები არ ჰქონიათ მოდიან და ტესტს იტარებენ. თუმცა, არიან ადამიანებიც, რომლებიც ტესტს იკეთებენ, მაგრამ ამბობენ, რომ კორონავირუსის არ სჯერავთ“,_ გვეუბნება ბოლქვაძე.
გიორგი ბოლქვაძის განმარტებით, ტესტირების პროცესი ხამოკლეა და წითელი ჯვრის საზოგადოების მოხალისეები რიგში დისტანციის დაცვას მეთვალყურეობენ და კარავში შესვლამდე მისული მოქალაქეების საკონტაქტო მონაცემებს აგროვებენ.
რაც შეეხება კარვებს, ამ დროისთვის უკვე 5 კარავია ბათუმის მასშტაბით და 1 ქობულეთში.
კარვები განთავსებულია ანბანის კოშკის მიმდებარედ ( ზღვის მხარეს), კოლონადებთან ( ბულვარში), აჭარულ სახლთან ( ბულვარში). დღეს გაიხსნა ხოფის ბაზრობის მიმდებარე ტერიტორიაზე და ასევე წერეთლის ქუჩაზე სკოლასა და ავტოსადგურს შორის.
კარვებში ტესტირება შესაძლებელია:
11:00 დან 14:00 მდე
16:00 დან 23:00 მდე.
ცნობისთვის, ამ დროისთვის საქართველოში კორონავირუსის დადასტურებული შემთხვევაა – 1773, მათ შორის გამოჯანმრთელებული – 1325, ხოლო გარდაცვლილი 19 ადამიანია.
ბოლო 24 საათში ინფიცირების 44 შემთხვევა გამოვლინდა, რომელთაგან ახალი შემთხვევების უმრავლესობა, 25 შემთხვევა, ბათუმში გამოვლინდა.
