“მთავარი არხის“ სახემ და მსახიობმა ილო ბეროშვილმა ტელეკომპანია “ფორმულას“ ეთერში ერთ-ერთ გადაცემაში გურამ შარაძეს “ყველაზე ცუდი ქართველი” უწოდა.
ამასთან დაკავშირებით მან დღეს სოციალურ ქსელში ბოდიში მოიხადა. მის ამ განცხადებას სოციალურ ქსელში კიდევ ერთი განცხადების გავრცელება მოყვა.
“ ესე იგი, ვერ გავაგებინე ხალხს…. მე ცხონებულ გურამ შარაძეს პირადად არ ვიცნობდი და შესაბამისად, პიროვნულად ვერ დავახასიათებ და რაც შეეხება მის მოღვაწეობას, რაც მე ვიცი, ეს არის ილია ჭავჭავაძის საქმე და ზოგადად, ილიაზე მისი ნათქვამი ყველა ფრაზა არის ჩემთვის პატივსაცემი!!!!! ვინც ვერ გაიგო, ვაზუსტებ, როდესაც არსებობს უამრავი ქვეყნის მოღალატე გურამ შარაძე რატომ უნდა მეთქვა? ცოტა დაფიქრდით….ვისაც არ ჯერა, ვერაფერს ვერ ვუზამ. თენგიზ კიტოვანს ვიტყოდი, რომ არა ილიას მკვლელი. ასე რომ, ძალიან გთხოვთ, ვისაც არ გჯერათ, ეგ თქვენი ნებაა, მაგრამ აგრესია და მუქარები თქვენთვის შეინახეთ!!!!
ბერბიჭაშვილია მოღალატე და არა ცხონებული შარაძე … ბერბიჭაშვილზე უნდა მეთქვა ყველაზე ცუდი ქართველი და ცხონებულ შარაძეზე, რომლის მოღვაწეობასაც პატივს სცემს ჩემი ოჯახიც და მეც გადმოცემით!! მასზე არ ვიტყოდი ასეთ საშინელ რამეს და მოვრჩი მე!!!“ _ წერს ილო ბეროშვილი სოციალურ ქსელში.
სოციალურ ქსელში ასევე სტატუსს აქვეყნებს ილო ბეროშვილის მამიდა, ჟურნალისტი და პუბლიცისტი შურთხია ბეროშვილი.
“ჩემი აზრია, რომ ადამიანმა თავის შეცდომებზე პასუხი მხოლოდ თვითონ უნდა აგოს, თავიც თვითონ დაიცვას და პასუხიც თავად გასცეს, ამიტომ საკუთარ შვილსაც არასდროს გამოვექომაგები, თუ უღირსი საქციელი ჩაიდინა…
ჩვენ, დიდი ილო ბეროშვილის ოჯახში გაზრდილებმა (რომლის სახელი, პირველ რიგში, დიდი ილია ჭავჭავაძის სახელთან ასოცირდება, იმიტომ, რომ მისი მოღვაწეობა ყვარლის ილია ჭავჭავაძის აღდგენას და მისი მემკვიდრეობის მოვლა -პატრონობას უკავშირდება). კარგად ვიცით, ვის რა დამსახურება მიუძღვის ერის წინაშე, მათ შორის გურამ შარაძეს, ილოც, მათ შორის ერთი ჩვენგანია, რომელმაც კარგად იცის, რომ ბატონი გურამ შარაძე „ცუდი ქართველი“ კი არა, დიდი საზოგადო მოღვაწე იყო…კარგია, რომ საზოგადოება აღშფოთდა და თავისი გულისტკენა გამოხატა, მაგრამ ძალიან ცუდია, როდესაც არ გინდა დაიჯერო, რომ ეს მართლაც უნებლიე დაშვებული შეცდომა იყო, ჩვენ ხომ ხშირად მიზეზი გვჭირდება, რომ ადამიანი ლაფში ამოვსვაროთ, ცოდვები გავუხსენოთ…
ჩემთვის მოულოდნელად სასიამოვნო იყო ქალბატონ რუსუდან შარაძის პოსტი, რომელსაც ყველაზე მეტი უფლება აქვს თავისი აღშფოთება გამოეხატა… იგი თავისი მამის მართლაც ღირსეული შვილია, რისთვისაც მთელი ოჯახის სახელით მადლობა მინდა გადავუხადო… საშინელი კომენტარების ავტორებს კი მინდა იესოს იტყვები შევახსენო: „ვინც თქვენს შორის უცოდველია, იმან ესროლოს ქვა…““ – წერს შურთხია ბეროშვილი.
“მოუხდია ბოდიში ილო ბეროშვილს. ბერბიჭაშვილი უნდა მეთქვა და მექანიკურად წამომცდაო. მისი ბაბუა ილია ჭავჭავაძის სახლ-მუზეუმის დირექტორი ყოფილა ოდესღაც და ბავშვობიდან მესმოდა ისტორიები, მათ შორის, გურამ შარაძეზეო. ბაბუისგან კარგის მეტი რა უნდა გაეგო?! მოკლედ, ასეა თუ ისე, ჩემო უსაყვარლესო მეგობრებო, შევეშვათ ამ კაცს. საკმარისზე მეტი მოხვდა”, – ამის შესახებ გურამ შარაძის ქალიშვილი, რუსუდან შარაძე სოციალურ ქსელში წერს.
„რამდენად გულწრფელია მისი ახსნა-განმარტება, აღარ მაინტერესებს. ბოდიშის მოხდა ასეთ მძიმე შეურაცხყოფასა და გულსტკენას მომენტალურად ვერ შველის, მაგრამ გამიხარდა.
ე.ი. არ ყოფილა მთლად წყალწაღებული, ხვდება და აღიარებს, რომ ცუდად მოიქცა. ეს ყველას არ შეუძლია. ადამიანები ვართ და შევუნდოთ. ყოველ შემთხვევაში, მე განიარაღებული” ვარ”, – წერს ფეისბუქზე რუსუდან შარაძე.
