,,საქართველოში არსებული რადიკალურად განწყობილი ძალები გაურკვევლობას მატებენ რუსეთთან საჰაერო კომუნიკაციის აღდგენის საკითხს, რაზეც საუბარი ნაადრევია“, – ამის შესახებ რუსეთის ფედერაციის საბჭოს საერთაშორისო საქმეთა კომიტეტის ხელმძღვანელმა გრიგორი კარასინმა რუსულ გამოცემა „kommersant“ -თან მიცემულ ინტერვიუში განაცხადა.
ოკუპანტი ქვეყნის დეპუტატის თქმით, მოხარულია პრემიერ-მინისტრი ირაკლი ღარბაშვილის დაბალანსებული განცხადებით.
„საჰაერო მიმოსვლაზე საუბარი ნაადრევია. საქართველოში რადიკალი მყვირალები (გაიხსენეთ ბოლო შემთხვევა ვლადიმერ პოზნერთან დაკავშირებით) ამ საკითხს მხოლოდ გაურკვევლობას მატებს. ეს იყო სრულიად მახინჯი ინციდენტი. ჩვენ მოხარული ვართ, რომ ამ საკითხზე საქართველოს პრემიერ-მინისტრის დაბალანსებული განცხადება მოვისმინეთ ” – განაცხადა კარასინმა.
მისი თქმით, საქართველოს პრემიერ-მინისტრის სპეციალურ წარმომადგენელთან რუსეთთან ურთიერთობის საკითხებში ზურაბ აბაშიძესთან მუშაობას ონლაინ ფორმატით აგრძელებს.
„ამ ერთობლივ მუშაობას ჩვენ 2012 წლიდან ვატარებთ და მას პრაქტიკული შედეგები მოაქვს რიგ მნიშვნელოვან სფეროებში. პანდემიამ არ მოგვცა საშუალება, 2020 წელს პირისპირ შევხვედროდით, მაგრამ ჩვენ ვაგრძელებთ მუშაობას ონლაინ ფორმატში“ – აღნიშნა კარასინმა.
