ისრაელის მიერ ღაზას მიმართულებით ნასროლი რაკეტები ლტოლვილთა ბანაკში სახლს და მედიის ოფისს მოხვდა. ამის შესახებ ინფორმაციას CNN ავრცელებს.
მედიის მიერ გავრცელებული ინფორმაციით, შაბათს, ისრაელმა დაბომბა სახლი, სადაც ოჯახი რამადანის დასრულების აღსანიშნად შეიკრიბა. გარდა ამისა, დაიბომბა შენობა, სადაც საერთაშორისო მედია იყო განთავსებული. როგორც ცნობილია, შენობაში AL JAZEERA-ს და ASSOCIATED PRESS-ის ოფისები იყო განთავსებული, სხვა მედიასაშუალებებთან ერთად. ისრაელმა ღამით უფრო მეტი საჰაერო იერიში მიიტანა ღაზაზე.
კვირას ისრაელის თავდაცვის ძალებმა განაცხადეს, რომ დაბომბეს ჰამასის ლიდერის სახლი. გაკეთებული განცხადების მიხედვით, იერიშის შედეგად ჰამასის ლიდერი არ დაშავებულა.
გარდა ამისა, კვირა დილას, ისრაელის მიერ ღაზაზე მიტანილ ავიაიერიშს პალესტინას 2 მოქალაქე ემსხვერპლა და 25 დაშავდა.
პალესტინის ჯანდაცვის სამინისტროში აცხადებენ, რომ დაშავებულებს შორის უმეტესად ბავშვები და ქალები არიან.
სამედიცინო და სამოქალაქო თავდაცვის ჯგუფებმა ნანგრევების ქვეშ მოყოლილი ხუთი ბავშვი გადაარჩინეს და ისინი ახლა საავადმყოფოში არიან. სამაშველო ოპერაცია გრძელდება.
სამინისტროს ცნობით, ღაზაში სულ 147 ადამიანია დაღუპული, მათგან 41 ბავშვი და 23 ქალია. ამ კვირაში ღაზაზე მიტანილი საჰაერო იერიშების შედეგად 1125 ადამიანია დაშავებული.
გარდა ამისა, არაბებსა და ებრაელებს შორის ამბოხებამ და ძალადობამ ისრაელის მასშტაბით ქალაქებში შეფერხებები გამოიწვია.
შაბათს, ჰამასმა ათობით რაკეტა გაისროლა თელ- ავივისა და ქალაქ აშდოდის მიმართულებით.
ისრაელის საგანგებო სიტუაციების მართვის სამსახურის ინფორმაციით, თელ-ავივში შაბათს შენობების დაბომბვას 50 წლის ქალი ემსხვერპლა, რის შედეგადაც ისრაელში დაღუპულთა რიცხვი 10-მდე გაიზარდა.
