Amnesty International წუხს, რომ საქართველოს ხელისუფლება არ ასრულებს თავის მოვალეობას, უზრუნველყოს ეფექტური დაცვა იმ ბავშვების, რომლებიც სამცხე ჯავახეთის მთიან რეგიონში, ნინოწმინდის სკოლა-ინტერნატში მოხვდნენ.
სკოლა-ინტერნატში ბავშვთა ძალადობის შესახებ ყველა ბრალდება უნდა იყოს საფუძვლიანად გამოკვლეული საერთაშორისო სტანდარტების შესაბამისად, ბავშვის საუკეთესო ინტერესების დასაცავად.
გამოძიებამ უნდა უზრუნველყოს სავარაუდო დამნაშავეთა ან მსხვერპლთა დაუყოვნებლივი გაყვანა ახლანდელი გარემოდან.
ორგანიზაცია აღნიშნავს, რომ საქართველოს ეკისრება საერთაშორისო ვალდებულება მიიღოს ყველა სათანადო ზომა ბავშვების დასაცავად. ამგვარი დამცავი ღონისძიებები მოიცავს ეფექტურ პრევენციებს ბავშვზე არასათანადო მოპყრობის შემთხვევაში.
წერილის მომზადების დროს 20-ზე მეტი ბავშვი რჩება სკოლა-ინტერნატში და მათზე სავარაუდოდ ზრუნავენ სავარაუდო დამნაშავეები. სკოლა-ინტერნატში ბავშვების ზუსტი რაოდენობა სადავოა, რადგან ამის შესახებ ადგილობრივი უფლებადამცველები აცხადებენ, რომ რამდენიმე ბავშვი იქ ცხოვრობს ოფიციალური რეგისტრაციის გარეშე.
“ამნესთი ინთერნეიშენალი” მოუწოდებს საქართველოს მთავრობას:
უზრუნველყოს სასტიკი მოპყრობის ყველა ბრალდების სწრაფი და ეფექტიანი გამოძიება და სავარაუდო დამნაშავეების საერთაშორისო სტანდარტების შესაბამისად პასუხისგებაში მიცემა;
ყველა სავარაუდო მსხვერპლი და დანაშაულის მოწმე ბავშვები უზრუნველყოს დაცვითა და დახმარებით,
დაადგინოს ნინოწმინდის სკოლა-ინტერნატში ბავშვების ზუსტი რაოდენობა და გამოიძიოს ცნობები, რომ დაწესებულებაში ბავშვების ჩარიცხვა და გარიცხვა ხდებოდა პასუხისმგებელი სახელმწიფო სააგენტოებისადმი შეტყობინების გარეშე;
ბავშვთა უფლებების კონვენციის შესაბამისად, უზრუნველყოს ბავშვის საუკეთესო ინტერესების გათვალისწინება ბავშვებთან დაკავშირებული ყველა გადაწყვეტილებების მიღებისას. უზრუნველყოს თითოეული ბავშვის პირადი ცხოვრებისა და საოჯახო გარემოს, აგრეთვე განათლების, ფიზიკური და ფსიქოლოგიური ჯანმრთელობის უფლებების დაცვა, განსაკუთრებით გამოძიების პროცესში;
უზრუნველყოს მოწმეების დაცვა, მათ შორის ბავშვების და უზრუნველყოს, რომ მოწმეების მიმართ მუქარისა და შევიწროების ყველა ბრალდება ეფექტიანად იქნას გამოძიებული;
შეასრულოს გაერო-ს კომიტეტის დროებითი ზომა და უზრუნველყოს, რომ სახალხო დამცველის ოფისის თანამშრომლებს ჰქონდეთ წვდომა ნინოწმინდის სკოლა-ინტერნატზე;
გამოიძიოს და ეფექტიანი რეაგირება მოახდინოს სახალხო დამცველის ოფისისა და აღნიშნულ საქმეზე მომუშავე ადგილობრივი უფლებადამცველების მიმართ შევიწროებისა და მუქარების შესახებ ცნობებზე;
უზრუნველყოს უსაფრთხო და ხელსაყრელი გარემო, რომელშიც შესაძლებელია ადამიანის უფლებების დაცვა დასჯის, ანგარიშსწორებისა ან დაშინების შიშის გარეშე.
