ერთი თვის წინ , ერთი კილოგრამი მოცვის ფასი 9 დოლარზე ცოტათი მეტიც კი იყო. თუმცა, დღეისთვის სამ დოლარნახევრამდე დაეცა და ამ ფასად გაყიდვაც კი ჭირს.
თუ რაა მიზეზი ფასის ასე დაცემის, ძირითადად მწიფობის მოგვიანებით დაწყებას ასახელებენ.
„გურია ნიუსი“ ეწვია ჭანიეთის , ნარუჯის პლანტაციებს. ასევე ზოგ კერძო ოჯახს, სადაც მოცვი აქვთ გაშენებული.
_ მოცვის ბაზარზე გატანა, რაც უფრო ადრე მოხდება, უმჯობესია. ამიტომ ამინდზეც არის დამოკიდებული ზოგი რამ. მომავალი წლიდან, შესაძლოა, სათბურებში მოქცევაზე ვიფიქროთ, – გვითხრეს აქ.
უფრო უიმედობას გამოთქვამენ ისინი, ვინც სამომავლოდ, სავარაუდოდ, ფიქრობდა გაშენებას.
არც ისე დიდი ხანია, რაც სოფლის მეურნეობის სამინისტრომ ხალხს ლურჯი მოცვის გაშენება შესთავაზა, ასპროცენტიანი დაფინანსებით. მართალია, ხალხი ჯერ ყოყმანობდა, გაეშენებინა თუ არა, თუმცა როცა სხვა გზა არ დარჩა და შემოთავაზებაც ასე თუ ისე მისაღები იყო, მალე დაიწყო ჰექტრობით მიწებზე ლურჯი მოცვის გაშენება. კერძო ოჯახებზე უფრო, მაინც ბიზნესმენები ჩაერრთნენ ამ საქმეში.
დღეისთვის სახეზეა ხალხის უკმაყოფილება და განწყობაც იცვლება. აქცენტს მოსახლეობა მაინც ჩაის კულტურის რეაბილიტაციაზე აკეთებს.
_თუ ასპროცენტიან დაფინანსებას გვთავაზობთ, იყოს თქვენი შემოთავაზება ძალაში, ოღონდ რა გავაშენოთ და აღვადგინოთ ამ თანხით, არჩევანი ჩვენზე იყოს. ეს არის ჩაი! გავაშენოთ მოცვი და ვაჭამოთ ჩიტებს?- ასე დასვეს საკითხი სამთავრობო ჯგუფის შეხვედრისას გურიაში, სამი წილის წინ.
_ჰე, ბატონო, გავაშენეთ, ჩიტებმაც გვარიანად ჭამეს და ახლა ცოტა მუქთადაც უნდა მისცე მყიდველს. თან, იკითხეთ, როგორი მოსავლელია, პატარა ბავშვივით უნდა უთვალთვალო…ეგონათ, წააფარებ „კლიონკას“, მიუშვებ წყალს და მორჩა…წვეთოვანას მარტო რომ შეეძლოს საქმე, ეიხედე ცაზე, რამდენჯერ დაგეცემა წვეთი და თქეშითაც გადმოგასხმს, _ ასე ირონიაშერეული ხუმრობით საუბრობენ დღეს გურულები და აქცენტს აკეთებენ ჩაის რეაბილიტაციაზე, ოღონდ არა ისეთი სარეაბილიტაციო პროგრამით, რაც დღეისთვის აქვს მთავრობას შეთავაზებული.
_30 წელია, ჩაის კულტურა ჩვენთან , ასე ვთქვათ, ჩავარდა. კი, ბატონო, ჩაი რომ საუკეთესო პროდუქტია, სადავო არაა, თუმცა სურვილი თუ არის, რომ ჩაი ძველებურად აღდგეს, უნდა მოხდეს მეწარმეთა გაერთიანება. ჯერჯერობით, ხუთი კაცი ვერ გაერთიანდა. ყველაფერს ვიღაცას ან მთავრობას ნუ დააბრალებს ნურავინ… ერთი კოოპერატივს რომ ვერ გახსნი, ასე არაა. მსოფლიოში სხვანაირად არ ხდება. ამას რომ ვამბობ, არ გეგონოთ მოცვის გაშენების უპირობო მომხრე ვიყო, თუმცა ერთ ჰექტარზე 8 ტონა მოდის. ჩაი კი _ ხუთ ტონამდე. მთავარია , სწორი მიდგომა, – გვითხრა ცნობილმა აგრონომმა აკაკი ღლონტმა.
მოცვის კრეფის სეზონის, რეალიზაციის პრობლემის და ზოგადად ჩაისა და მოცვის გაშენების თაობაზე თვალსაზრისს გურიაში , მალე შემოგთავაზებთ.
ავტორი: მარინა ჩიხლაძე
